ސްޕެނިޝް ލީގުގައި އެތުލެޓިކް ބިލްބާއޯއާ ދެކޮޅަށް ކުޅުނު މެޗުން، އެންމެ ފަހުގެ ޗެމްޕިއަން ރެއާލް މެޑްރިޑު ބަލިވެއްޖެ އެވެ.

ބިލްބާއޯގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗުން ރެއާލް ބަލިވީ 2-1 އިންނެވެ. އެ މެޗުން މޮޅުވެ، އެއް ވަނައިގައި އޮތް ބާސެލޯނާއާ ދެމެދު އޮތް ފަރަގު އެއް ޕޮއިންޓަށް ކުޑަ ކުރުމުގެ ފުރުސަތު ރެއާލަށް އޮތެވެ.

މެޗުގައި ދެ ޓީމުން ވެސް ލަނޑުތައް ޖެހީ ދެ ވަނަ ހާފުގަ އެވެ. މެޗުގެ ދެ ވަނަ ހާފު ފަށައިގެން އަށް ވަނަ މިނެޓުގައި ބިލްބާއޯ އަށް ލީޑު ނަގައިދިނީ އެލެކްސް ބެރެންގޫރް އެވެ. އޭގެ ފަހުން މެޗުގެ 68 ވަނަ މިނެޓުގައި ނަތީޖާ ހަމަހަމަ ކުރުމަށް ރެއާލަށް ޕެނަލްޓީއެއް ލިބުނެވެ. ފްރާންސްގެ ކެޕްޓަން ކީލިއަން އެމްބާޕޭ ފޮނުވާލި ޕެނަލްޓީ ކާމިޔާބެއް ނުވި އެވެ.

އޭގެ ފަހުން މެޗުގެ 78 ވަނަ މިނެޓުގައި ރެއާލުން ނަތީޖާ ހަމަހަމަ ކުރީ އިންގްލެންޑުގެ ޖޫޑް ބެލިންހަމް ޖެހި ލަނޑުންނެވެ. ރެއާލް އިން ނަތީޖާ ހަމަހަމަ ކުރިތާ އެންމެ ދެ މިނެޓު ފަހުން، ބިލްބާއޯ އިން ވަނީ ދެ ވަނަ ލަނޑެއް ޖަހައި އަނެއްކާ ވެސް ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ގޯކާ ގުރުޒެޓްކާ އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

ބައްޔާއެކު ރެއާލް ދެ ވަނައިގައި އޮތީ 15 މެޗުން 33 ޕޮއިންޓާ އެކު އެވެ. މިއީ މި ސީޒަންގެ ސްޕެނިޝް ލީގުގައި ރެއާލްގެ ދެ ވަނަ ބައްޔެވެ. އެއް ވަނައިގައި ވާދަވެރި ބާސެލޯނާ އޮތީ 16 މެޗުން 37 ޕޮއިންޓާ އެކު އެވެ.