އެވަންޓަން އަތުން ޕޮއިންޓެއް ލިބުނު ނަމަވެސް، މަރެސްކާ ހުރީ ހިތްހަމަ ޖެހިފައި

އިނގިރޭސި ޕްރިމިއާ ލީގުގައި އެވަޓަންއާ ދެކޮޅަށް ކުޅުނު މެޗުން ޕޮއިންޓެއް ލިބުނު ނަމަވެސް، ނަތީޖާއާ މެދު ވަރަށް ހިތްހަމަ ޖެހިފައި ހުރި ކަމަށް ޗެލްސީގެ ކޯޗު އެންޒޯ މަރެސްކާ ބުނެފި އެވެ.

އެވަޓަންގެ ދަނޑުގައި އެ ޓީމާ ދެކޮޅަށް ކުޅުނު މެޗު ޗެލްސީން ނިންމާލަން ޖެހުނީ އެއްވަރުވެގެންނެވެ. އެ މެޗުގައި ޗެލްސީގެ ފަރާތުން ރަނގަޅު ކުޅުމެއް ފެނުނުއިރު، އެ ޓީމަށް ވަނީ ލަނޑު ޖަހާނެ ފުރުސަތުތަކެއް ވެސް ލިބިފަ އެވެ.

އެ މެޗަށްފަހު ވާހަކަ ދައްކަމުން މަރެސްކާ ބުނީ އޭނާ ހުރީ ހިތްހަމަ ޖެހިގެން ކަމަށާއި، ކުޅުންތެރިން ގާތު ވެސް އެ ވާހަކަ ބުނެފައިވާނެ ކަމަށެވެ. އެގޮތުން، އެވަޓަން މެޗުގެ ކުރިން، ލީގުގައި ބްރެންޓްފޯޑާ ދެކޮޅަށް ޗެލްސީން ކުޅުނު މެޗަށްވުރެ، އެވަޓަން މެޗާ މެދު މާ ބޮޑަށް ހިތްހަމަ ޖެހޭ ކަމަށް ވެސް މަރެސްކާ ވަނީ ބުނެފަ އެވެ. މަރެސްކާ ބުނީ އެވަޓަންގެ ދަނޑަކީ އުނދަގޫ ދަނޑެއް ކަމަށާއި، އެވަޓަން އަކީ އިދިކޮޅެއް ކުޅެން އުނދަގޫ ޓީމަކަށް ވާތީ، މެޗާ މެޗު ކޮންމެ ވެސް ވަރެއްގެ ކަންބޮޑުވުމެއްގައި އޭނާ އަށް ހުރެެވުނު ކަމަަށެވެ.

މީގެ އިތުރުން މަރެސްކާ ބުނީ އެވަޓަން ކޮޅަށް ލަނޑު ޖެހުމަކީ ވެސް އުނދަގޫ ކަމެއް ކަމަށާއި، އެ މެޗުގައި ވެސް ފެނިގެން ދިޔައީ އެކަން ކަމަށެވެ. ޚާއްސަކޮށް ޗެލްސީގެ ކުޅުންތެރިން ފުރުސަތުތަކެއް ތަނަވަސްކުރި ކަމަށާއި، ނަމަވެސް ލަނޑު ޖެހުމުގައި އުނދަގޫތަކާ ކުރިމަތިލާން ޖެހުނު ކަމަށް މަރެސްކާ ބުންޏެވެ. ޚާއްސަކޮށް އެވަޓަން އިން ވެސް ދިޔައީ އެމީހުންނަށް ލިބުނު ފުރުސަތުގައި ނުރައްކާ ކުރުމަށް މަސައްކަތް ކުރަމުން ކަމަށާއި، އެކަން ކާމިޔާބު ނުވީ ޗެލްސީގެ ކުޅުްންތެރިންގެ ފަރާތުން ފެނުނު ހުށިޔާރު ކަމަށާއި، މޮޅު ކުޅުމުގެ ސަބަބުން ކަމަށް މަރެސްކާ ވަނީ ބުނެފަ އެވެ.

މި ސީޒަނާ ދިމާކޮށް ޗެލްސީގެ ކޯޗުކަމާ ހަވާލުވީ މަރެސްކާގެ އިރުޝާދުގެ ދަށުން ލީގުގައި އެ ޓީމުން އަންނަނީ ރަނގަޅު ނަތީޖާތަކެއް ނެރެމުންނެވެ. ލީގުގައި އެންމެ ފަހުން ޗެލްސީ މެޗަކުން ބަލިވެފައި ވަނީ އޮކްޓޫބަރު މަހުގެ ތެރޭގަ އެވެ. ލިވަޕޫލާ ދެކޮޅަށް ކުޅުނު މެޗުން ބަލިވީ ފަހުން، އޭގެ ފަހުން އެއްވެސް މެޗަކުން އެ ޓީމު ބަލިވެފައެއް ނުވެ އެވެ. އޭގެ ފަހުން ކުޅުނު ނުވަ މެޗުގެ ތެރެއިން، ހަ މެޗުން ޗެލްސީ މޮޅުވެފައިވާއިރު، އަނެއް ތިން މެޗުން ވަނީ އެއްވަރުވެފަ އެވެ.

ލީގުގައި މިހާތަނަށް ކުޅުނު 17 މެޗުން 35 ޕޮއިންޓު ހޯދައިގެން ޗެލްސީ އޮތީ ދެ ވަނައިގަ އެވެ. ޗެލްސީ އަށް ވުރެ އެއް މެޗު މަދުން ކުޅެގެން، އެއް ވަނައިގައި ލިވަޕޫލަށް ލިބެނީ 39 ޕޮއިންޓެވެ. ލީގުގައި ދެން ޗެލްސީ އަށް އޮންނާނީ ޑިސެމްބަރު މަހުގެ 26 ވަނަ ދުވަހު އަމިއްލަ ދަނޑުގައި ފުލަމްއާ ދެކޮޅަށް ކުޅޭ މެޗެވެ.