ތިން މިނިސްޓްރީއަކާއި މާލެ ސިޓީ ކައުންސިލްގެ އިދާރާގެ ބައެއްގައި ރޯވި އަލިފާނުގެ ހާދިސާ އާއި ގުޅޭ ގޮތުން ހިންގާ ތަހުގީގަށް އިންޑިއާގެ ތަޖުރިބާކާރުންގެ ޓީމަކުން އެހީތެރިވާކަން ފުލުހުން ހާމަކުރީ ހުކުރު ދުވަހުއެވެ. އެގޮތުން ކޮމިޝަަނަރ އޮފް ޕޮލިސް ޢަލީ ޝުޖާޢު މީޑިއާތަކަށް ފޮނުއްވި މެސެޖެއްގައި ވިދާޅުވީ މި މަހުގެ 12 ވަނަ ދުވަހު މ. ގްރީން ބިލްޑިންގގައި ހިނގި އަލިފާނުގެ ހާދިސާއާ ގުޅިގެން ކުރެވެމުންދާ ތަހުގީގުގައި، އިންޑިއާގެ ތަޖުރިބާކާރުންގެ ހާއްސަ ޓީމެއް މިހާރު ދަނީ ދިވެހި ފުލުހުންނާއެކު ހަރަކާތްތެރިވަމުންދާ ކަމަށެވެ.

ފުލުހުން ދޭ ޔަޤީންކަމަކީ މިފަދަ ބޮޑު ހާދިސާއެއްގެ ތަހުގީގު ފުލުހުން ފުރިހަމައަށް ކުރިއަށް ގެންދާނެ ކަމުގެ ޔަޤީންކަމެވެ. ރާއްޖެއިން ބޭރުގެ ޓީމެއްގެ އެހީތެރިކަމާއި އެކު ތަހުގީގުކުރުމުގެ ބޭނުމަކީ ވެސް އިތުބާރު ދެމެހެއްޓުންކަމަށް ބެލެވެއެވެ. މީގެ އިތުރުން ސީޕީ ވަނީ ރައްޔިތުންނާއި ހަމައަށް އެކަމާއި ގުޅޭ ފުރިހަމަ މައުލޫމާތު ހިއްސާ ކުރައްވާނެކަމަށް ފާހަގަކުރައްވާފައެވެ.

މީގެ ހަފްތާއެއްހާ ދުވަސްކުރިން އަލިފާނުގެ ހާދިސާ ހިނގި ސަރަހައްދު ފުލުހުންނާއި ވަނީ ހަވާލުކޮށްފައެވެ. އެއާއި އެކު ފުލުހުންގެ ފޮރެންސިކް ޓީމުތަކުން އެ ސަރަހައްދުގައި މަސައްކަތް ކުރަމުންދާ ކަމަށާއި ސީސީޓީވީ ފުޓޭޖްތައް ބެލުމުގެ މަސައްކަތް ވެސް ކުރަމުންދާ ކަމަށް އޭރު ސީޕީ ވަނީ ހާމަކުރައްވާފައެވެ.

ކޮންމެއަކަސް، ހައުސިން މިނިސްޓްރީ ހިންގަމުން އައި އިމާރާތުގައި ރޯވި އަލިފާން ކޮންޓްރޯލް ނުކުރެވި އެ ބްލޮކްގައި ހުންނަ ކޮންސްޓްރަކްޝަން މިނިސްޓްރީއާއި، އެންވަޔަރަމަންޓް މިނިސްޓްރީގެ އިތުރުން އެންވަޔަރަމަންޓަލް ޕްރޮޓެކްޝަން އެޖެންސީ އަދި މާލެ ސިޓީ ކައުންސިލްގެ ވައިޓަލް އައި ލޭންޑް ސެކްޝަން ވަނީ ބޭނުން ނުކުރެވޭ ވަރަށް ހަލާކުވެފައެވެ.

އަދި މި ހާދިސާ ތަހުގީގުކުރަމުން އަންނަ އިރު، ބޭރުން ތަހުގީގު ޓީމެއް ގެނެސްގެން އެ ހާދިސާ ތަހުގީކުރަން ފެށުމުގެ މާ ކުރިން އަލިފާން ރޯވި އިމާރާތް ތަޅާ އެތަން ސާފުކުރުމުގެ މަސައްކަތް ވަނީ ފަށާފައެވެ. އަލިފާނުގެ ހާދިސާއާއި ގުޅިގެން އެތަކެއް ސުވާލުތަކެއް އުފެދިފައިވާއިރު، މިއީ ބަޔަކު ގަސްދުގައި ކުރިކަމެއް ކަމަށް ވެސް ތުހުމަތުކުރާ ބަޔަކު އެބަތިއްބެވެ. ނަމަވެސް މިކަމާއި ގުޅޭ ސާފު މައުލޫމާތެއް މިހާތަނަށް ހާމަކޮށްފައިނުވުމުން މި ފަދަ ނަޒަރިއްޔާތުތަކަށް އިތުރު ފުރުސަތުތަކެއް ލިބެއެވެ.

އެކަން އެހެން ނުވާންވީ ސަބަބެއް ވެސް ނެތެވެ. ހައުސިން މިނިސްޓްރީގައި ރޯވިތާ މާ ގިނަ ދުވަހެއް ނުވެ ގޯއްޗާއި ގުޅޭ ޚިޔާނާތުގެ ބޮޑެތި މައްސަލަތައް ފުލު ފުލުހުގައި އެހެރަ ފަޅާއަރަނީއެވެ. އެކަމުގައި ހައުސިން މިނިސްޓްރީގެ ދައުރެއް އޮތްކަމަށް ސުވާލު އުފެދޭނެ އެތައް ހާލަތެއް އެބަ ހުއްޓެވެ. އެހެންވީމަ އަވަސް އަވަހަށް އަލިފާން ރޯވިތަން ތަޅާ ސާފުކުރުމުން އެކަމާއި އާއްމުން ދަނީ ސުވާލުކުރަމުންނެވެ. ޚާއްސަކޮށް އެކަން ކުރަނީ ނުރައްކަލެއް އޮވެގެން ކަމަށް ވާނަމަ އެކަން ވެސް ހާމަކުރައްވަަންވާނެ ނޫންތޯއެވެ.

މީގެ ކުރިން ވެސް ރާއްޖެއިން ބޭރުން މީހުން އައިސްގެން ތަހުގީގުތައް ހިންގާ އިރު ދިމާވާ އެންމެ ބޮޑު މައްސަލައަކީ މި ދެންނެވި ފަދައިން ސީން އޭގެ ޒާތުގައި ފެންނަން ނެތުމެވެ. ފަހުން ބޭރުން އަންނަ ޓީމު ތަހުގީގު ހިންގަނީ ކުރިން ހަޑި ހާވާނެ ވަރަކަށް ހާވަ ނިންމާފައި އޮތް ތަހުގީގާއި އެއިން އެނގޭ ކަންކަމަށެވެ. ދިވެހިން ތިބީ މިފަހަރު އެހެން ނުވާނެކަމުގެ އުންމީދުގައެވެ. އެހެނީ ހައުސިންގެ ކަންކަމަކީ ދިވެހިންގެ ޖަޒުބާތާއި ވަރަށް ބޮޑަށް ގުޅިފައިވާ ކަމަކަށް ވުމުންނެވެ.