ޑްރައިވަރުންގެ ޖަމްއިއްޔާގެ އިންތިޒާމް ސެކްރެޓަރީ ހައްޔަރުކޮށްފި

ޑްރައިވަރސް އެސޯސިއޭޝަންގެ އިންތިޒާމް ސެކްރެޓަރީ މިސްބާޙް ޝަރީފް ހުކުރު ދުވަހުގެ ރޭ ހައްޔަރުކޮށްފިއެވެ.

މައުލޫމާތު ލިބިފައިވާ ގޮތުގައި ފުލުހުން ގޮސް މިސްބާހް ހައްޔަރު ކުރީ ކޯޓު އަމުރެއްގެ ދަށުންނެވެ.

މިސްބާހް ހައްޔަރު ކުރީ ހުޅުމާލޭގައި ހުންނަ ނަލަ ޓެކްސީ ސެންޓަރު ކައިރީގައި ހުއްޓާ ކަމަށް މައުލޫމާތު ލިބިފައިވެއެވެ.

މިޞްބާޙް ހައްޔަރުކުރިއިރު މިޞްބާޙްގެ ކާރު ބުރާސްފަތި ދުވަހުގެ ވަގުތެއްގައި ޕާކް ކޮށްފައި އޮއްވާ ޓޯވ ކޮށްގެން ގެންދާ މަންޒަރު ސޯޝަލް މީޑިއާގައި ވަނީ އާންމު ވެފައެވެ.

މިސްބާހް ހައްޔަރު ކުރި ސަބަބު އަދި ސާފުވާ ގޮތް ވަނީ ނުވެފައެވެ. 

ޑްރައިވަރުން މިދިޔަ ބުދަ ދުވަހު ހުޅުމާލޭގައި ކުރިއަށް ގެންދިޔަ އިހްތިޖާޖު އާ ގުޅިގެން 3 ޑްރައިވަރުން ފުލުހުން ހައްޔަރު ކުރިއެވެ. އޭގެ ތެރެއިން އެކަކު ދޫކޮށްލައި، އަނެއް ދެ މީހުން އަދިވެސް ތިބީ ބަންދުގައެވެ.

މާލޭ ސަރަހައްދުގައި ޓެކްސީ ޑްރައިވަރުން އިހްތިޖާޖަށް ނުކުތީ ސަރުކާރުން ޓެކްސީގެ ޚިދުމަތާ ގުޅޭ ގޮތުން ގެންގުޅޭ ސިޔާސަތުތަކާ މެދު ހިތްހަަމަ ނުޖެހި، އެކަމުގެ ކަންބޮޑުވުންތައް ސަރުކާރުގެ ސަމާލު ކަމަށް ގެނައި ނަމަވެސް އެދެވޭ ހައްލެއް ނުލިބުމުންނެވެ.