"ތީ ބަހުލޫލެކޭ" ލަވަ ކީ ޔަޝްފާ "ކުށުގެ ތުހުމަތުގައި" ޕޮލިހަށް ހާޒިރު ވާން އަންގައިފި

ގާނޫނު އަސާސީގެ ދިފާއުގައި އެމްޑީޕީން ބޭއްވި ބޮޑު ޖަލްސާގައި "ތީ ބަހުލޫލެކޭ" ލަވަ ކީ ރ. ދުވާފަރު ކައުންސިލް މެންބަރު މަރިޔަމް ޔަޝްފާ ޕޮލިހަށް ހާޒިރު ވާން އަންގައިފި އެވެ.

ހޯމަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ކުރީގެ އެންބަވަޔަރަމަންޓް މިނިސްޓަރު އައިމިނަތު ޝައުނާ ވިދާޅުވީ ދުވާފަރު ކައުންސިލް މެންބަރު ޔަޝްފާ އަންގާރަ ދުވަހުގެ ހެނދުނު 10:30އަށް ފުލުހުންގެ އިދާރާއަށް ހާޒިރުވުމަށް އަންގައި ޗިޓް ފޮނުވާފައިވާ ކަމަށެވެ.

ޝައުނާ ވިދާޅުވީ ޔަޝްފާ ފުލުހުންގެ އިދާރާ ހާޒިރުވާއިރު، އޭނާއަށް ހިތްވަރު ދިނުމަށް ވީހާވެސް ގިނަ ބަޔަކު އެކަމުގައި ބައިވެރިވެ އެސަރަހައްދަށް އައުމަށް އެމްޑީޕީ އިން އެދޭ ކަމަށެވެ.

ޝައުނާ ވިދާޅުވީ މިސަރުކާރުގެ ފޯކަސް ހުރީ ރައްޔިތުންނަށް ބިރު ދެއްކުމަށް ކަމަށެވެ، ރައްޔިތުން ބޭނުންވާ ތަރައްގީ ގެނައުމަށް ނޫން ކަމަށެވެ.

10 ޑިސެމްބަރު 2024 ވަނަ ދުވަހުގެ ރޭ ކާނިވާ ސަރަހައްދުގައި އެމްޑީޕީން ބޭއްވި ޖަލްސާގައި ޔަޝްފާ ވަނީ ލަވައެއް ގޮތަށް "ތިއީ ބަހުލޫލެކޭ، ތިއީ ޝައިތާނެކޭ، މަށާ ކައިރި ނުވާށޭ، މަށާ ކައިރި ނުވާށޭ" ކިޔާފައެވެ. އެއާއެކު މުޅި ސޯޝަލް މީޑިއާގައި ލަވަ ވަނީ ވައިރަލް ވެގެންގޮސްފައެވެ.

ޔަޝްފާ އަށް ފޮނުވާފައިވާ "ހާޒިރުވުމަށް އަންގާ ޗިޓު" ގައި ބުނެފައިވަނީ ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގ އަށް ހާޒިރުވެ ސާޖެންޓް އަބްދުﷲ ސާޖިދު އާ ބައްދަލު ކުރުމަށެވެ.

ޗިޓުގައި ބުނެފައިވަނީ ޔަޝްފާ ހާޒިރު ކުރަނީ ދިވެހި ރާއްޖޭގެ ރައީސުލްޖުމްހޫރިއްޔާގެ ފުރާނަ އަށް ނުރައްކާވާ ގޮތައް އަމަލު ކުރުމަށް ގޮވާލާފައި ކަމަށް ތުހުމަތު ކުރެވޭ މައްސަލައިގައި ސުވާލުކޮށް ބަޔާން ނެގުމަށް ކަމަށެވެ.