ޓޫރިޒަމް ސްޓެޓިސްޓިކްސް ސަރވޭ 2024 ފަށައިފި
ރިސޯޓު ދާއިރާއިން ހަކަތަ ބޭނުންކުރާ މިންވަރުގެ މަޢުލޫމާތު އަހަރަކު އެއްފަހަރު އެއްކުރެވޭނެ
ޗައިނާ ފަތުރުވެރިންނަށް މަރުހަބާ ކިޔުން
ޓޫރިޒަމް ސްޓެޓިސްޓިކްސް ސަރވޭ 2024 ފަށައިފިއެވެ.
މިއަދު މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އާއި މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ ގުޅިގެން ބޭއްވި ރަސްމިއްޔާތެއްގައި ސަރވޭ ފަށައިދެއްވީ މިނިސްޓަރ އޮފް ސްޓޭޓް ފޮރ ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ ޑރ. މުޢާވިޔަތު މުޙައްމަދެވެ.
މި ރަސްމިއްޔާތުގައި ވާހަކަ ދައްކަވަމުން ޑރ. މުޢާވިޔަތު މުޙައްމަދު ވިދާޅުވީ، ދެމެހެއްޓެނިވި ގޮތެއްގައި ފަތުރުވެރިކަން ތަރައްޤީކުރުމަށާއި ޤައުމީ މޫސުމީ ލަނޑުދަނޑިތައް ހާސިލުކުރުމަށް ބޭނުންވާ ނިންމުންތައް ނިންމުމުގައި މި ސަރވޭގެ ނަތީޖާތަކަކީ ވަރަށް މުހިންމު ހެކިތަކެއް ކަމުގައެވެ. އަދި ފަތުރުވެރިކަމަކީ ދިވެހިރާއްޖޭގެ އިޤްތިޞާދުގެ މައިގަނޑު ދާއިރާއެއްކަން ފާހަގަކުރައްވައި، މި ސަރވޭއިން ލިބޭ މަޢުލޫމާތުގެ ސަބަބުން ސިޔާސަތުތައް އެކުލަވާލުމުގައި ބޭނުންކުރާ ތަފާސްހިސާބުތައް އިތުރަށް ހަރުދަނާވެގެންދާނެ ކަމަށް ވިދާޅުވިއެވެ.
މި ސަރވޭގައި އަލަށް ހިމަނާފައިވާ ބައިތަކުގެ ތެރޭގައި، ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ޔޫއެންއެފްސީސީސީ) އާއި ޕެރިސް އެގްރީމެންޓްގެ ދަށުން ހާމަކުރަންޖެހޭ މަޢުލޫމާތުތައް ހާމަކުރުމަށް ބޭނުންވާ މުހިންމު ހަކަތައިގެ މަޢުލޫމާތު ހޯދުމަށް ބޭނުންވާ ބައިތައް ހިމެނެއެވެ.
ސީބީއައިޓީ މޯލްޑިވްސް ޕްރޮޖެކްޓްގެ ދަށުން، 6 ނޮވެމްބަރ 2024 ގައި މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ އާއި ޔުޓިލިޓީ ރެގިއުލޭޓަރީ އޮތޯރިޓީ (ޔޫއާރުއޭ) އަދި މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އާ ދެމެދު ސޮއިކުރެވުނު އެއްބަސްވުމުގެ ދަށުން މި ސަރވޭއަށް ގެނެވުނު ބަދަލުތައް ގެނެވިފައިވެއެވެ. މި އެއްބަސްވުމުގެ މަޤްޞަދަކީ ގްރީންހައުސް ގޭސް (ޖީއެޗްޖީ) އުފެދޭ މިންވަރު ދެނެގަތުމަށް ބޭނުންވާ މަޢުލޫމާތު އެއްކުރުމުގެ ނިޒާމު ހަރުދަނާކޮށް، ޤައުމީ އަދި ބައިނަލްއަޤްވާމީ ފެންވަރުގައި ހުށަހަޅަންޖެހޭ ރިޕޯޓުތަކަށް ބޭނުންވާ ހަކަތައާ ގުޅޭ ތަފާސްހިސާބުތަކުގެ ޞައްޙަކަން އިތުރުކުރުމެވެ.
މި މަސައްކަތުގެ ބައެއްގެ ގޮތުން، ޓޫރިޒަމް ސްޓެޓިސްޓިކްސް ސަރވޭގެ ތެރެއިން ރިސޯޓު ދާއިރާއިން ހަކަތަ ބޭނުންކުރާ މިންވަރުގެ މަޢުލޫމާތު އަހަރަކު އެއްފަހަރު އެއްކުރެވޭނެއެވެ. މި ސަރވޭއިން ސީދާ އަމާޒުކުރެވިފައިވަނީ ދިވެހިރާއްޖޭގެ ފުރަތަމަ ބައެނިއަލް ޓްރާންސްޕޭރަންސީ ރިޕޯޓު (ބީޓީއާރު1) ގައި ފާހަގަކުރެވިފައިވާ މަޢުލޫމާތުގެ ހުސްކަންތައްތައް ފޫބެއްދުމަށެވެ. ޚާއްޞަކޮށް ފަތުރުވެރިކަމުގެ ދާއިރާއިން ހަކަތަ ބޭނުންކުރާ މިންވަރާއި އުފެދޭ ވިހަ ގޭސްތަކާ ގުޅޭ މަޢުލޫމާތު ހޯދުމަށެވެ.
ސީބީއައިޓީ މޯލްޑިވްސް ޕްރޮޖެކްޓަކީ ގްލޯބަލް އެންވަޔަރަންމަންޓް ފެސިލިޓީ (ޖީއީއެފް) ގެ ފަންޑިންގ އާއެކު، މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީއިން ހިންގާ މަޝްރޫޢެކެވެ. މި މަޝްރޫޢު ކުރިއަށް ގެންދިއުމުގައި ޔުނައިޓެޑް ނޭޝަންސް އެންވަޔަރަންމަންޓް ޕްރޮގްރާމް (ޔޫއެންއީޕީ) އިން ފަންނީ އެހީތެރިކަން ފޯރުކޮށްދެއެވެ.
މި ސަރވޭގެ ސަބަބުން ދިވެހިރާއްޖޭގެ ފަތުރުވެރިކަމުގެ ދާއިރާއިން ހަކަތަ ބޭނުންކުރާ މިންވަރާއި، އެ ދާއިރާއިން ތިމާވެށްޓަށް ކުރާ އަސަރުތައް ވަޒަންކުރުމަށް ބޭނުންވާ މުހިންމު މަޢުލޫމާތު ލިބި، ދެމެހެއްޓެނިވި ގޮތެއްގައި ފަތުރުވެރިކަން ތަރައްޤީކުރުމަށް އެޅޭނެ ފިޔަވަޅުތައް ދެނެގަތުމަށް މަގުފަހިވެގެންދާނެ ކަމަށް ބެލެވެއެވެ. އަދި މި ސަރވޭގެ ނަތީޖާތަކަކީ ޤައުމީ އަދި ބައިނަލްއަޤްވާމީ ފެންވަރުގައި މޫސުމަށް އަންނަ ބަދަލުތަކާ ގުޅޭގޮތުން ހުށަހަޅަންޖެހޭ ރިޕޯޓުތަކަށް ބޭނުންކުރެވޭނެ އިތުބާރުހުރި މަޢުލޫމާތުތަކެއް ކަމުގައިވެސް ވާނެއެވެ.
