ރައީސް، އަޒަރުބައިޖާނުގެ ރައީސަށް ހަމްދަރުދީގެ މެސެޖެއް ފޮނުއްވައިފި
25 ޑިސެމްބަރު 2024 | ބުދަ 17:37މަރުވި މީހުންގެ ހިމެނޭ އާއިލާތަކަށް ތައުޒިޔާ، ސަލާމަތްވި މީހުންނަށް ހަމްދަރުދީ ފޮނުއްވައިފައިވޭ
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
އަޒަރުބައިޖާންގެ އަކްތާއު ކައިރިއަށް މަތިންދާ ބޯޓެއް ވެއްޓުނު ހިތާމަވެރި ހާދިސާއާ ގުޅިގެން އެކަމުގެ ހިތާމައިގައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އަޒަރުބައިޖާނުގެ ރައީސް އިލްހާމް ހެއިދަރު އޮގްލޫ އަލިޔެވް، ހަމްދަރުދީގެ މެސެޖެއް ފޮނުއްވައިފިއެވެ.
ރައީސް ފޮނުއްވި މެސެޖުގައި، އަކްތާއު ކައިރީގައި ބުދަ ދުވަހު ހިނގި ހިތާމަވެރި މަތިންދާ ބޯޓު ވެއްޓުމުގެ ހާދިސާގެ ސަބަބުން އެތައް ބަޔަކު މަރުވެ، ޒަޚަމްވި ކަމުގެ ޚަބަރު އެއްސެވީ ކުއްލި ހައިރާންކަމާއި ފުންހިތާމައާ އެކުގައި ކަމުގައި ވިދާޅުވެފައިވާ ކަމަށް ރައީސް އޮފީހުން މައުލޫމާތުދެއެވެ.
އެމަނިކުފާނު ފޮނުއްވި މެސެޖުގައި، އަޒަރުބައިޖާނުގެ ސަރުކާރަށާއި ރައްޔިތުންނަށް ވަކިން ޚާއްސަކޮށް މި ހާދިސާއަށްފަހު ސަލާމަތްވި މީހުންނަށް ވަރަށް އިޚްލާސްތެރިކަމާއެކު ހަމްދަރުދީ ފޮނުއްވައި، މި ހާދިސާގައި މަރުވި މީހުންގެ އާއިލާތަކަށް ވަރަށް އިޚްލާސްތެރިކަމާއެކު ތައުޒިޔާ ވިދާޅުވެފައިވެއެވެ.
ރައީސް ފޮނުއްވި މެސެޖު ނިންމަވާލައްވާފައިވަނީ މި ހާދިސާގެ ސަބަބުން ދިމާވި ގެއްލުންތަކުން އަރައިގަތުމަށް ކުރެވެމުންދާ މަސައްކަތްތަކުން ކާމިޔާބު ލިބުމަށް އެދިވަޑައިގަންނަވަމުންނެވެ.
ބޯޓު ވެއްޓުނު އިރު އޭގައި 62 ފަސިންޖަރުންނާއި 5 ކުރޫ މެންބަރުން ތިއްބެވެ. ބޯޓަށް ދިމާވި ހާދިސާ އަކާ ގުޅިގެން، ބުދަ ދުވަހު އަގްތައު އިން ގާތްގަނޑަކަށް 3 ކިލޯމީޓަރު (1.8 މޭލު) ދުރު ހިސާބެއްގައި ބޯޓު އޮއްވާ އިމަޖެންސީކޮށް ޖައްސަން މަޖުބޫރުވިއެވެ. ބޯޓު ވެެއްޓެމުން ދިޔަ މަންޒަރުތައް ސޯޝަމް މީޑިއާގައި އާންމުވެފައިވާއިރު އޭގައި އަލިފާން ރޯވެފައިވާ މަންޒަރު ފެނެއެވެ.
އާޒަރުބައިޖާންގެ ސަރުކާރުން ބުނާ ގޮތުގައި، މިހާތަނަށް 29 މީހުން ސަލާމަތްވި ކަން ވަނީ ކަށަވަރު ކުރެވިފައެވެ.
