އެޗްޑީސީ ބޯޑު ޑިރެކްޓަރުންގެ ސަސްޕެންޝަން އުވާލައިފި
އެ ކުންފުނީގެ ޑިރެކްޓަރުންގެ ބޯޑުގެ މެންބަރުން ސަސްޕެންޑް ކުރުމަށް ނިންމި ނިންމުން ބަދަލުކޮށްފައިވަނީ އަންގާރަ ދުވަހު
އެޗްޑީސީ އޮފީސް އިމާރާތް
ކޮރަޕްޝަނާއި ހިޔާނާތުގެ ގިނަ މައްސަލަތަކެއް ދާދިފަހުން ފެންމަތިވި ހައުސިން ޑިވެލޮޕްމަންޓު ކޯޕަރޭޝަންގެ ޑިރެކްޓަރުންގެ ބޯޑުގައި ތިއްބެވި މެންބަރުންގެ ސަސްޕެންޝަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން މިއަދު އުވާލައިފި އެވެ.
ޕީސީބީން "އެކްސް" ގައި މިއަދު ކުރި ޕޯސްޓެއްގައި ބުނީ އެޗްޑީސީއަށް އާ މެނޭޖިން ޑިރެކްޓަރެއް އައްޔަންކޮށްފައި ވާތީ، އެ ކުންފުނީގެ ޑިރެކްޓަރުންގެ ބޯޑުގެ މެމްބަރުން ސަސްޕެންޑް ކުރުމަށް ނިންމި ނިންމުން މިއަދުން ފެށިގެން ނިމުމަކަށް ގެނެސްފައިވާ ކަމަށެވެ.
"ހައުސިންގ ޑިވެލޮޕްމަންޓް ކޯޕަރޭޝަންއަށް އައު މެނޭޖިންގ ޑިރެކްޓަރެއް އައްޔަންކޮށްފައިވާތީ، އެ ކުންފުނީގެ ޑިރެކްޓަރުންގެ ބޯޑުގެ މެންބަރުން ސަސްޕެންޑް ކުރުމަށް ނިންމި ނިންމުން މިއަދުން ފެށިގެން ނިމުމަކަށް ވަނީ ގެނެވިފައި" ޕީސީބީން ބުނެފައިވެ އެވެ.
އެ ކުންފުނީގެ ޗެއާމަން އަހުމަދު ނާސިފު ފިޔަވައި އެހެން ހުރިހާ ބޯޑު މެންބަރުން ސަސްޕެންޑު ކުރީ ޑިސެމްބަރު 19, ގަ އެވެ. އޭރު އެ ކުންފުންޏާ ގުޅޭ ގިނަ މައްސަލަތަކެއް ފެންމަތިވެ ގިނަ ބައެއްގެ ފާޑުކިޔުުން އެޗްޑީސީއަށް ދިޔައީ އަމާޒުވަމުންނެވެ.
އޭރު މެނޭޖިން ޑިރެކްޓަރަކަށް ހުންނެވި އިބްރާހިމް ފަޒުލް ރަޝީދު ވެސް ސަސްޕެންޑުކުރި އެވެ. މައްސަލަތަކުގެ ތަހުގީގު ކުރިއަށް ދަނިކޮށް އަމާޒުވި ތުހުމަތުތައް ދޮގު ކުރެއްވުމަށް ފަހު ފަޒުލް ވަނީ އިސްތިއުފާ ދީފަ އެވެ.
ފަޒުލްގެ ބަދަލުގައި އެޗްޑީސީގެ މެނޭޖިން ޑިރެކްޓަރުގެ މަގާމަށް ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ކޮންސްޓްރަކްޝަން މިނިސްޓަރުކަން ކުރެއްވި މައުރޫފް ޖަމީލު ވަނީ އައްޔަނުކޮށްފަ އެވެ.
