އޮމަދޫ ބަނދަރުގެ މަޝްރޫއާއެކު، ރަށްގިރުމުގެ މައްސަލައަށް ހައްލު ހޯދުމުގެ މަސައްކަތް އަންނަ އަހަރު ކުރީކޮޅު ފެށޭނެ: ރައީސް މުއިއްޒު
15 ޑިސެމްބަރު 2024 | އާދީއްތަ 12:15ކުރިއަށް އޮތް 2025 ވަނަ އަހަރަކީ ތަފާތު އަހަރަކަށް ވާނެ
އޮމަދޫގައި ރައީސް ޑރ.މުހައްމަދު މުއިއްޒު ވާހަކަފުޅު ދައްކަވަނީ
އދ. އޮމަދޫ ރައްޔިތުން އެދޭ ތަރައްގީ ގެނެސްދޭނެ ކަމަށާއި، ބަނދަރުގެ މަޝްރޫއާއެކު، ރަށްގިރުމުގެ މައްސަލައަށް ހައްލު ހޯދައިދޭނެ ކަމަށާއި، އަންނަ އަހަރު ކުރީކޮޅު އަމަލީ މަސައްކަތްތައް ފެށޭނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އާދިއްތަ ދުވަހު އޮމަދޫއަށް ވަޑައިގެން، އެ ރަށުގެ ރައްޔިތުންނާއި ބައްދަލުކުރައްވައި ރައީސް މުއިއްޒު ވިދާޅުވީ އޮމަދޫ ރައްޔިތުންގެ ތަރައްގީއަށް ރައްޔިތުންއެދޭ ގޮތަށް ކަންކަން ކޮށްދޭނެ ކަމަށެވެ.
އެންމެ މުހިންމު ކަމަކަށް އޮތީ އޮމަދޫގެ ބަނދަރުގެ މައްސަލައަށް ހައްލު ހޯދުންކަން ފާހަގަކުރައްވައި ރައީސް މުއިއްޒު ވިދާޅުވީ ނިމިގެން ދިޔަ އަހަރަކީ، އެކި ސަބަބުތަކާ ހެދި މިފަދަ އެތައް ކަމަކަށް ހައްލު ހޯދައި، ނުދެވި ދިޔަ އަހަރެއް ކަމަށާއި، މައިގަނޑު ސަބަބަކީ ބަޖެޓްގެ ދަތިކަން ކަމަށެވެ. ނަމަވެސް ކުރިއަށް އޮތް 2025 ވަނަ އަހަރަކީ ތަފާތު އަހަރަކަށް ވާނެ ކަމަށާއި، ރަށުގެ ރައްޔިތުންގެ ކަންބޮޑުވުންތަކަށް ހައްލުލިބޭނެ ފަދަ ގޮތަކަށް، ފުރިހަމަ ބަނދަރެއް ތަރައްގީ ކޮށްދޭނެ ކަމަށް އެމަނިކުފާނު ވިިދާޅުވިއެވެ. އަދި ވިދާޅުވީ އޮމަދޫއަށް ކުރިމަތިވެފައިވާ ރަށްގިރުމުގެ މައްސަލައަށް އަމަލީ ސިފައެއްގައި ހައްލު ހޯދައިދޭނެ ކަމަށެވެ.
ރައީސް މުއިއްޒު ވިދާޅުވީ ބަނދަރާއި، ގިރާ ސަރަހައްދުގެ މަޝްރޫއުގައި ސޮއި ކުރެވިފައި އޮތް ނަމަވެސް، އަމަލީ މަސައްކަތެއް ކުރެވިފައިނުވާ ކަމަށާއި، 2 މަޝްރޫއުގެ އަމަލީ މަސައްކަތް 2025 ވަނަ އަހަރުގެ ކުރީ ކޮޅު ފެށޭނެ ކަމަށެވެ.
މީގެ އިތުރުން ރައީށް މުއިއްޒު ވިދާޅުވީ 2025 ވަނަ އަހަރު ހިންގަން ކަނޑައަޅާފައިވާ އައު މަޝްރޫއުތަކުގެ އުސޫލުގައި އިސްކަން ދޭ ތަރުތީބުން އޮމަދޫގެ ތައުލީމާއި ސިއްހީ ދާއިރާ އަދި ކުޅިވަރުގެ ދާއިރާއިންވެސް ތަރައްގީގެ މަޝްރޫއުތަކެއް ކުރިއަށް ގެންދާނެ ކަމަށެވެ. ސްކޫލަށް ބޭނުންވާ މަލްޓިޕަރޕަސް ހޯލާއި، ކުލާސްރޫމްތަކުގެ އިތުރުން، ސިއްހީ މަރުކަޒަށް ބޭނުންވާ އިތުރު ޖާގައާ ވަސީލަތްތައް އަންނަ އަހަރު ފޯރުކޮށްދޭނެ ކަމަށް އެމަނިކުފާނު ވިދާޅުވިއެވެ. އަދި ވިދާޅުވީ ކުޅިވަރުގެ ރޮނގުން، 2025 ވަނަ އަހަރު، އަންހެން ބޭފުޅުންނަށް ޚާއްސަ ހޭންޑްބޯލް ކޯޓެއްވެސް ތަރައްގީ ކޮށްދޭނެ ކަމަށާއި، ފުޓުބޯޅަދަނޑުގެ މަސައްކަތްތައްވެސް ކުރިއަށް ގެންދާނެ ކަމަށެވެ.
ރައީސް ވަނީ މުޅި ރާއްޖެއަށް ދިމާވެފައި އޮތް ކުނީގެ މައްސަލައަށް ވަށާޖެހެނިވި ހައްލެއް ހޯދުމަށް ބޭނުންވާކަން ފާހަގަކުރައްވާފައެވެ. އަދި ކުނި މެނޭޖު ކުރުމަށް އޮމަދޫގައި މަރުކަޒެއް ގާއިމުކޮށްފައި ހުރިއިރު، އެތަނަށް ބޭނުންވާ ތަކެތި ހޯދަން ޖެހިފައިވާކަމަށާއި، އެމަސައްކަތް ވެސް ކުރިއަށް ގެންދާނެ ކަމަށް އެމަނިކުފާނު ވިދާޅުވިއެވެ.
ރައީސް މުއިއްޒު ވިދާޅުވީ 2025 ވަނަ އަހަރު ވެގެން ދާނީ ނަތީޖާ ނެރުމުގައި އަމަލީ މަސައްކަތްތައް ފެށިގެންދާ އަހަރެއް ކަމަށެވެ.
