މިސަރުކާރާއެކު ކުރިއަށް އޮތީ ބިރުވެރި ދުވަސްތަކެއް، މިކަމާ ދެކޮޅަށް މިހާރުން މިހާރަށް މަސައްކަތް ނުކޮށްފިނަމަ އަނިޔާވެރިކަމާ ކުރިމަތިލާން ޖެހޭނެ: ރައީސް ސާލިހު
ވައުދުތައް ނުފުއްދާކަމުގެ ކަންބޮޑުވުން ރައްޔިތުންގެ އެބައޮތް
'ގާނޫނު އަސާސީގެ ދިފާއުގައި ރައްޔިތުންގެ'' ޖަލްސާގައި ކުރީގެ ރައީސް އިބްރާހިމް މުހައްމަދު ސާލިހު ވާހަކަފުޅު ދައްކަވަނީ
މިސަރުކާރާއެކު ކުރިއަށް އޮތީ ބިރުވެރި، ނާމާން ދުވަސްތަކެއް ކަމަށާއި، މިކަމާއި ދެކޮޅަށް މިހާރުން މިހާރަށް މަސައްކަތް ނުކޮށްފިނަމަ އަނިޔާވެރި ދުވަސްތަކާއި ކުރިމަތިލާން ޖެހޭނެ ކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
އަންގާރަ ދުވަހުގެ ރޭ ކާނިވާ ސަރަހައްދުގައި އެމްޑީޕީން ކުރިއަށް ގެންދާ ''ގާނޫނު އަސާސީގެ ދިފާއުގައި ރައްޔިތުންގެ'' ޖަލްސާގައި ރައީސް ސާލިހު ވިދާޅުވީ ރައީސް ޑރ.މުހައްމަދު މުއިއްޒު ވެރިކަމަށް ވަޑައިގަތުމަށް ވެވަޑައިގެންނެވި ވައުދުތައް ނުފުއްދާކަމުގެ ކަންބޮޑުވުން ރައްޔިތުންގެ އެބައޮތް ކަމަށާއި، މިސަރުކާރުން ހަދަމުންދަނީ ދޮގު ކަމަށެވެ.
ރައީސް ސާލިހު ވިދާޅުވީ ސަރުކާރުގެ ވެރިންނާ ދޭތެރޭގައި ރައްޔިތުންގެ އިތުބާރެއް ނެތް ކަމަށާއި، އަދިވެސް މަސައްކަތް ކުރަމުންދަނީ ކަންކަން ރައްޔިތުންނަށް އޮޅުވާލުމަށް ކަމަށެވެ. އަދި މިހާރު ވޯޓެއް ނަގައިފިނަމަ އެކަން އެނގޭނެ ކަމަށް އެމަނިކުފާނު ވިދާޅުވިއެވެ.
މީގެ އިތުރުން ރައީސް ސާލިހު ވިދާޅުވީ ގައުމުގައި މިހާރު ފެންނަމުންދާ ވިލާގަނޑު ވަރަށް ބަނަ ކަމަށާއި، ކުރިއަށް އޮތީ ބަނަ ދުވަސްތަކެއް ކަމަށެވެ. އަދި މިހާރުން މިހާރަށް ރައްޔިތުން ނުކުމެ މަސައްކަތް ނުކޮށްފިނަމަ އަނިޔާވެރިކަމާއި އަނެއްކާވެސް ކުރިމަތިލާން ޖެހޭނެ ކަމަށް ރައީސް ސާލިހު ވިދާޅުވިއެވެ.
ސަރުކާރެއް ރައްޔިތުން އިންތިޚާބު ކުރަނީ ކުރިއަށް ވުރެ ރަނގަޅު ހެޔޮ ބަދަލުތަކެއް ބޭނުންވާތީ ކަމަށާއި، ރައްޔިތުން ވޯޓުލަނީ އެބޭނުމުގައި ކަމަށެވެ. ނަމަވެސް މިސަރުކާރުގައި ދައްޗެއް އުދަނގުލެއް ދިމާނުވާ އެއްވެސް ރައްޔިތެއް ނެތް ކަމަށް އެމަނިކުފާނު ވިދާޅުވިއެވެ.
