އަންޗެލޮޓީ ބުނީ އޭނާ ވަރުބަލި ނުވާ ކަމަށް
ރެއާލަށް އިރުޝާދު ދިނުމުގައި ވެސް އޭނާ ވަރުބަލި ނުވާކަން ފާހަގަކޮށް އަންޗެލޮޓީ ބުނީ، ރެއާލާ އެކު ކުރިއަށް ދާން އޭނާ އަށް އިނގޭ ކަމަށާއި، އެ ކުލަބާއެކު ކާމިޔާބީތައް ހޯދޭނެ ކަމުގެ ފުރިހަމަ ޔަޤީންކަން އޮތް ކަމަަށެވެ.
ރެއާލް މެޑްރިޑުގެ ކޯޗު ކާލޯ އަންޗެލޮޓީ
ރެއާލް މެޑްރިޑަށް އިރުޝާދު ދިނުމުގައި އޭނާ ވަރުބަލި ނުވާ ކަމަށް، އެ ޓީމަށް އިރުޝާދު ދެމުން އަންނަ އިޓަލީގެ ކާލޯ އަންޗެލޮޓީ ބުނެފި އެވެ.
އޭނާ މިހެން ބުނީ މި ސީޒަންގައި ރެއާލްގެ ނަތީޖާތައް ދަށް ކަަމަށް ބުނެ އަމާޒުވަމުން އަންނަ ފާޑު ކިޔުންތަކާ ގުޅޭ ގޮތުން ވާހަކަ ދައްކަމުންނެވެ. އެގޮތުން އަންޗެލޮޓީ ބުނީ އޭނާ އަށް އެތައް ފާޑު ކިޔުންތަކެއް އަމާޒުވާ މަންޒަރު ފެންނަ ކަމަށާއި، އެ ފާޑުކިޔުންތަކުގެ އަޑު ވެސް އިވޭ ކަމަށެވެ. ޚާއްސަކޮށް މި ސީޒަންގައި އެކަން ވަރަށް ބޮޑަށް ފާހަގަވެފައިވާ ކަމަށް ވެސް އަންޗެލޮޓީ ބުންޏެވެ.
ކިތަންމެ ފާޑު ކިޔުންތަކެއް އަމާުޒުވީ ނަމަވެސް ރެއާލާ މެދު އޭނާގެ ވިސްނުމެއް، އަދި އެ ކުލަބާ އެކު ކުރިއަށް ދިޔުމުގައި އޭނާ ރޫޙަށް ބަދަލެއް ނާންނާނެ ކަމަށް ވެސް އަންޗެލޮޓީ ވަނީ ބުނެފަ އެވެ. ރެއާލްގައި އޭނާ ހުރީ ވަރަށް ހިތްހަމަ ޖެހިގެން ކަމަށާއި، އެ ކުލަބުގައި މަސައްކަތް ކުރަނީ އުފަލުންކަން ފާހަގަކޮށް އަންޗެލޮޓީ ބުނީ، ރެއާލް އަށް އިރުޝާދު ދިނުމަކީ އޭނާ ލޯބި ކުރާ ކަމެއް ކަމަށެވެ.
މީގެ އިތުރުން އަންޗެލޮޓީ ބުނީ ކިތަންމެ ގިނަ ފާޑު ކިޔުންތަކެއް އަމާޒުވީ ނަމަވެސް، އޭނާ ވަރުބަލި ނުވާ ކަމަށެވެ. ރެއާލަށް އިރުޝާދު ދިނުމުގައި ވެސް އޭނާ ވަރުބަލި ނުވާކަން ފާހަގަކޮށް އަންޗެލޮޓީ ބުނީ، ރެއާލާ އެކު ކުރިއަށް ދާން އޭނާ އަށް އިނގޭ ކަމަށާއި، އެ ކުލަބާއެކު ކާމިޔާބީތައް ހޯދޭނެ ކަމުގެ ފުރިހަމަ ޔަޤީންކަން އޮތް ކަމަަށެވެ.
ދެ ވަނަ ފަހަރަށް އަންޗެލޮޓީ ރެއާލާ ހަވާލުވީ 2021 ވަނަ އަހަރު އެވެ. އޭގެ ފަހުން އެ ކުލަބުން ވަނީ އޭނާގެ އިރުޝާދުގެ ދަށުން ސްޕެނިޝް ލީގު ދެ ފަހަރު، ކޮޕާ ޑެލް ރޭ އެއް ފަހަރު، ސްޕެނިޝް ސުޕަ ކަޕް ދެ ފަހަރު، ޔުއެފާ ޗެމްޕިއަންސް ލީގު ދެ ފަހަރު، ޔުއެފާ ސުޕަ ކަޕް ދެ ފަހަރު އަދި ފީފާ ކުލަބު ވޯލްޑް ކަޕް އެއް ފަހަރު ކާމިޔާބު ކޮށްފަ އެވެ.
