ރެއާލްގައި އަންޗެލޮޓީ އަށް ޚާއްސަ ޝަރަފެއް

ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ބޭއްވި، ފީފާ އިންޓަކޮންޓިނެންޓަލް ކަޕް ކާމިޔާބު ކުރުމާއެކު، ސްޕެއިންގެ ރެއާލް މެޑްރިޑަށް އިރުޝާދު ދެމުން އަންނަ އިޓަލީގެ ކާލޯ އަންޗެލޮޓީ އަށް އެ ކުލަބުގެ ޚާއްސަ ޝަރަފެއް ލިބިއްޖެ އެވެ.

ޤަތަރުގެ ވެރި ރަށް ދޯހާގައި ހުންނަ ލުސައިލް ސްޓޭޑިއަމްގައި ކުޅުނު ފައިނަލް މެޗު ކާމިޔާބުކޮށް، ރެއާލް އިން ވަނީ އިންޓަކޮންޓިނެންޓަލް ކަޕް ކާމިޔާބު ކޮށްފަ އެވެ. ރެއާލް އަކީ އެ މުބާރާތް ކާމިޔާބު ކުރި ފުރަތަމަ ކުލަބެވެ. އެއާއެކު، އުމުރުން 65 އަހަރުގެ އަންޗެލޮޓީ ވެގެން ގޮސްފައި ވަނީ ރެއާލްގެ ތާރީޚުގައި ވެސް އެންމެ ކާމިޔާބު ކޯޗަށެވެ. އޭނާ އަކީ ރެއާލާ އެކު އެންމެ ގިނަ ތަށި ކާމިޔާބު ކޮށްފައިވާ ކޯޗެވެ.

ދެ ވަނަ ފަހަރަށް ރެއާލާ ހަވާލުވެ، އެ ކުލަބަށް އިރުޝާދު ދެމުން އަންނަ އަންޗެލޮޓީ ވަނީ އެ ކުލަބާ އެކު މިހާތަނަށް ޖުމުލަ 15 ތައްޓެއް ކާމިޔާބު ކޮށްފަ އެވެ. އަންޗެލޮޓީ ފިޔަަވައި، ރެއާލާ އެކު އެންމެ ގިނަ ތަށި ކާމިޔާބު ކޮށްފައިވާ ކޯޗަކީ މިހުއެލް މުނޯޒް އެވެ. އޭނާ ވަނީ ރެއާލާ އެކު 14 ތައްޓެއް ކާމިޔާބު ކޮށްފަ އެވެ. މުނޯޒްގެ ރެކޯޑާ އަންޗެލޮޓީ ހަމަކުރީ އޯގަސްޓު މަހު އޮތް ޔުއެފާ ސުޕަ ކަޕް ރެއާލާ އެކު ކާމިޔާބު ކޮށްގެންނެވެ.

އެންމެ ފުރަތަމަ އަންޗެލޮޓީ ރެއާލަށް އިރުޝާދު ދިނީ 2013 ވަނަ އަހަރުން ފެށިގެން 2015 ވަނަ އަހަރެވެ. އެ މުއްދަތުގައި އޭނާ ވަނީ ރެއާލާ އެކު ހަތަރު ތައްޓެއް ކާމިޔާބު ކޮށްފަ އެވެ. އެއީ ކޮޕާ ޑެލް ރޭ، ޔުއެފާާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް އެވެ.

ދެ ވަނަ ފަހަރަށް އޭނާ ރެއާލާ ހަވާލުވީ 2021 ވަނަ އަހަރު އެވެ. އޭގެ ފަހުން މިހާތަނަށް ވަނީ އެ ކުލަބާ އެކު 11 ތައްޓެއް ކާމިޔާބު ކޮށްފަ އެވެ. އެއީ ސްޕެނިޝް ލީގު ދެ ފަހަރު، ކޮޕާ ޑެލް ރޭ އެއް ފަހަރު، ސްޕެނިޝް ސުޕަ ކަޕް ދެ ފަހަރު، ޔުއެފާ ޗެމްޕިއަންސް ލީގު ދެ ފަހަރު، ޔުއެފާ ސުޕަ ކަޕް ދެ ފަހަރު، ފީފާ ކުލަބު ވޯލްޑް ކަޕް އެއް ފަހަރު އަދި ފީފާ އިންޓަކޮންޓިނެންޓަލް ކަޕް އެއް ފަހަރު އެވެ.

ރެއާލްގެ އިތުރުން ޔުވެންޓަސް، އޭސީ މިލާން، ޗެލްސީ، ޕެރިސް ސެއިންޓް ޖާމަން (ޕީއެސްޖީ)، ބަޔާން މިއުނިކް، ނަޕޯލީ އަދި އެވަޓަން އަށް ވެސް އިރުޝާދު ދީފައިވާ އަންޗެލޮޓީ އަކީ މިވަގުތު ދުނިޔޭގައި ތިބި ކޯޗުންގެ ތެރެއިން އެންމެ މޮޅު އަދި އެންމެ މަޝްހޫރު އެއް ކޯޗެވެ.