އާޓެޓާ ބުނީ ފަސް އަހަރުގެ ތެރޭގައި ވަރަށް ބޮޑު ބަދަލެއް ގެނެވިއްޖެ ކަމަށް

އާސެނަލްގެ ކޯޗުކަމާ ހަވާލުވީ ފަހުން، މިވީ ފަސް އަހަރުގެ ތެރޭގައި ބޮޑު ބަދަލެއް ގެނެވިއްޖެ ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.

އާޓެޓާ މިހެން ބުނީ އިނގިރޭސި ޕްރިމިއާ ލީގުގައި އާސެނަލް އިން ކްރިސްޓަލް ޕެލަސްއާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގަ އެވެ. އާސެނަލްގެ ކޯޗުކަމާ އޭޓެޓާ ހަވާލުވީ 2019 ވަނަ އަހަރުގެ ޑިސެމްބަރު މަހުގެ 20 ވަނަ ދުވަހު އެވެ. ޕެލަސްގެ ދަނޑުގައި ހޮނިހިރު ދުވަހު އެ ޓީމާ ދެކޮޅަށް ނިކުންނައިރު، އާޓެޓާ ހުރީ އާސެނަލްގައި ކުރެވޭ މަސައްތަކާ މެދު ހިތްހަމަ ޖެހިފައި ކަމަށް ވެސް އޭނާ ވަނީ ބުނެފަ އެވެ.

އާޓެޓާ ބުނީ އޭނާ ދެކޭ ގޮތުގައި، ފަސް އަހަރުގެ ތެރޭގައި އާސެނަލަށް އައި އެންމެ ބޮޑު ބަދަލަކީ ޓީމުގެ ތެރޭގައި އޮންނަ ގުޅުން ވަރުގަދަ ވުމާއި، ކުޅުންތެރިންނަށް ލިބުނު އިތުބާރު ކަމަށެވެ. އަދި އާސެނަލަށް މިހާރު މަތީ ފަންތީގައި އަނެއްކާ ވެސް ވާދަކުރެވޭކަން ސާބިތުވަމުން އަންނަ ކަމަށާއި، ޓީމަށް ޕޮސިޓިވް ކަންތައްތަކެއް ލިބިފައިވާ ކަމަށް ވެސް އާޓެޓާ ބުންޏެވެ. އާސެނަލަށް މަތީ ފަންތީގައި ވާދަ ނުކުރެވި ދިޔަ ދުވަސްތައް މިހާރު ފަހަތަށް ގޮސްފައިވާ ކަމަށާއި، އަދި ވެސް ރަނގަޅު ކުރަން ޖެހޭ ގިނަ ކަންކަން ހުރި ކަމަށް އާޓެޓާ ވަނީ ފާހަގަ ކޮށްފަ އެވެ.

އެއް ޓީމަކާ ދެކޮޅަށް، އެއް ހަފުތާގެ ތެރޭގައި ކުޅެން ޖެހުމާ ގުޅޭ ގޮތުން ވާހަކަ ދައްކަމުން އާޓެޓާ ބުނީ، ތައްޔާރީތަކަށް ކޮންމެ ވެސް ވަރެއްގެ ތަފާތު ކަމެއް އަންނާނެ ކަމަށެވެ. ނަމަވެސް އެންމެ ފަހުން އެ ޓީމާ ދެކޮޅަށް ކުޅެފައި އޮތުމުން، އެ ޓީމުގެ ޙާލަތު ފަސޭހަ އިން ދެނެގަނެފައިވާ ކަމަށް އާޓެޓާ ބުންޏެވެ. އަދި އެއީ އާސެނަލްގެ އިތުރުން، ޕެލަސް އަށް ވެސް ލިބޭނެ ފައިދާއެއް ކަމަށް އާޓެޓާ ވަނީ ބުނެފަ އެވެ. އިތުރަށް އާޓެޓާ ބުނީ ޕެލަސްގެ ދަނޑުގައި ކުޅުމަކީ އުނދަގޫ ކަމެއް ކަމަށާއި، ކުރިން ވެސް އެކަން ފެނިފައިވާ ކަމަށެވެ.

އެންމެ ފަހުން ކަރަބޯ ކަޕްގެ ކުއާޓާ ފައިނަލްގައި ޕެލަސްއާ ދެކޮޅަށް ކުޅުނު މެޗުން މޮޅުވެ، އާސެނަލް އިން ވަނީ މުބާރާތުގެ ސެމީ ފައިނަލް އިން ޖާގަ ހޯދައިފަ އެވެ. ޕެލަސްގެ ދަނޑުގައި އާސެނަލް އިން އެ ޓީމާ ދެކޮޅަށް ނިކުންނާނީ ހޮނިހިރު ދުވަހުގެ ރޭ ރާއްޖެ ގަޑިން 22:30 ގައެވެ.