ރައީސް މުއިއްޒުގެ ސަރުކާރަށް އަހަރަކަށް ވުރެ ގިނަ ދުވަސް، އަދިވެސް ކެބިނެޓް އެކުލަވާލައި ނުނިމޭ

ދިވެހިރާއްޖޭގެ ގިނަ ރައްޔިތުންގެ ވޯޓާއެކު ރައީސް ޑރ.މުހައްމަދު މުއިއްޒުގެ ސަރުކާރު ގެނައީ ވަރަށް އުންމީދާއެކުއެވެ. ކުރީގެ ސަރުކާރުގައި ރައްޔިތުން ނުރުހުންވި ކަންކަން ރައީސް މުއިއްޒު ރަނގަޅުކޮށް ދެއްވައި، ގައުމުގެ މިސްރާބު ބަދަލުކޮށްދެއްވާނެ ކަމުގެ ފުރިހަމަ ޔަގީންކަމާއެކު އެވެ. ނަމަވެސް ރައީސް މުއިއްޒުގެ ސަރުކާރަށް އަހަރެއް ވެގެންދިޔައިރު ގައުމަށް، އަދި ރައްޔިތުންނަށް ލިބުނު އެއްވެސް ކުރިއެރުމެއް ނެތެވެ. ނަމަވެސް ސަރުކާރުގެ ބައެއް އިސްބޭފުޅުންގެ ދިރިއުޅުން ވަރަށް ވެސް ބޮޑަށް ތިޔާގިވެ ކުރިއަރައިގެން ގޮސްފައިވާއިރު، ސަރުކާރުގެ ކޮރަޕްޝަންގެ ގިނަ މައްސަލަތައް ވަނީ ފެންމަތިވެފައެވެ. ކޮރަޕްޝަންގެ ގިނަ ލިޔެކިއުންތައް ވަނީ އާއްމުވެފައެވެ.

އެއާއެކު މިސަރުކާރަށް ގިނަ ބައެއްގެ ފާޑުކިޔުން ވަނީ އަމާޒުވެފައެވެ. ބޯހިޔާވަހިކަން ހޯދައިދިނުމަށް އައި މިސަރުކާރުން ރައްޔިތުންގެ ގޯއްޗާއި، ފްލެޓުތައް ވައްގަށް ނަގާފައިވާ ކަމަށް ގިނަ ރައްޔިތުން ދަނީ ބުނަމުންނެވެ. ގިނަ ރައްޔިތުން މިސަރުކާރަށް ނުރުހުންވެފައިވަނިކޮށް، އެޗްޑީސީގެ ގޯތީގެ ވައްކަމާއި ގުޅިގެން ރައީސް މުއިއްޒު ވިދާޅުވެފައިވަނީ މިމައްސަލަތައް ފުލުހުން ތަހުގީގު ކުރަމުންދާ ކަމަށާއި، އުންމީދުކުރަނީ މިކަމުގެ ހަގީގަތް ހާމަވަގެންދާނެ ކަމަށެވެ. އަދި ހަގީގީ މާނައިގައި ކޮރަޕްޝަންގެ ޒީރޯ ޓޮލަރެންސް ތަންފީޒުކުރާނެ ކަމަށެވެ. ނަމަވެސް އޭގެފަހުން އަނެއްކާ ވެސް ހާމަވަގެންދިޔައީ ރައީސް މުއިއްޒު އެމައްސަލާގައި ވެސް ރައްޔިތުންނަށް އޮޅުވާލަން މަސައްކަތް ކޮށްފައިވާ ތަނެވެ. އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ކޮރަޕްޝަންގެ މައްސަލަތައް ސަމާލުކަމަށް ގެންނަވާ އެޗްޑީސީގެ ކުރީގެ ޗެއާމަން އަހުމަދު ޒުހޫރު ފޮނުއްވި ސިޓީ ލިބިވަޑައިގެންފައި ނުވާ ކަމަށް އެމަނިކުފާނު ވިދާޅުވެފައިވާއިރު، ރައީސް އޮފީހުން ސިޓީ ބަލައިގަތް ކަމުގެ ޗިޓް ވަނީ އާއްމުވެގެން ގޮސްފައެވެ.

މިފަދަ ހުރިހާ ކަމެއްގެ ރައްޔިތުން ކުރިމަތީގައި ސަރުކާރު ބަދުނާމުވުމުން އަނެއްކާ ވެސް މިސްރާބު އޮޅުވާލުމަށް ސަރުކާރުން ވަނީ މަސައްކަތް ފަށާފައެވެ.

އެގޮތުން 26 ޑިސެންބަރު 2024 ވަނަ ދުވަހު ކެބިނެޓަށް ސަރުކާރުން ވަނީ ކުއްލި ބަދަލުތަކެއް ގެނެސްފައެވެ.

މިނިސްޓްރީ އޮފް ފިނޭންސް އާއި ޕްލޭނިން މިނިސްޓްރީ އެއްކޮށްލައި މިހާރު ވަނީ މިނިސްޓްރީ އޮފް ފިނޭންސް އެންޑް ޕްލޭނިންގ އަށް ބަދަލުކޮށްފައެވެ. އެ މިނިސްޓްރީ ގެ މިނިސްޓަރު ކަމުގެ މަގާމަށް އައްޔަން ކުރެއްވީ މޫސާ ޒަމީރެވެ. މީގެ އިތުރުން ހައުސިންގ އާއި އިންފްރާސްޓްރަކްޗާރ އެއްކޮށްލައި މިހާރު ވަނީ އެ މިނިސްޓްރީގެ ނަން މިނިސްޓްރީ އޮފް ހައުސިން އެންޑް އިންފްރާސްޓްރަކްޗަރ އަށް ބަދަލުކޮށްފައެވެ. އެ މިނިސްޓްރީ ގެ މިނިސްޓަރު ކަމުގެ މަގާމް އަށް އައްޔަން ކުރެއްވީ ޑރ. އަބްދުﷲ މުއްތޮލިބެވެ. އަދި ހަޔަރ އެޑިޔުކޭޝަން މިނިސްޓަރަކަށް ހުންނެވި ޑރ. މަރިޔަމް މާރިޔާ ބަދަލުކުރައްވާފައިވަނީ އެނިމަލް ވެލްފެއަރ އެންޑް އެގްރިކަލްޗަރ މިނިސްޓަރަކަށެވެ. އަދި ހައުސިން މިނިސްޓަރު ޑރ.އަލީ ހައިދަރު ވަނީ ހަޔަރ އެޑިޔުކޭޝަން މިނިސްޓަރ ކަމަށް ބަދަލުކުރައްވާފައެވެ.

މީގެ އިތުރުން ހައުސިން މިނިސްޓަރު ޑރ.އަލީ ހައިދަރު ހަޔަރ އެޑިޔުކޭޝަން މިނިސްޓަރު ކަމަށް ބަދަލުކުރައްވާފައިވާތީ ވެސް ގިނަ ބައެއްގެ ފާޑުކިޔުން ވަނީ އަމާޒުވެފައެވެ. ރައްޔިތުންނާ ގުޅުންހުރި އެންމެ ބޮޑު އެއް މައްސަލަ ކަމަށްވާ ގޯއްޗާއި، ފްލެޓު މައްސަލާގައި ރައްޔިތުންނަށް ޖަވާބުދާރީނުވެ، އޮޅުވާލުމަށް މަސައްކަތް ކޮށްފައިވާ ކަމަށް ގިނަ ބަޔަކު ގަބޫލުކުރެއެވެ. ރައީސް މުއިއްޒުގެ މަސްލަހަތު އިސްކޮށް، ފްލެޓާއި، ގޯތި ދޫނުކޮށް، ބުރަކި ޖައްސަވައިގެން މިނިސްޓަރު ހައިދަރު ހުންނެވުމުން މިއަދު މިނިސްޓަރު ހައިދަރަށް އިތުބާރު ކުރާ ރައްޔިތެއް ނެތޭ ބުންޏަސް ދޮގަކަށްނުވާނެއެވެ. އަދި ކުރިއަށް އޮތްތާގައި ހަޔަރ އެޑިޔުކޭޝަން މިނިސްޓްރީގެ ހާލަތު ވެސް ދާނީ ދަށަށް ކަމަށާއި، ދަރިވަރުންނަށް ލިބެމުންދިޔަ އިނާޔަތްތަކުގައި ބުރަކި ޖެހުން ގާތް ކަމަށް ބައެއް މީހުން ދަނީ ތުހުމަތު ކުރަމުންނެވެ.

ރައީސް މުއިއްޒުގެ ސަރުކާރުގައި މިއީ ކެބިނެޓަށް ބަދަލު ގެނައި ދެވަނަ ފަހަރެވެ. މި ގެނައި ބަދަލާއެކީ މިހާރު ސަރުކާރުގައި އޮންނަނީ 21 މިނިސްޓްރީއެކެވެ. މިސްރާބު އޮޅުވާލުމަށް ސަރުކާރުގެ އެތެރެއަށް ގެންނަ ކުއްލި ބަދަލުތަކާއެކު ވެސް ރައީސް މުއިއްޒާއި ސަރުކާރަށް އާމާޒުވެގެން ދަނީ ރައްޔިތުން ނުރުހުމެވެ. މިސަރުކާރަށް އަހަރަކަށްވުރެ ގިނަ ދުވަސްގެންދާއިރު، ކެބިނެޓު އެކުލަވާލައި ނުނިމޭ ކަމަށާއި، ރައްޔިތުންނަށް ރަނގަޅު ޚިދުމަތެއް ފޯރުކޮށްދެވޭނީ ކޮން ދުވަހަކުން ކަމާއިމެދު ރައްޔިތުން ދަނީ ސުވާލު އުފައްދަމުންނެވެ.