ޗެލްސީން ދަނީ ކުރިއެރުންތަކެއް ހޯދަމުން، އެކަން ދަމަހައްޓަން ޖެހޭ: މަރެސްކާ
މަރެސްކާ ބުނީ، ޗެލްސީގެ ކުޅުމާއި، އެ ޓީމުން ހޯދަމުން އަންނަ ނަތީޖާތަކަށް ބަލާއިރު، މިވަގުތު ޓީމު އޮތީ އުންމީދު ކުރި ވަރަށް ވުރެ ވެސް ރަނގަޅު ޙާލަތެއްގައި ކަމަށެވެ.
ޗެލްސީގެ ކޯޗު އެންޒޯ މަރެސްކާ
ޗެލްސީން ދަނީ ކުރިއެރުންތަކެއް ހޯދަމުން ކަމަށާއި، މިވަގުތު އެންމެ މުހިންމީ އެކަން ދަމަހައްޓައިގެން ކުރިއަށް ދާން މަސައްކަތް ކުރުން ކަމަށް އެ ޓީމުގެ ކޯޗު އެންޒޯ މަރެސްކާ ބުނެފި އެވެ.
އޭނާ މިހެން ބުނީ އިނގިރޭސި ޕްރިމިއަރ ލީގުގައި ޗެލްސީގެ އަމިއްލަ ދަނޑުގައި ފުލަމްއާ ދެކޮޅަށް ކުޅޭ މެޗުގެ ކުރިން ވާހަކަ ދައްކަމުންނެވެ. އެ މެޗާ ކުރިމަތިލާއިރު ޗެލްސީ މިވަގުތު އޮތީ ވެސް ވަރަށް ރަނގަޅު ފޯމެއްގަ އެވެ.
އެ މެޗުގެ ކުރިން ވާހަކަ ދައްކަމުން މަރެސްކާ ބުނީ، ޗެލްސީގެ ކުޅުމާއި، އެ ޓީމުން ހޯދަމުން އަންނަ ނަތީޖާތަކަށް ބަލާއިރު، މިވަގުތު ޓީމު އޮތީ އުންމީދު ކުރި ވަރަށް ވުރެ ވެސް ރަނގަޅު ޙާލަތެއްގައި ކަމަށެވެ. މަރެސްކާ ބުނީ އަބަދު ވެސް އޭނާ އެންމެ ބޮޑު ސަމާލުކަމެއް ދެނީ ކުޅުންތެރިންގެ ފެންވަރު ރަނގަޅުކޮށް، މެޗަކަށް ފަހު މެޗަކުން ޓީމު ރަނގަޅު ކުރެވޭނެ ގޮތްތަކެއް ބެލުމަށް ކަމަށެވެ.
ޗެލްސީ އޮތީ ލީގު ރޭހުގައި ޗެމްޕިއަންކަމަށް ވާދަކުރަމް ތައްޔާރަށް ނޫން ކަމަށް މީގެ ކުރިން އޭނާ ބުނެފައިވާ ވާހަކަ އަށް އިޝާރާތް ކުރަމުން މަރެސްކާ ބުނީ، އެހެން ބުނީ ކުޅުންތެރިން އަދި ކުލަބަށް ޕްރެޝަރެއް ކުރިމަތި ކުރުވުމުގެ މަޤުސަދުގައި ނޫން ކަމަށެވެ. މަރެސްކާ ބުނީ، އޭނާ އަށް ފެން ގޮތުގައި އެއީ ހަގީގަތް ކަމަށާއި، އެ ޒާތުގެ ޕްރެޝަރުތަކާ ވެސް ކުރިމަތިލާަން ޖެހޭނެ ކަމަށެވެ.
ޗެލްސީގެ އަމިއްލަ ދަނޑުގައި ފުލަމްއާ ދެކޮޅަށް އޮތް ރަނގަޅު ރެކޯޑުގެ ވާހަކަ ދައްކަމުން މަރެސްކާ ބުނީ، ފުޓުބޯޅަ އަކީ ކޮންމެ ވަގުތެއްގައި ވެސް ޙާލަތު ބަދަލުވެދާނެ ކުޅިވަރެއް ކަމަށެވެ. ލީގުގައި ޗެލްސީޏް ބްރެންޓްފޯޑާ ދެކޮޅަށް ކުޅުނު މެޗަށް އިޝާރާތް ކުރަމުން މަރެސްކާ ބުނީ، ކުރީގެ މެޗުތަކަށް ފޯކަސް ގެންދަން އޭނާ ބޭނުން ނުވާ ކަމަށެވެ. އޭނާ ބުނީ މެޗުގެ ނަތީޖާ އަކީ ކޮންޓްރޯލް ކުރެވޭނެ އެއްޗެއް ނޫން ކަމަށާއި، ނަމަވެސް ކުޅެން ބޭނުންވާ ވައްޓަފާޅި އަކީ ކޮންޓްރޯލް ކުރެވޭނެ އެއްޗެއް ކަމަށެވެ.
ފުލަމްއާ ދެކޮޅަށް ނިކުންނައިރު، ޗެލްސީ އޮތީ ލީގު ތާވަލްގެ ދެ ވަަނައިގަ އެވެ. އެއީ މިހާތަނަށް އެ ޓީމު ކުޅެފައިވާ 17 މެޗުން 35 ޕޮއިންޓާ އެކު އެވެ. ޗެލްސީ އަށް ވުރެ އެއް މެޗު މަދުން ކުޅެފައިވާ ލިވަޕޫލަށް އެއް ވަަނައިގައި ލިބެނީ 39 ޕޮއިންޓެވެ. މި ސީޒަނާ ދިމާކޮށް ޗެލްސީގެ ކޯޗުކަމާ ހަވާލުވި މަރެސްކާގެ އިރުޝާދުގެ ދަށުން އެ ޓީމުން އަންނަނީ ރަނގަޅު ނަތީޖާތަކެއް ނެރެމުންނެވެ.
