މާދަމާ ހައުސިން މިނިސްޓްރީގެ ޚިދުމަތްތައް ދަރުބާރުގޭގައި އާއްމުންނަށް ދެވޭނެ: މިނިސްޓަރު ހައިދަރު
މުވައްޒަފުންނަށް މަސައްކަތް ކުރެވޭނެ މާހައުލެއް ގާއިމް ކުރާނެ
ހައުސިން މިނިސްޓަރު ޑރ.އަލީ ހައިދަރު
އަންނަ އާދިއްތަ ދުވަހު ހައުސިން މިނިސްޓްރީގެ ޚިދުމަތްތައް ދަރުބާރުގޭގައި އާއްމުންނަށް ދެވޭނެ ކަމަށް ހައުސިން މިނިސްޓަރު ޑރ.އަލީ ހައިދަރު ވިދާޅުވެއްޖެއެވެ.
ރާއްޖެއެމްވީއަށް މިނިސްޓަރު ހައިދަރު ވިދާޅުވީ އަލިފާނުގެ ހާދިސާއާ ގުޅިގެން ބޮޑެތި ގެއްލުންތަކެއް މިނިސްޓްރީވެފައިވާ ކަމަށެވެ. ނަމަވެސް ރައްޔިތުންނަށް ޚިދުމަތް ދިނުމަށް ދަރުބާރުގޭގައި މިހާރު ސެޓަޕްތައް ޖެހުމުގެ މަސައްކަތްތައް ބާރު ސްޕީޑްގައި ކުރިއަށްދާ ކަމަށާއި، މުވައްޒަފުންނަށް މަސައްކަތް ކުރެވޭނެ މާހައުލެއް ގާއިމް ކުރަމުންދާ ކަމަށެވެ.
އެގޮތުން 15 ޑިސެންބަރު 2024 ވާ އާދިއްތަ ދުވަހު އާއްމު ރައްޔިތުންނަށް ޚިދުމަތް ދެވޭނެ ކަމަށާއި، އެއަމާޒަށް ވާސިލްވެވޭނެ ކަމަށް އުންމީދު ކުރާ ކަމަށް މިނިސްޓަރު ހައިދަރު ވިދާޅުވިއެވެ. އަދި ވިދާޅުވީ ވަރަށް ގިނަ ބައެއްގެ އެއްބާރުލުން ލިބޭ ކަމަށާއި، މިހާރު ބޮޑު ބައެއްގެ މަސައްކަތް ނިމިފައިވާ ކަމަށެވެ.
މީގެ އިތުރުން މިނިސްޓަރު ހައިދަރު ވިދާޅުވީ މި އަލިފާނުގެ ހާދިސާ ގުޅިގެން ކުރިއަށް ގެންދާ ތަހުގީގު ކަމާގުޅުންހުރި އިދާރާތަކުން ކުރިއަށް ގެންދާ ކަމަށެވެ.
އާދިއްތަ ދުވަހު ހައުސިން މިނިސްޓްރީގެ ޚިދުމަތްތައް ދަރުބާރުގޭގައި އާއްމުންނަށް ދެވޭނެ މިނިސްޓަރު ހައިދަރު ވިދާޅުވެފައިވާއިރު، ހުކުރު ދުވަހުގެ ރޭ ދަރުބާރުގޭގައި މަސައްކަތްތައް ކުރިއަށް ގެންދާގޮތް ބައްލަވާލެއްވުމަށް އެސަރަހައްދަށް ރައީސް ޑރ.މުހައްމަދު މުއިއްޒު ވެސް ވަޑައިގެންނެވިއެވެ.
އަލިފާނުގެ ހާދިސާއާ ގުޅިގެން ރައްޔިތުންނަށް ޚިދުމަތް ދެމުންދާ 5 އޮފީހެއްގެ މަސައްކަތް ވަނީ ހުއްޓިފައެވެ.
12 ޑިސެންބަރު 2024 ވީ ބުރާސްފަތި ދުވަހުގެ ހެނދުނު ހިނގި އަލިފާނުގެ ހާދިސާއާ ގުޅިގެން ހައުސިންގ، ލޭންޑް އެންޑް އަރބަން ޑިވެލޮޕްމަންޓް މިނިސްޓްރީ، ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓްރީ އަދި ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ މިނިސްޓްރީގެ މަސައްކަތްތައް ވަނީ ހުއްޓިފައެވެ. އެ މިނިސްޓްރީތައް ހިންގަމުންދިޔަ އިމާރާތް ވަނީ ބޭނުންނުކުރެވޭ ވަރަށް އަނދާފައެވެ. މީގެ އިތުރުން އެ އިމާރާތުގައި ޚިދުމަތް ދެމުންއައި މާލެސިޓީ ކައުންސިލްގެ ސެކްޝަން ވަނީ ހުޅުމާލެއަށް ބަދަލުކޮށްފައެވެ. އަދި އީޕީއޭގެ މަސައްކަތްތައް ކުރިއަށް ގެންދަން ނިންމާފައިވަނީ އެންވަޔަރަންމަންޓް މިނިސްޓްރީގެ ދަށުންނެވެ.
ހައުސިން މިނިސްޓްރީ ހިންގާ އިމާރާތުގައި އަލިފާން ރޯވެފައިވާ ކަމުގެ ރިޕޯޓުކޮށްފައިވަނީ ގާތްގަނޑަކަށް 6:30 ހާއިރެއެވެ. ޓިނުން ހަދާފައިވާ އެއިމާރާތުގެ އަލިފާންގަނޑު ބޮޑުވެ، މުޅި ބްލޮކަށް އަލިފާންގަނޑު ފެތުރިގެންދިޔައެވެ. އެއާއެކު ޖެހިގެން އިން އެންވަޔަރަމެންޓް މިނިސްޓްރީ ހިންގަމުން އަންނަ "ގްރީން ބިލްޑިންގ" ގައި އަލިފާން ރޯވެ އެ އިމާރާތަށް ވެސް ވަނީ ބޮޑެތި ގެއްލުންތަކެއް ލިބިފައެވެ.
އަލިފާނުގެ ހާދިސާއާ ގުޅިގެން އަމީނީ މަހުގެ އެހިސާބު ބަންދުކޮށްފައިވާއިރު، ހޮނިހިރު ދުވަހު މިނިސްޓްރީ އޮފް ސިޓީސް ލޯކަލް ގަވަރމެންޓް އެންޑް ޕަބްލިކް ވޯކްސްގެ ފަރާތުން އެ ބިން ސާފު ކުރުމުގެ މަސައްކަތް ވަނީ ފަށާފައެވެ. އަދި މިހާރު ބަންދުކުކޮށްފައިވާ އަމީނީ މަގުގައި ބަންދުކޮށްފައިވާ ސަރަހައްދު އާދިއްތަ ދުވަހު ހުޅުވާލެވޭނެ ކަމަށް ލަފާކުރެވޭކަމަށް މިނިސްޓަރު އާދަމް ޝަރީފް އުމަރު ވިދާޅުވެފައިވެއެވެ.
މިހާތަނަށް އައިރު އަލިފާން ރޯވާން މެދުވެރި ސަބަބެއް ކަމާގުޅުންހުރި އެއްވެސް އިދާރާއަކުން ހާމަކޮށްފައިނުވެއެވެ.
