ޒުހޫރުގެ ސިޓީ ނުލިބޭކަމަށް ރައީސް ވިދާޅުވެފައި ވަނިކޮށް، އެއީ ދޮގެއް ކަން ފަޅާއަރައިފި
ނޫސްވެރިންނާ ވާހަކަ ދައްކަވަމުން ޒުހޫރު ފޮނުވި ސިޓީއާ ގުޅޭ ގޮތުން ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ރައީސް ޑރ. މުއިއްޒު ވަނީ އެ ސިޓީ އެމަނިކުފާނަށް ނުލިބޭ ކަމަށް ވިދާޅުވެފަ އެވެ.
ޒުހޫރު، ރައީސް މުއިއްޒު އަދި ފަޒުލް ރަޝީދު
ހައުސިން ޑިވެެލޮޕްމަންޓް ކޯޕަރޭޝަން (އެޗްޑީސީ) ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދާ ގުޅޭ ގިނަ މައްސަލަތަކެއް ފާހަގަކޮށް އެ ކުންފުނީގެ ކުރީގެ ޗެއާމަން އަހުމަދު ޒުހޫރު ފޮނުވި ސިޓީ ނުލިބޭ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެފައިވާއިރު، އެ ސިޓީ ރައީސް އޮފީހުން ބަލައިގެންފައިވާ ކަން ކަށަވަރުވެއްޖެ އެވެ.
އެޗްޑީސީއާ ގުޅިގެން ފެންމަތިވެގެން އުޅޭ ބޮޑެތި ވައްކަމުގެ މައްސަލަތަކާ ގުޅިގެން ރައީސް އޮފީސް ބޭރުގައި ހުންނަވާ ނޫސްވެރިންނާ ވާހަކަ ދައްކަވަމުން ޒުހޫރު ފޮނުވި ސިޓީއާ ގުޅޭ ގޮތުން ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ރައީސް ޑރ. މުއިއްޒު ވަނީ އެ ސިޓީ އެމަނިކުފާނަށް ނުލިބޭ ކަމަށް ވިދާޅުވެފަ އެވެ.
ރައީސް ވިދާޅުވި ޒުހޫރު ސިޓީއެއް ފޮނުވިކަމަށް ބުނާ ވާހަކައެއް އަޑު އެއްސެވިން ކަމަށާއި ނަމަވެސް އެ ސިޓީ ނުލިބޭކަމަށް އެމަނިކުފާނު ވަނީ ވިދާޅުވެފައެވެ.
"އާދެ، އަޅުގަނޑު ވެސް ތި ވާހަކަ އަޑުއެހިން. އަޅުގަނޑަކަށް ނުލިބޭ އިނގޭތޯ އެ ސިޓީއެއް. އަޅުގަނޑަށް ތި ވިދާޅުވާ ސިޓީއެއް އައިސްފައެއް ނެތް، ނުލިބޭ. އަޅުގަނޑަށް ލިބުނު ނަމަ އަޅުގަނޑު އެއަށް އަމަލުކުރާނަން،" ނޫސްވެރިޔާގެ ސުވާލަށް ޖަވާބުދެއްވަމުން ރައީސް ވިދާޅުވި އެވެ.
ރައީސް މިހެން ވިދާޅުވި ނަމަވެސް އެ ސިޓީ ރައީސް އޮފީހުން ބަލައިގެންފައިވާ ކަމުގެ ލިޔުމުގެ ކޮޕީއެއް ރާއްޖޭގެ އޮންލައިން ނޫހެއް ކަމުގައިވާ "އަދަދު" ނޫހަށް ވަނީ ލިބިފައިވެ އެވެ. އަދި އަދަދު ނޫޙުން ވަނީ އެ ލިޔުން ލިބިފައިވާކަން ހާމަވެސް ކޮއްފައެވެ. ރައީސް އޮފީހުގެ ރަސްމީ ތަތްގަނޑު ޖަހާފައި އޮތް އެ ލިޔުމުގައި އޮތީ އެ ސީޓީ ގެނައި މީހަކީ ވެސް ޒުހޫރު ކަމަށެވެ. އަދި އިތުރު ތަފްސީލަށް ބަލާއިރު، އެ ސިޓީ ރައީސް އޮފީހުން ބަލައިގަތް ތާރީހަކީ ޖުލައި 1، ކަމަށް ލިޔުމުގައި ވެއެވެ. އަދި އެ އޮފީހުން އެ ސިޓީއާ ހަވާލުވީ މުވައްޒަފު ކަމަށް އޮތީ އައިމިނަތު ނަފްޝާ، ކިޔާ މީހެކެވެ.
ރައީސްއަށް އެޑްރެސްކޮށް ފޮނުވި ސިޓީއެއް ރައީސް އޮފީހުން ސިޓީ ބަލައިގަތުމަށް ފަހު، ސިޓީ ލިބުނުކަމަށް ތައްގަނޑު ޖަހާފައިވާއިރު، އެ ސިޓީ ރައީސްގެ މޭޒުކޮޅާ ހަމައަށް ނުދިޔަ ސަބަބަބާއި މެދު ވަނީ ސުވާލު އުފެދިފައެވެ. ރައީސް އެ ވިދާޅުވާ ގޮތަށް ސިޓީ އެމަނިކުފާނާއި ހަމައަށް ނުދާނަމަ އެއީ ކަނޑައެޅިފައި އޮންނަ އުސޫލުތަކާ ހަމަތަކާ ހިލާފަށް ހިނގާފައިވާ ކަމެކެވެ.
ޒުހޫރުގެ މި ސިޓީގެ މައްސަލަ ބޮޑުވީ، އެޗްޑީސީގައި ހުރި މައްސަލަތައް ރައީސްގެ ސަމާލުކަމަށް މީގެ ފަސް މަސް ކުރިން ގެނައި ނަމަވެސް އެ މައްސަލަތައް ނުބަލައި ވަނިކޮށް، ސޯޝަލް މީޑިއާގައި މިކަންތައް ފަޅާއެރުމާއި ހަމައަށް، ފަޒުލްއަށް އެއްވެސް ފިޔަވަަޅެއް އަޅާފައި ނުވާތީ އެވެ. ކަން މިހެން ހުރިއިރު، އިދިކޮޅާއީ އާންމުންގެ ގިނަ ބަޔަކު ތުހުމަތުކުރަނީ ރައީސް މުއިއްޒު ވެސް މި ކަމުގެ ފުރިހަމަ ޒިންމާ ނަގަން ޖެހޭނެ ކަަމަށެވެ.
މި ތުހުމަތުތަކުން ބަރީއަވަމުން ރައީސް ވިދާޅުވީ، މިވަރުގެ ކަމެއް ހިނގާކަން ކުރިން އެނގިފައި އޮތް ނަމަ އެމަނިކުފާނު ވައުދުވެފައިވާ ގޮތަށް ފިޔަވަޅު އެޅީސް ކަމަށާއި ކޮރަޕްޝަނުގެ އަމަލުތަކާއި ގަވާއިދު ހިލާފަށް ހިނގާ ކަންކަން ހުއްޓުވުމަށް ފަހަތަަކަށް ނުޖެހޭނެ ކަަމަށެވެ.
އެޗްޑީސީއާ ގުޅޭ ބޮޑެތި ގިނަ މައްސަލަތަކެއް ފަޅާއަރަން ފެށުމުން ބިންވެރިޔާ ސްކީމުން ގޯތި ނުލިބޭ ބަޔަކަށް ގޯތި ދޭން އުޅުނު މައްސަލައިގައި ސަސްޕެންޝަނުގައި ހުރި ފަޒުލް ވަނީ އިއްޔެ މަގާމުން އިސްތިއުފާދެއްވާފަ އެވެ. މި މައްސަލައާ ގުޅިގެން އެޗްޑީސީގެ އިތުރު މުވައްޒަފުންތަކެއް ސަސްޕެންޑު ކޮށްފައި ވެއެވެ.
