މިއީ ފަސޭހަ ދަތުރެއް ނޫން: ވިނީޝިއުސް

ފުޓުބޯޅަ ކެރިއަރުގައި ކުރިއަށް ދާން ކުރަމުން އަންނަ މަސައްކަތަކީ ފަސޭހަ ދަތުރެއް ނޫން ކަމަށް، ރެއާލް މެޑްރިޑަށް ކުޅެމުން އަންނަ ބްރެޒިލްގެ ވިނީޝިއުސް ޖޫނިއާ ބުނެފި އެވެ.

އޭނާ މިހެން ބުނީ މިއަހަރުގެ ގްލޯބް ސޮކާ އެވޯޑަށް ފަހު ދިން އިންޓަވިޔުއެއްގަ އެވެ. މިއަހަރުގެ ގްލޯބް ސޮކާ އެވޯޑުގެ އެންމެ މޮޅު ފޯވާޑުގެ އެވޯޑު އަދި އެންމެ މޮޅު ކުޅުންތެރިޔާގެ އެވޯޑު ވެސް ކާމިޔާބު ކުރީ ވިނީޝިއުސް އެވެ. އޭގެ ކުރިން ވިނީޝިއުސް ވަނީ، ދުނިޔޭގެ ފުޓުބޯޅައިގެ މައި އިދާރާ (ފީފާ) އިން އަހަރުގެ މޮޅު ކުޅުންތެރިޔާ އަށް ދެމުން އަންނަ ފީފާ ބެސްޓު އެވޯޑު ވެސް ކާމިޔާބު ކޮށްފަ އެވެ.

ވިނީޝިއުސް ބުނީ، މިހާ ހިސާބަށް އައުމަކީ އޭނާ އަށް ފަސޭހަ ކަމެއް ނޫން ކަމަށާއި، އޭނާގެ ދަތުރަކީ ފަސޭހަ ދަތުރެއް ނޫން ކަމަށެވެ. ފުޓުބޯޅައިގައި އޭނާގެ ހުވަފެންތަކާއި އުންމީދުތައް ޙާސިލު ކުރުމަށް ވަރަށް ގިނަ ޤުރުބާނީތައް ވާން ޖެހުނު ކަމަށް ވެސް ވިނީޝިއުސް ވަނީ ބުނެފަ އެވެ. އެކަމަކީ އޭނާގެ އާއިލާ މީހުން، ރަޙުަމަތްތެރިން އަދި އޭނާ ދެކެ ލޯބިވާ މީހުންނަށް ހޯދައިދޭ ފަޚުރުވެރިކަމެއް ކަމަށް ވެސް ވިނީޝިއުސް ބުންޏެވެ.

މީގެ އިތުރުން ވިނީޝިއުސް ބުނީ އެފަދަ މުހިންމު އެވޯޑެއް އޭނާ އަށް ލިބުމަކީ، މިއަހަރުގެ ތެރޭގައި ލިބުނު އިތުރު ފުރިހަމަ ކާމިޔާބެއް ކަމަށެވެ. ސްޕެއިންގެ ރެއާލް މެޑްރިޑާ އެކު ފަސް ތައްޓެއް ކާމިޔާބު ކުރެވުނުކަން ފާހަގަކުރަމުން ވިނީޝިއުސް ބުނީ، ގްލޯބް ސޮކާގެ އިންޑިވިޖުއަލް އެވޯޑު ލިބުމުން، އެކަމުން ދައްކައިދެނީ އޭނާ ކުރިއަށް ދަނީ ރަނގަޅު މަގުގައި ކަމަށް ވިނީޝިއުސް ބުނެފައިވެ އެވެ. އެކަމާ ގުޅިގެން ވިނީޝިއުސް ވަނީ ރެއާލްގެ އިތުރުން ކުރިން އޭނާ ކުޅުނު ފްލެމެންގޯ އަދި ބްރެޒިލްގެ ޤައުމީ ޓީމަށް ޝުކުރު އަދާ ކޮށްފަ އެވެ.

ގިނަ ބަޔަކު ޤަބޫލުކޮށްގެން ތިބީ މިއަހަރުގެ ބެލެންޑިއޯ އެވޯޑު ވެސް ވިނީޝިއުސް ކާމިޔާބު ކުރާނެ ކަމަށެވެ. ނަމަވެސް މިއަހަރުގެ ބެލެންޑިއޯ އެވޯޑު ކާމިޔާބު ކުރީ ސްޕެއިންގެ ރޮޑްރީ އެވެ.