ހައުސިން މިނިސްޓްރީ އާއި އިންފްރާސްޓަރަކްޗާ މިނިސްޓްރީގައި ހިނގި އަލިފާނުގެ ހާދިސާއާ ގުޅިގެން ގެދޮރުވެރިޔާ ސްކީމާ ގުޅޭ އެއްވެސް މައުލޫމާތަކަށް އަސަރެއް ނުކުރާނެ ކަމަށް ހައުސިން މިނިސްޓްރީން ބުނެފިއެވެ.
އަލިފާނުގެ ހާދިސާ ހިނގުމާ ގުޅިގެން ހައުސިން މިނިސްޓްރީން ނެރުނު ބަޔާނުގައި ބުނީ، މިނިސްޓްރީގެ އިތުރުން، ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީ ހިންގަމުން އަންނަ އިމާރާތުގައި އަލިފާން ރޯވެފައިވާއިރު، މޯލްޑިވްސް ނޭޝަނަލް ޑިފެންސް ފޯސްގެ ފަޔާ އެންޑް ރެސްކިއު ޓީމުން އަލިފާން ނިންވުމުގެ މަސައްކަތް ކުރަމުންދާ ކަމަށެވެ.
މިހާދިސާގައި މިނިސްޓްރީގެ އެއްވެސް މުވައްޒަފަކަށް އަނިޔާއެއް ވެފައިނުވާ ކަމަށް ބަޔާނުގައި ބުނެފައިވެއެވެ.
މީގެ އިތުރުން މިނިސްޓްރީން ބުނީ މިހާދިސާއާ ގުޅިގެން މިނިސްޓްރީން ކުރަމުންގެންދާ ގެދޮރުވެރިޔާ ސްކީމާ ގުޅޭ ހުރިހާ މައުލޫމާތާއި، ލިޔުންތަކަކީ މިނިސްޓްރީގެ ކްލައުޑް ހޯސްޓިންގައި ޑިޖިޓަލްކޮށް ބަލަހައްޓާ މައުލޫމާތު ކަމަށެވެ. އަދި މިހާދިސާގެ ސަބަބުން އެ މައުލޫމާތުތަކަށް އެއްވެސް އަސަރެއް ނުކުރާނެ ކަމަށް މިނިސްޓްރީން ބުނެއެވެ.
ހައުސިން މިނިސްޓްރީން ބުނީ، މިހާދިސާއާ ގުޅިގެން ސަލާމަތާއި ރައްކާތެރިކަމަށްޓަކައި ކުރެވެންހުރި ކަންކަމާއި ގުޅޭގޮތުން ކަމާގުޅޭ ފަރާތްތަކާއި، މަޝްވަރާ ކުރަމުންދާ ކަމަށެވެ. އަދި މިކަމާއި ގުޅޭ އިތުރު ތަފްސީލުތައް އާއްމުންނާ ހިއްސާކުރަމުންދާނެ ކަމަށް މިނިސްޓްރީން ބުނެއެވެ.
ގެދޮރުވެރިޔާ ސްކީމާ ގުޅޭ އެއްވެސް މައުލޫމާތަކަށް އަސަރެއް ނުކުރާނެ ކަމަށް މިނިސްޓްރީން ބުނެފައިވަނީ އެމިނިސްޓްރީގައި ބުރާސްފަތި ދުވަހުގެ ހެނދުނު މިހިނގި އަލިފާނުގެ ހާދިސާއާ ގުޅިގެން ގެދޮރުވެރިޔާ ސްކީމްގެ ދަށުން ދޫކުރާ ފްލެޓު ލިސްޓާ ގުޅިގެން ގިނަ އަދަދެއްގެ އާއްމު ރައްޔިތުން ސުވާލު އުފައްދައި، ކަންބޮޑުވުންފާޅު ކުރަމުންދަނިކޮށްށެވެ. ފްލެޓު ލިސްޓް އާއްމުނުކޮށް، ދިގު ދައްމަމުންދާތީ، ގިނަ ބައެއްގެ ފާޑުކިޔުން މިނިސްޓްރީއަށް އަދި ހައުސިން މިނިސްޓަރު ޑރ.އަލީ ހައިދަރަށް ވަނީ އަމާޒުވެފައެވެ.
