ޖިރޯނާ ބަލިކޮށް، ލިވަޕޫލް ފަސް ޕޮއިންޓުގެ ލީޑެއް

ޔުއެފާ ޗެމްޕިއަންސް ލީގުގައި ޖިރޯނާއާ ދެކޮޅަށް ކުޅުނު މެޗުން މޮޅުވެ، ލިވަޕޫލް އިން އެއް ވަނައިގައި ލީޑު ފުޅާ ކޮށްފި އެވެ.

ޖިރޯނާގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު ލިވަޕޫލުން ކާމިޔާބު ކުރީ 1-0 އިންނެވެ. މިވަގުތު ރަނގަޅު ފޯމެއްގައި އޮތް ލިވަޕޫލުން މެޗުގައި ރަނގަޅަށް ކުޅެފައިވާއިރު، އެ ޓީމުން ލަނޑު ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގައި ވެސް ލިވަޕޫލަށް ވަނީ ލަނޑު ޖަހާނެ ފުރުސަތުތަކެއް ލިބިފަ އެވެ. ނަމަވެސް ލިވަޕޫލަށް ލިބުނު ފުރުސަތުތައް އެ ޓީމަށް ނިންމާލެވޭ ގޮތެއް ނުވި އެވެ. މެޗުގެ ދެ ވަނަ ހާފުގައި ލިވަޕޫލުން ލަނޑު ޖަހައި ލީޑު ނެގީ އެ ޓީމަށް ލިބުނު ޕެނަލްޓީއެއް ކާމިޔާބު ކޮށްގެންނެވެ. މެޗުގެ 63 ވަނަ މިނެޓުގައި ޕެނަލްޓީ ކާމިޔާބުކޮށް، ލިވަޕޫލަށް ލީޑު ނަގައިދިނީ މިޞްރުގެ ފޯވާޑު މުޙައްމަދު ޞަލާޙު އެވެ.

މޮޅާއެކު ލިވަޕޫލް އިން ވަނީ އެއް ވަނައިގައި ފަސް ޕޮއިންޓުގެ ލީޑެއް ނަގައިފަ އެވެ. އެއީ މިހާތަނަށް ކުޅުނު ހަ މެޗުން ވެސް މޮޅުވެ 18 ޕޮއިންޓު ހޯދައިގެންނެވެ. އާން ސްލޮޓްގެ އިރުޝާދުގެ ދަށުން މި ސީޒަންގައި ލިވަޕޫލް އަންނަނީ އިނގިރޭސި ޕްރިމިއާ ލީގުގައި ވެސް ރަނގަޅު ނަތީޖާތަކެއް ނެރެމުންނެވެ. ލީގުގައި ވެސް އެ ޓީމު އޮތީ ތާވަލްގެ އެއް ވަނައިގަ އެވެ.