ގާނޫނު އަސާސީގެ ދިފާއުގައި ނުނިކުމެއްޖެނަމަ، 2028 ވަނަ އަހަރުގެ ރިޔާސީ އިންތިޚާބު ނޯންނާނެ: މެންބަރު މީކާއިލް

މިއަދު ގާނޫނު އަސާސީގެ ދިފާއުގައި ރައްޔިތުން ނުނިކުމެއްޖެނަމަ، 2028 ވަނަ އަހަރުގެ ރިޔާސީ އިންތިޚާބު ރާއްޖޭގައި ނޯންނާނެ ކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެއެވެ.

ގާނޫނު އަސާސީން ލިބިދޭ ހައްގުތައް ފުނޑާލަމުންދާތީ އެކަމާއި ދެކޮޅަށް އަޑު އުފުލުމަށް 10 ޑިސެމްބަރު ވާ އަންގާރަ ދުވަހު ކާނިވާ ސަރަހައްދުގައި އެއްވުމެއް ބޭއްވުމަށް އެމްޑީޕީން ދަނީ މަސައްކަތްކުރަމުންނެވެ.

ރާއްޖެޓީވީގެ ގާނޫނު އަސާސީގެ ދިފާއުގައި ކަވަރޭޖްގައި ވާހަކަދައްކަވަމުން މެންބަރު މީކާއިލް ވިދާޅުވީ މިސަރުކާރުގެ ވައްކަމުގެ ވާހަކަދައްކަންޖެހޭ ކަމަށާއި، ސަރުކާރު ޖަވާބުދާރީ ކުރުވުމުގެ މަސައްކަތް ރައްޔިތުންގެ މަޖިލީހުން ކުރަންޖެހޭ ކަމަށެވެ. ނަމަވެސް މިސަރުކާރުން މިހާރު މަޖިލިސް ވަނީ ވާކޮށްފައިވާ ކަމަށާއި، އެހެންކަމުން ރައްޔިތުން ސީދާ ހަރަކާތަށް ނުކުންނަންޖެހޭ ކަމަށް މެންބަރު މީކާއިލް ވިދާޅުވިއެވެ.

މެންބަރު މީކާއިލް ވިދާޅުވީ މިއަދު ރައްޔިތުން ގާނޫނު އަސާސީގެ ދިފާއުގައި ހައްގުތައް ހޯދަން ނުނިކުމެއްޖެނަމަ 2028 ވަނަ އަހަރު އޮންނަ ރިޔާސީ އިންތިޚާބު ނޯންނާނެ ކަމަށެވެ. ރައީސް ޑރ.މުހައްމަދު މުއިއްޒުގެ ހުދުމުހުތާރުކަމަށް އިޝާރާތް ކުރައްވައި މެންބަރު މީކާއިލް ވިދާޅުވީ އިންތިޚާބު ނުބާއްވާ ގޮތަށް ގާނޫނު އަސާސީ ބަދަލުކޮށްފާނެ ކަމުގެ ބިރު އެބައޮތް ކަމަށެވެ. ރައީސް މުއިއްޒަށް ތާއީދު ނެތްކަމާއި، ކުރިއަށް އޮތް ދައުރު ވެސް ގެއްލިފައިވާކަން މިހާރު އެމަނިކުފާނަށް ވެސް އެނގިވަޑައިގަންނަވާ މެންބަރު މީކާއިލް ވިދާޅުވިއެވެ. އަދި ވިދާޅުވީ ވެރިކަމަށް ވަޑައިގެންނެވީ ކުރީގެ ރައީސް އަބްދު ޔާމީންގެ ތާއީދާއެކު ކަމަށްވާއިރު، އެ ތާއީދު ވެސް ގެއްލިފައިވާ ކަމަށެވެ.

މެންބަރު މީކާއިލް ވިދާޅުވީ ކުރިއަށް އޮތް ދައުރުގައި އިންތިޚާބު ނުބާއްވާނަމަ ރައްޔިތުންގެ ރުހުން ހޯދުމަށް މަސައްކަތް ކުރަން ނުޖެހޭނެ ކަމަށެވެ. ރައީސް މުއިއްޒު ފަރާތުން ފެންނަނީ އާރާބާރު ބޭނުންކޮށްގެން ގާނޫނު އަސާސީ އެފުށްމިފުށަށް ޖަހައިގެން އެމަނިކުފާނު ބޭނުންވާ މަގުސަދެއް ހާސިލްކުރާ މަންޒަރު ކަމަށް މެންބަރު މީކާއިލް ވިދާޅުވިއެވެ.

މީގެ އިތުރުން މެންބަރު މީކާއިލް ވިދާޅުވީ ކުރިއަށް އޮތް ރިޔާސީ އިންތިޚާބުގައި ރައްޔިތުން ވޯޓު އަޅަން ބޭނުންވާނަމަަ އަދި ރަނގަޅު ވެރިކަމެއް ބޭނުންވާނަމަ 10 ޑިސެންބަރުގައި ސަރުކާރާ ދެކޮޅަށް ބާއްވާ އެއްވުމަށް ރައްޔިތުން ނުކުންނަންޖެހޭ ކަމަށެވެ. އަދި ސަރުކާރަށް ނުރުހުން ފާޅުކުރަންޖެހޭ ކަމަށާއި، ސީދާ މަގުމަތިން ސަރުކާރު ޖަވާބުދާރީ ކުރުވަންޖެހޭ ކަމަށް މެންބަރު މީކާއިލް ވިދާޅުވިއެވެ. އަދި ވިދާޅުވީ ރައްޔިތުންގެ ޕްރެޝަރާއެކު ސަރުކާރަށް ބައެއް ނިންމުންތައް ބަދަލު ކުރުމަށް މަޖުބޫރުވާ ކަމަށާއި، މިއަދު އެޕްރެޝަރު ސަރުކާރަށް ދޭންޖެހޭ ކަމަށް މެންބަރު މީކާއިލް ވިދާޅުވިއެވެ.