ޕޮންޒީ ސްކީމާއި ގުޅިގެން އުފުލާފައިވާ ދައުވާތައް މުރާޖާ ނުކުރުމަށް ޕީޖީ އިން ނިންމައިފި

ކިންގްސް ކެޕިޓަލް ހޯލްޑިންގސް ޕްރައިވެޓްއިން ހިންގާފައިވާ އިންވެސްޓްމަންޓް ސްކީމްއާ ގުޅޭ މައްސަލައިގެ ދަޢުވާތައް މުރާޖަޢާކުރަން ނުފެންނަ ކަމަށް ޕްރޮސެކިއުޓަރ ޖެނެރަލްގެ އޮފީހުން ނިންމައިފިއެވެ.

ކިންގްސް ކެޕިޓަލް ހޯލްޑިންގސް ޕްރައިވެޓް ލިމިޓެޑްއިން އާންމުންނަށް ހުޅުވާލައިގެން އިންވެސްޓްމަންޓް ސްކީމެއް ތަޢާރަފްކޮށް އިންވެސްޓަރުންނަށް މަންފާ ލިބޭނެކަމަށް ދައްކައިގެން، މަކަރާ ޙީލަތުން ގިނަ ދިވެހި ރައްޔިތުންތަކެއްގެ އަތުން ފައިސާ ހޯދާ އެ ފައިސާ ލޯންޑަރކޮށްފައިވާ މައްސަލައިގައި، ދިވެހި ފުލުހުންގެ ޚިދުމަތުން ތަޙުޤީޤު ފުރިހަމަކޮށް ހުށަހަޅާފައިވާ ގެއްލުން ލިބުނު 13 (ތޭރަ) މީހުންނާ ގުޅިގެން، ދަޢުވާތައް ކުރުމަށް 23 ނޮވެންބަރު 2023 ދުވަހު ކްރިމިނަލް ކޯޓަށް ހުށަހަޅާފައިވެއެވެ.

Advertisement

މައްސަލައާ ގުޅިގެން މިހާތަނަށް ކޮށްފައިވަނީ އެކު ޖުމްލަ 39 (ތިރީސް ނުވައެއް) ދަޢުވާއެވެ.

މި ދަޢުވާތަކާ ގުޅިގެން ދަޢުވާލިބޭ މީހުންގެ ފަރާތުން މައްސަލަ މުރާޖަޢާކޮށްދިނުމަށް އެދި ހުށަހެޅުމުން މި އޮފީހުން މައްސަލަ މުރާޖަޢާކޮށް ބެލިއިރު މައްސަލައިގެ ތަޙްޤީޤު ކުރިއަށް ގެންގޮސްފައިވާ ގޮތާއި، ލިބިފައިވާ ހެކި ޤަރީނާއާއި، އިޖުރާއީ ގޮތުން އަމަލުކޮށްފައިވާ ގޮތާއި، ދަޢުވާލިބޭ މީހުންގެ ފަރާތުން މައްސަލަ މުރާޖަޢާކޮށްދިނުމަށް އެދި ހުށަހަޅުއްވާފައިވާ ކަންކަމަށް ރިޢާޔަތްކުރިއިރު، މި މައްސަލާގައި ހިމެނޭ ދަޢުވާތައް މުރާޖަޢާކޮށް، އެ ދަޢުވާތަކަށް ބަދަލެއް ގެންނަންޖެހޭފަދަ ސަބަބެއް ނުވަތަ ޙާލަތެއް އޮތްކަމަށް ނުފެންނަކަމަށް ޕްރޮސިކިއުޓަރ ޖެނެރަލް ވަނީ ނިންމަވާފައެވެ.

އެންމެ ފަހުން ކްރިމިނަލް ކޯޓުގައި (3 އޮކްޓޯބަރު 2024) ގައި ބޭއްވި މި މައްސަލައިގެ އަޑުއެހުމަށް ބަލާލާއިރު ދިފާއީ ވަކީލު ވިދާޅުވީ، މި މައްސަލައިގައި ދައުލަތުން އުފުލާފައިވާ ދައުވާގެ ނިންމުން ރިވިއުކޮށްދިނުމަށް ދިފާއުން އެދިފައިވާނެ ކަމަށާއި، އެހެންކަމުން ޝަރީއަތް މަޑުޖައްސާލުމަށް އެދޭ ކަމަށެވެ.

އަދި މިކަމުގައި މި ހިމެނެނީ މަދަނީ ހުސޫމާތްތަކެއް (ޑިސްޕިއުޓްތަކެއް) ކަމަށްވެސް ވަކީލު ވިދާޅުވިއެވެ.

އޭގެ އިތުރުން، ދައުވާލިބޭ 3 މީހުންގެ އެއް ހާޒިރެއްގައި ދައުވާ އިއްވުމުގެ ބައި ކުރިއަށް ގެންދިއުމަށް އެދޭކަމަށްވެސް އެ މީހުންގެ ވަކީލު ވިދާޅުވިއެވެ. ހަމައެއާއެކު، މި މައްސަލައިގައި ދެން ހިމެނޭ ވަކީލާއެކު ކުރިއަށްދާން ބޭނުންވާކަންވެސް ދިފާއުން ފާހަގަކޮށްފައިވެއެވެ.

މި މައްސަލައިގައި ދެން ހިމެނޭ ވަކީލު އާޒިމާ ޝަކޫރު ދިފާއީ ވަކީލެއްގެ ގޮތުގައި 09:53 ގައި ފޯމު ހުށަހަޅުއްވާފައިވީނަމަވެސް، ފޯމުގައި ސޮއި ކުރައްވާފައި ނުވާ ކަމަށް ގާޒީ ވިދާޅުވިއެވެ.

ޤަވާއިދުގައި ބަޔާންކޮށްފައިވަނީ މައްސަލަ ފެށުމުގެ 15 މިނެޓު ކުރިން ފޯމު ފުރިހަމަ ކުރުމަށްފަހު ހުށަހެޅުމަށެވެ. އެހެންކަމުން ދައުވާތައް ހުށަހެޅުން ކުރިއަށް ގެންދިއުމަށް ގާޒީ ދައުލަތަށް ދެންނެވިއެވެ.

އެހެންނަމަވެސް ދައުވާލިބޭ ފަރާތްތަކުން ވަނީ އެމީހުން މައްސަލަ ކުރިއަށް ގެންދަން ބޭނުންވަނީ އަޑުއެހުމަށް ހާޒިރުވި ވަކީލުގެ އިތުރުން، ވަކީލު އާޒިމާ ޝަކޫރާ އެކުގައި ކަމަށް ޝަރީއަތުގައި ބުނެފައެވެ.

އެހެންކަމުން ދިފާއުން އެދުނު ގޮތަށް ވަކީލުންނާއެކު ކުރިއަށް ދިއުމަށް ފުރުސަތު ދެއްވައި ގާޒީ ވަނީ މައްސަލަ އެހެން ދުވަހަކަށް ތާވަލު ކުރައްވާފައެވެ.

އޭގެ އިތުރުން، މައްސަލަ ރިވިއުކުރަން އެދިފައިވީނަމަވެސް ޝަރީއަތްތައް ކުރިއަށް ގެންދެވޭނެ ކަމަށް ގާޒީ ނިންމެވިއެވެ.