ހައުސިންގ މިނިސްޓްރީ އިމާރާތުގެ ބޮޑު ބައެއް ވެއްޓިއްޖެ
އެއްވެސް މީހަކަށް މާ ބޮޑު އަނިޔާއެއްވިކަމުގެ މައުލޫމާތެއް ނުލިބޭ
ހައުސިން މިނިސްޓްރީ އިމާރާތުގައި ރޯވެ އަނދަނީ
އަލިފާނުގެ ހާދިސާއެކު، ހައުސިން އަދި އިންފްރާސްޓްރަކްޗާ މިނިސްޓްރީ ހިންގާ އިމާރާތުގެ ޓިނުން ހަދާފައި ހުރި އިމާރާތް އެއްކޮށް ވެއްޓިއްޖެއެވެ.
މި އަލިފާނުގެ ހާދިސާއާ ގުޅިގެން ދައުލަތުގެ މީޑީއާއަށް ޑިފެންސް މިނިސްޓަރު ޣައްސާން މައުމޫން ވިދާޅުވީ އަލިފާނުގެ ހާދިސާ ހިނގައިގެން އުޅޭކަމުގެ މައުލޫމާތު ބުރާސްފަތި ދުވަހުގެ ހެނދުނު 6:30 ހާއިރު ލިބިފައިވާ ކަމަށާއި، އެވަގުތުން ފެށިގެން އެމްއެންޑީއެފްގެ ފަޔަރ ޓީމުން ހަރަކާތްތެރިވާން ފަށާފައިވާ ކަމަށެވެ.
ރާއްޖެއެމްވީއަށް ބައެއް ބެލެނިވެރިން ބުނީ ބުރާސްފަތި ދުވަހުގެ ހެނދުނު 6:45 ގައި އެސަރަހައްދުން ސްކޫލުގެ ކުދިން ގެންދިޔައިރު ވެސް އެއްޗެއް އަދާ ވަސް މުޅި ސަރަހައްދުގައި ހުރި ކަމަށެވެ. އަދި 7:10 ހާއިރު ހައުސިން އަދި އިންފްރާސްޓްރަކްޗާ މިނިސްޓްރީ ހިންގާ އިމާރާތުގެ 4 ވަނަ ފަންގިފިލާއިން އަލިފާންގަނޑު ބޭރަށް ފެންނަން ހުރި ކަމަށް ބައެއް މީހުން ބުނެފައިވެއެވެ. އަލިފާންގަނޑު ބޮޑުވެ، މުޅި ސަރަހައްދު ދުމުން ބޯވެގެންދިޔައީ ގާތްގަނޑަކަށް 7:45 ހާއިރު ކަމަށް މައުލޫމާތު ލިބެއެވެ. އަދި އެއިމާރާތުގައި ރޯވި އަލިފާންގަނޑު ކޮންޓްރޯލް ކުރެވިފައިވަނީ ގާތްގަނޑަކަށް 9:22 ހާއިރު އެވެ.
ހައުސިން އަދި އިންފްރާސްޓްރަކްޗާ މިނިސްޓްރީ ހިންގާ އިމާރާތުގެ އަލިފާންގަނޑު ކޮންޓްރޯލް ކުރެވުނު ނަމަވެސް ޓިނުން ހަދާފައި ހުރި އިމާރާތް އެއްކޮށް ވަނީ ވެއްޓިފައެވެ. އަދި އަނދަމުންދިޔައިރު، ބާރަށް އެއްޗެހިތަކެއް ގޮވައި، ބައެއް އެއްޗެހިތައް ބުރައިގެން ދިޔަ ކަމަށް މަންޒަރު ދުށް މީހުން ބުނެފައިވެއެވެ. އެ އިމާރާތުގެ ދުންގަނޑު މަޑުވިފަހުން އެ އިމާރާތާއި ޖެހިގެން ހުރި އެންވަޔަރަމެންޓް މިނިސްޓްރީ ހިންގަމުން އަންނަ "ގްރީން ބިލްޑިންގ" ގައި އަލިފާން ވަނީ ރޯވެފައެވެ. 9:24 ހާއިރު އެއިމާރާތުގައި ރޯވެފައިވާ އަލިފާންގަނޑު ބޮޑެވެ، އެސަރަހައްދު ވަނީ ދުމުން ބޯވެފައެވެ. އަދި ގްރީން ބިލްޑިންގ އެތެރެއިން ވެސް އެއްޗެހިތަކެއް ގޮވައި، އެއްޗެހިތަކެއް ބުރައިގެން ދިޔަ މަންޒަރު ފެނުނު ކަމަށް އެސަރަހައްދުގައި ހަރަކާތްތެރިވާ ރާއްޖެއެމްވީގެ ނޫސްވެރިޔާ ބުނެފައިވެއެވެ.
މި އަލިފާނުގެ ހާދިސާއާ ގުޅިގެން އެސަރަހައްދުގައި ދިރިއުޅޭ އާއްމު ރައްޔިތުންގެ ރައްކާތެރިކަމަށް އެސަރަހައްދުގައި ދިރިއުޅޭ މީހުން ގެތަކުން ވަނީ ހުސްކޮށްފައެވެ. އަދި ޓްރެފިކް ފްލޯއަށް ބަދަލު ގެނެސް އެސަރަހައްދު ވަނީ ބަންދުކޮށްފައެވެ.
