ޔުއެފާ ޗެމްޕިއަންސް ލީގުގައި ބޮރޫޝިއާ ޑޯޓްމަންޑާ ދެކޮޅަށް ކުޅުނު މެޗުން މޮޅުވެ، ބާސެލޯނާ އިން ތާވަލްގެ ދެ ވަނަ އަށް ޖެހިލައިފި އެވެ.

ޑޯޓްމަންޑުގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު ބާސެލޯނާ އިން ކާމިޔާބު ކުރީ 3-2 އިންނެވެ. މެޗުގައި ބާސެލޯނާ އިން ދެ ފަހަރެއްގެ މަތިން ލީޑު ނަގާފައި ވަނިކޮށް، ޑޯޓްމަންޑުން ނަތީޖާ ހަމަހަމަ ވެސް ކުރި އެވެ. ނަމަވެސް މެޗުގެ ފަހު ވަގުތުގައި ލަނޑު ޖަހައިގެން ބާސެލޯނާ ވަނީ މޮޅުވެފަ އެވެ.

މެޗުގެ ދެ ވަނަ ހާފު ފަށައިގެން އަށް ވަނަ މިނެޓުގައި ބާސެލޯނާ އަށް ލީޑު ނަގައިދިނީ ރަފީނިއާ އެވެ. އޭނާ އެ ލަނޑު ޖެހީ ޑެނީ އޮލްމޯ ތަނަވަސްކޮށްދިން ފުރުސަތެއްގަ އެވެ. އޭގެ ހަތް މިނެޓު ފަހުން ޑޯޓްމަންޑަށް ލިބުނު ޕެނަލްޓީ ކާމިޔާބުކޮށް، ނަތީޖާ ހަމަހަމަ ކޮށްދިނީ ސާހޯ ގުރާސީ އެވެ.

ދެ ވަނަ ފަހަރަށް މެޗުގައި ބާސެލޯނާ އިން ލީޑު ނެގީ 75 ވަނަ މިނެޓުގައި ފެރާން ޓޮރޭސް ޖެހި ލަނޑުންނެވެ. އެއީ ފާމިން ލޮޕޭޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ތިން މިނެޓު ފަހުން ގުރާސީ ވަނީ ލަނޑު ޖަހައި ދެ ވަނަ ފަހަރަށް ޑޯޓްމަންޑަށް ނަތީޖާ ހަމަހަމަ ކޮށްދީފަ އެވެ. މެޗުން ބާސެލޯނާ މޮޅުވީ މެޗުގެ 85 ވަނަ މިނެޓުގައި ޓޮރޭސް ޖެހި ލަނޑުންނެވެ.

މޮޅާއެކު ބާސެލޯނާ ދެ ވަނައިގައި އޮތީ މިހާތަނަށް އެ ޓީމު ކުޅެފައިވާ ހަ މެޗުން 15 ޕޮއިންޓާ އެކު އެވެ. ފަސް މެޗުން ބާސެލޯނާ މޮޅުވެފައިވާއިރު، އެއް މެޗުން ވަނީ ބަލިވެފަ އެވެ. ހަމަ އެ އަދަދަށް މެޗު ކުޅެގެން އެއް ވަނައިގައި ލިވަޕޫލަށް ލިބެނީ 18 ޕޮއިންޓެވެ.