ކުރިއަށް އޮތް މަސް ދުވަހުގެ ތެރޭގައި ފްލެޓާއި ގޯތި ދޫކުރަން ޖެހޭނެ، ދޫނުކުރާނަމަ ސީދާ ހަރަކާތަށް ނުކުންނާނަން: އެމްޑީޕީ
މިމައްސަލާގެ ފުރިހަމަ ޒިންމާ ރައީސް ޑރ. މުހައްމަދު މުއިއްޒު ނަންގަވަންޖެހޭ
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ޕްލޭނިންގ މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވާހަކަދައްކަވަނީ
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ދޫކޮށްފައިވާ ފްލެޓާއި، ގޯތިތައް ކުރިއަށް އޮތް މަސްދުވަހުގެ ތެރޭގައި ދޫކުރަންޖެހޭނެ ކަމަށާއި، ދޫނުކުރާނަމަ ސީދާ ހަރަކާތަށް ނުކުންނާނެ ކަމަށް ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)އިން ބުނެފިއެވެ.
ވަގު ލިޔުންތަކެއް ބޭނުންކޮށްގެން ހައުސިން ޑިވެލޮޕްމަންޓް ކޯޕްރޭޝަންގެ (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ އެއްބަޑު އެއްބަފާ ބޭބެއަށް ހުޅުމާލެ-ފޭސް2 އަކުން ގޯއްޗެއް ދޭން މަސައްކަތް ކުރި މައްސަލަ ފެންމަތިވެފައިވަނިކޮށް ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ޕްލޭނިންގ މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ މިމައްސަލާގެ ފުރިހަމަ ޒިންމާ ރައީސް ޑރ. މުހައްމަދު މުއިއްޒު ނަންގަވަންޖެހޭ ކަމަށެވެ.
މިސަރުކާރަށް އިޝާރާތް ކުރައްވައި އަކްރަމް ވިދާޅުވީ ސަރުކާރުގެ ނިންމުންތަކާއި، އަދިވެސް ގައުމުގައި ހިނގާކަންކަމާއި ގުޅިގެން ރައްޔިތުން ނުކުމެ މުޒާހަރާ ކުރަން ފެށުމުން ރައީސް މުއިއްޒު ކަންކަން ބަދަލުކުރައްވާ ކަމަށެވެ. ބުދަ ދުވަހުގެ ރޭ އާއްމު ރައްޔިތުންގެ އެއްވެ މުޒާހަރާ ކުރުމުން ބުރާސްފަތި ދުވަހު އެޗްޑީސީގެ އެމްޑީ ފަޒުލް ސަސްޕެންޑް ކުރިކަން އަކްރަމް ފާހަގަކުރެއްވިއެވެ.
އަކްރަމް ވިދާޅުވީ ކުރީ ސަރުކާރުގައި ދޫކޮށްފައިވާ ފްލެޓާއި، ގޯތިތައް ކުރިއަށް މަސްދުވަހުގެ ތެރޭގައި ދޫކުރަންޖެހޭނެ ކަމަށާއި، ދޫނުކުރާ ކަމަށްވާނަމަ އެމްޑީޕީން ސީދާ ހަރަކާތަށް ނުކުންނާނެ ކަމަށެވެ. އަދި އާއްމު ރައްޔިތުންގެ ހައްގުތައް ހޯދުމަށް މަގުމައްޗަށް ނުކުތުމަށް އަކްރަމް ވަނީ ގޮވާލައްވާފައެވެ.
އަކްރަމް ވިދާޅުވީ ވަގު ލިޔުންތަކެއް ބޭނުންކޮށްގެން ގޯއްޗެއް ހޯދަން އުޅުނު މައްސަލާގައި އަވަސް ފިޔަވަޅުތަކެއް އަޅަންޖެހޭ ކަމަށެވެ. ހައުސިން މިނިސްޓްރީއަށް ވެސް މިކަމުގެ ފުރިހަމަ މައުލޫމާތު އެނގޭނެ ކަމަށާއި، މިނިސްޓްރީއަށް ވެސް ފިޔަވަޅު އަޅަންޖެހޭ ކަމަށް އޭނާ ވިދާޅުވިއެވެ. ސަރުކާރުގެ ސަމާލުކަމަށް މިމައްސަލަ ޖުލައި މަހު އައިސްފައިވާއިރު، އެއްވެސް ފިޔަވަޅެއް އަޅާފައިނުވާތީ އެކަމަށް އަކްރަމް ވަނީ ފާޑު ވިދާޅުވެފައެވެ.
