ކޮރަޕްޝަންގެ ޢަމަލެއް ހުއްޓުވުމަށް ފަހަތަކަށް ނުޖެހޭނަން: ރައީސް
22 ޑިސެމްބަރު 2024 | އާދީއްތަ 12:05
އޮމަދޫ ބަނދަރުގެ މަޝްރޫއާއެކު، ރަށްގިރުމުގެ މައްސަލައަށް ހައްލު ހޯދައިދޭނަން: ރައީސް މުއިއްޒު
ކޮރަޕްޝަންގެ ޢަމަލެއް ނުވަތަ ޤަވާއިދާއި ޚިލާފަށް ކުރާ ކަމެއް ހުއްޓުވުމަށް ފަހަތަކަށް ނުޖެހޭނެކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، ރާއްޖޭގެ ބައެއް މީޑިއާތަކަށް ދެއްވި އިންޓަރވިއުއެއްގައެވެ.
އެޗްޑީސީގައި ކޮރަޕްޝަނަށް މަގުފަހިވާ ގިނަ ކަންތައްތަކެއް އެކުންފުނީގެ މެނޭޖިންގ ޑިރެކްޓަރުގެ މަގާމުގައި ކުރިން ހުންނެވި އިބްރާހީމް ފަޒުލް ރަޝީދާއި، ބައެއް އިސްވެރިން ހިންގާކަމަށް ، އެޗްޑީސީގެ ޗެއަރމަނަކަށް މިސަރުކާރުން އެންމެ ފުރަތަމަ އައްޔަންކުރެއްވި އަޙްމަދު ޒުހޫރު ވަނީ ތުހުމަތުކުރައްވާފައެވެ. އަދި އެ ތުހުމަތުތައް ބަޔާންކުރާ ސިޓީއެއް ރައީސުލްޖުމްހޫރިއްޔާއަށް ފޮނުއްވެވިކަމަށް ބުނާ ވާހަކަތަކެއް ސޯސަލް މީޑިއާގައި ވަނީ ދައުރުވެފައެވެ.
ޒުހޫރުގެ އެ ތުހުމަތުތަކާއި، އެޗްޑީސީއަށް އަމާޒުވެފައިވާ ކޮރަޕްޝަންގެ މައްސަލައާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ބައެއް މީޑިއާތަކަށް ދެއްވި އިންޓަރވިއުއެއްގައި ރައީސް ޑރ. މުޢިއްޒު ވިދާޅުވީ، އެޗްޑީސީގެ ކުރީގެ ޗެއަރމަން ޒުހޫރުގެ ސިޓީއެއް އެމަނިކުފާނަށް ލިބިވަޑައި ނުގަންނަވާކަމަށާއި އެފަދަ ސިޓީއެއް ލިބިވަޑައިގެންނެވިނަމަ ވަގުތުން ފިޔަވަޅު އަޅުއްވަން ފަސްޖެހިވަޑައިނުގަންނަވާނެކަމަށެވެ.
ރައީސް ވިދާޅުވި ކޮރަޕްޝަންގެ ޢަމަލެއް ނުވަތަ ޤަވާއިދާއި ޚިލާފަށް ކުރާ ކަމެއް ހުއްޓުވުމަށް ފަހަތަކަށް ނުޖެހޭނެކަމަށާއި މިއަދާ ހަމައަށްވެސް ހުންނާނީ އެކި ކަންކަމުގައި މަޢުލޫމާތު ލިބުނީމަ އެކަމަކަށް ފިޔަވަޅު އަޅަން ދަންނަވާފައި ކަމަށެވެ.
ރައީސް ވިދާޅުވީ އެމަނިކުފާނު ބޭނުންވަނީ މި ސަރުކާރަކީ ކޮރަޕްޝަނާއި ނުގަވާއިދުން ހިންގާ ކަންކަމާ ދުރުވެފައި އޮންނަ ސަރުކާރަކަށް ހަދަންކަމަށާއި އެއީ މި ސަރުކާރުގެ ވައުދު ކަމަށެވެ. އަދި ސިޓީއެއް ލިބި އެއައަށް ޢަމަލު ނުކޮށް އޮތްވާހަކައަކީ ހަގީގަތާއި ޚިލާފު ވާހަކައެއް ކަމަށާއި ކަންކަން އެނގުނު ހިސާބުން ލަސްނުވެ ފިޔަވަޅު އަޅާފައިވާކަމަށް ވެސް ރައީސް ވިދާޅުވިއެވެ.
އެޗްޑީސީގައި ހިންގިކަމަށް ތުހުމަތުކުރެވޭ ކޮރަޕްޝަންގެ މައްސަލައާއި ގުޅިގެން ބައެއް މުވައްޒަފުން މިއަދު އެކުންފުނިން ވަކިކޮށްފައިވާކަން ފާހަގަކުރައްވާ ރައީސް ވިދާޅުވީ، އެފަދަ ޢަމަލުތައް ހިންގަން އެއްވެސް މުޢައްސަސާއަކާއި އެއްވެސް ކުންފުންޏެއްގައިވެސް ޖާގަ ނުދެއްވާނެ ކަމަށެވެ. އަދި އެޗްޑީސީއަށް އަލަށް އައްޔަންކުރެއްވި މުޙައްމަދު މަޢުރޫފް ޖަމީލަށް އިތުބާރުކުރައްވާކަމަށް ވެސް ރައީސް ވަނީ ވިދާޅުވެފައެވެ.
ރައީސް ވިދާޅުވީ، ހުރިހާ ފަރާތްތަކެއްގެ އެއްބާރުލުން ލިބިގެން ނޫނީ ކަންކަން ރަނގަޅު ނުކުރެވޭނޭ ކަމަށާއި އެންމެންގެ އެއްބާރުލުން ލިބިއްޖެ ނަމަ ކަންކަން ރަނގަޅު ކުރެވޭނެކަމުގެ ޔަޤީންކަން އެމަނިކުފާނަށް އެބައޮތް ކަމަށެވެ.
