ޕޮސްޓެކޮގްލޫ ހުރީ ޒިންމާ ނަގަން ތައްޔާރަށް

ޓޮޓެންހަމް އޮތް ޙާލަތުގެ ހުރިހާ ޒިންމާއެއް އޭނާ ނަގާނެ ކަމަށް، އެ ޓީމަށް އިރުޝާދު ދެމުން އަންނަ އަންގޭ ޕޮސްޓެކޮގްލޫ ބުނެފި އެވެ.

އޭނާ މިހެން ބުނީ އިނގިރޭސި ޕްރިމިއާ ލީގުގައި ނޮޓިންހަމް ފޮރެސްޓާ ދެކޮޅަށް އެ ޓީމު ނިކުންނަ މެޗުގެ ކުރިން ވާހަކަ ދައްކަމުންނެވެ. ފޮރެސްޓުގެ ދަނޑުގައި އެ ޓީމާ ދެކޮޅަށް ނިކުންނައިރު، މިވަގުތު ޓޮޓެންހަމްގެ ނަތީޖާތައް ވަނީ ދަށްވެފަ އެވެ.

އެކަމަށް އިޝާރާތްކޮށް ވާހަކަ ދައްކަމުން ޕޮސްޓެކޮގްލޫ ބުނީ، ހުރިހާ ކަމެއްގެ ފުރިހަމަ ޒިންމާ ނަގަން ޖެހޭ ފަރާތަކީ އޭނާ ކަމަށާއި، އޭނާ ހުރީ ޒިންމާ ނަގަން ތައްޔާރަށް ކަމަށެވެ. ޓޮޓެންހަމް ކުރިއަށް ދާނެ މަގު އިޚުތިޔާރު ކުރަން ހުރި މީހަކީ އޭނާކަން ފާހަގަކުރަމުން ޕޮސްޓެކޮގްލޫ ބުނީ، މިވަގުތަކީ އުނދަގޫ ވަގުތެއް ކަމަށެވެ. ޚާއްސަކޮށް ޓޮޓެންހަމްގެ ސަޕޯޓަރުންނަށް ދަށް ނަތީޖާތަކެއް ފެންނަ މެޗުތަކެއް ތަޖުރިބާ ކުރަން އެއްވެސް އިރަކު އޭނާ ބޭނުން ނުވާ ކަމަށް ޕޮސްޓެކޮގްލޫ ވަނީ ބުނެފަ އެވެ.

މީޣެ އިތުރުން އޭނާ ބުނީ ޓޮޓެންހަމްގެ ކުޅުންތެރިންނާއި، އެހެނިހެން ކޯޗިން އޮފިޝަލުން ވެސް އަންނަނީ ވަރަށް ބުރަކޮށް މަސައްކަތް ކުރަމުން ކަމަށެވެ. އަދި އެ މީހުން އަންނަނީ ރަނގަޅު ޒިންމާތަކެއް އަދާ ކުރަމުން ކަމަށާއި، ނަމަވެސް މެޗުތަކުން ނަތީޖާ ނުނެރެވޭތީ އެންމެން ވެސް ތިބެނީ ކަންބޮޑުވެ، މާޔޫސްވެފައި ކަމަށް ވެސް ޕޮސްޓެކޮގްލޫ ބުނެފައިވެ އެވެ.

މިވަގުތަށް ބަލާއިރު، އޭނާގެ ބޮލުގައި އެޅިފައި އޮތް ޒިންމާ ވަރަށް ބޮޑު ކަމަށާއި، އޭނާ އަށް އޮތް އެންމެ ބޮޑު ޒިންމާ އަކީ މިވަގުތު އޮތް ޙާލަތު ބަދަލު ކުރުން ކަމަށް ޕޮސްޓެކޮގްލޫ ބުންޏެވެ. އަދި ބޭނުން ވަނީ ކުލަބަށް ކާމިޔާބު ހޯދައިދޭންކަން ފާހަގަކޮށް ޕޮސްޓެކޮގްލޫ ބުނީ، އެކަމަށް އޮތީ ވަރަށް ދިގު އަދި އުނދަގޫ މަގެއްކަން ވެސް އިނގޭ ކަމަށެވެ.

ނޮޓިންހަމް ފޮރެސްޓާ ދެކޮޅަށް ނިކުންނައިރު، މިވަގުތު ޓޮޓެންހަމް އޮތީ ލީގު ތާވަލްގެ 11 ވަނައިގަ އެވެ. އެއީ މިހާތަނަށް ކުޅެފައިވާ 17 މެޗުން 23 ޕޮއިންޓާ އެކު އެވެ. މި ސީޒަންގެ ލީގުގައި އެ ޓީމު މޮޅުވެފައި ވަނީ ހަތް މެޗުންނެވެ. އަށް މެޗުން ބަލިވެފައިވާއިރު، ދެ މެޗުން ވަނީ އެއްވަރުވެފަ އެވެ.