ސަރުކާރުން އެންމެ ބޮޑު އިސްކަމެއް ދޭނީ ހުއްޓިފައިވާ މަޝްރޫތައް އަލުން ފެށުމަށް: ރައީސް މުއިއްޒު
މަޝްރޫއުތައް ކުރިއަށް ގެންދިއުމަށް ދައުލަތުން ކުރަންޖެހޭ މަސައްކަތްތައް ކުރާނެ
ހއ. އުލިގަމު ރައްޔިތުންނާ ބައްދަލުކުރައްވައި ރައީސް ޑރ.މުހައްމަދު މުއިއްޒު ވާހަކަފުޅު ދައްކަވަނީ
ސަރުކާރުން އެންމެ ބޮޑު އިސްކަމެއް ދޭނީ މަސައްކަތްފެށުމަށްފަހު، ހުއްޓިފައިވާ މަޝްރޫތައް އަލުން ފެށުމަށް ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ބުރާސްފަތި ދުވަހު ހއ. އުލިގަމު ރައްޔިތުންނާ ބައްދަލުކުރައްވައި ރައީސް މުއިއްޒު ވިދާޅުވީ ސަރުކާރުން އެންމެ އިސްކަމެއް ދެނީ ރާއްޖޭގެ އެކި ސަރަހައްދުތަކުގައި މަސައްކަތްފެށުމަށްފަހު، ހުއްޓިފައިވާ މަޝްރޫއުތައް އަލުން ފެށުމަށް ސަރުކާރުގެ ކުންފުނިތައް މޮބިލައިޒްކޮށް، މަސައްކަތްފަށައި، އެ މަޝްރޫއުތައް ނިންމުމަށް ކަމަށެވެ.
ރައީސް މުއިއްޒު ވަނީ އުލިގަމުގެ އިތުރުން ރާއްޖޭގެ އެކި ސަރަހައްދުތަކުގައި މަސައްކަތް ހަވާލުކުރުމަށްފަހު، އެކި ހާލަތްތަކުގެ ސަބަބުން އެއްވެސް މަސައްކަތެއް ކުރިއަށް ނުގެންދެވިފައިވާ ގިނަ މަޝްރޫއުތަކެއް ހުރިކަން ފާހަގަކުރައްވާފައެވެ. މިފަދަ މަޝްރޫއުތަކުގެ ތެރޭގައި ގައުމީ ތަރައްގީ އާއި ރައްޔިތުންގެ ދުޅަހެޔޮކަމާއި ގުޅިފައިވާ އެތައް މަޝްރޫއެއް ހިމެނޭކަމަށްވެސް އެމަނިކުފާނު ވިދާޅުވިއެވެ. އެހެންކަމުން، އެންމެ މުހިންމުކަމަކީ މިފަދަ މަޝްރޫއުތައް ފަށައި، އޭގެ ނަފާ ރައްޔިތުންނަށް ލިބުން ކަމަށާއި އެފަދަ މަޝްރޫއުތައް ކުރިއަށް ގެންދިޔުމަށް ސަރުކާރުގެ ކުންފުނިތައް މޮބިލައިޒްކޮށް، މަޝްރޫއުތައް ހިންގުމަކީ ސަރުކާރުގެ އަމާޒުކަމަށް ރައީސް މުއިއްޒު ވިދާޅުވިއެވެ. އަދި، އެކަމަށް ދައުލަތުން ކުރަންޖެހޭ މަސައްކަތްތައް ކުރާނެ ކަމުގެ ޔަގީންކަން ރައީސް މުއިއްޒު ދެއްވިއެވެ.
މީގެ އިތުރުން ރައިސް މުއިއްޒު ވަނީ، އުލިގަމުގެ ތަރައްގީއަށް، ޔޮޓް މެރީނާއެއް ތަރައްގީކުރުމުގެ މަސައްކަތް ފެބްރުއަރީ މަހު ފެށިގެންދާނޭކަން އިއުލާންކުރައްވާފައެވެ. އަދި، ސްޕޯޓްސް ފިޝިންގއަށް ބޭނުންވާ ބޮއި، ފެބްރުއަރީ މަހު ހަރުކުރެވި، އޭގެ ފައިދާ އުލިގަމު ރައްޔިތުންނަށް ލިބިގެންދާނޭ ކަމަށްވެސް ރައީސް މުއިއްޒު ވިދާޅުވިއެވެ.
އުލިގަމު ރައްޔިތުން އެންމެ ބޮޑަށް އެދޭ އެއް ކަމަކީ އެރަށު ސިއްހީ މަރުކަޒުގެ ފެންވަރު ރަނގަޅުކުރުން ކަމަށާއި، އެކަމަށް ހައްލެއް ހޯދުމުގެ ގޮތުން، އެމް.ޓީ.ސީ.ސީ އާއި ހަވާލުކުރެވިގެން އެމަސައްކަތް އަންނަ މަހު ފެށިގެންދާނެ ކަމަށްވެސް ރައީސް މުއިއްޒު ވިދާޅުވިއެވެ.
އުލިގަމަށް ކުރެއްވި ދަތުރުފުޅުގައި ރައީސް މުއިއްޒު ވަނީ އުލިގަމު ސިއްހީ މަރުކަޒަށް ޒިޔާރާތްކުރައްވައި، މަރުކަޒުގެ ޚިދުމަތްތަކާއި މަރުކަޒުގައި ޚިދުމަތްދިނުމަށް ހުރި ގޮންޖެހުންތަކާއި ބެހޭގޮތުން މައުލޫމާތު އޮޅުންފިލުއްވާފައެވެ. އަދި އުލިގަމު ރައްޔިތުންނާ ބައްދަލުކުރެއްވި ރަސްމިއްޔާތުގައި، ބޭންކް އޮފް މޯލްޑިވްސްއިން އުލިގަމުގައި އޭ.ޓީ.އެމް ބެހެއްޓުމުގެ، މަސައްކަތް ކައުންސިލާ ހަވާލުކުރެއްވުންވެސް އޮތެވެ.
ރައީސް މުއިއްޒު ތިލަދުންމަތީ އުތުރުބުރީގެ ބައެއް ރަށްތަކަށް ކުރެއްވި ދަތުރުފުޅު ނިންމަވާލެއްވުމަށްފަހު ބުރާސްފަތި ދުވަހުގެ ރޭ ވަނީ މާލެއަށް ވަޑައިގެންފައެވެ. ރައީސްގެ މި ދަތުރުފުޅުގައި އެ އަތޮޅުގެ 10 ރަށަކަށް ޒިޔާރަތްކުރައްވައި، ރަށު ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާއި، ރަށްރަށުގެ މުވައްސަސާތަކުގެ އިސްވެރިންނާ ބައްދަލުކުރައްވައި، އެރަށްރަށުގެ ތަރައްގީއަށް ބޭނުންވާ ކަންކަމާއި، ރައްޔިތުން އެންމެ އެދޭކަންކަމާ ގުޅޭގޮތުން މަޝްވަރާ ކުރައްވާފައިވެއެވެ.
