މިއަދު ބާއްވަން ތާވަލް ކުރި މަޖިލިސް ޖަލްސާ ކެންސަލް ކޮށްފި
މިދައުރު 15 ޑިސެންބަރަށް ވަނީ ދިގު ދަންމާލާފައި
20 ވަނަ ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ބުދަ ދުވަހު ބާއްވަން ތާވަލް ކުރި ރައްޔިތުން މަޖިލީހުގެ ޖަލްސާ ކެންސަލް ކޮށްފިއެވެ.
ޖަލްސާ ކެންސަލް ކުރުމާއި ގުޅިގެން މަޖިލީހުގެ އޮފިޝަލް ވިދާޅުވީ ދެން ޖަލްސާއެއް އޮންނަނީ 9 ޑިސެންބަރު 2024 ވާ ހޯމަ ދުވަހު ކަމަށެވެ. ޖަލްސާ ކެންސަލް ކުރި އިތުރު ސަބަބެއް ހާމަކޮށްފައިނުވެއެވެ.
އަންގާރަ ދުވަހުގެ ޖަލްސާ ނިންމަވާލައްވަމުން މަޖިލީހުގެ ރިޔާސަތުގައި އިންނެވި މަޖިލީހުގެ ނައިބު ރައީސް އަހުމަދު ނާޒިމް ވަނީ ބުދަ ދުވަހުގެ ހެނދުނު 9:00ގައި ޖަލްސާ އޮންނާނެކަން ވެސް އިއުލާން ކުރައްވާފައެވެ.
މަޖިލީހުން ނިންމަން ޖެހޭ ގިނަ މަސައްކަތްތައް ހުރި ކަމަށް ބުނެ، މިދައުރު ޑިސެންބަަރު މަހުގެ 15 އަށް ވަނީ ދިގު ދަންމާލާފައެވެ.
އަންގާރަ ދުވަހުގެ ޖަލްސާގައި މިނިސްޓަރ އޮފް ފިނޭންސް މޫސާ ޒަމީރުއާ ސުވާލުކުރެއްވުމާއި، ކެންދޫ ދާއިރާގެ މެންބަރު މަޢުރޫފް ޛާކިރު ހުށަހަޅުއްވާފައިވާ، ޓޫރިސްޓް ރިޒޯޓް އަދި ހޮޓާތަކުގައި މަސައްކަތްކުރަމުންދާ މުވައްޒަފުން ތަބާވާންޖެހޭ ގްރޫމިންގ އަދި ހެދުންއެޅުމުގެ އުސޫލުތައް ހުރި ގޮތުގެ ސަބަބުން، ބުރުގާ އެޅުމަށާއި، ޑީސެންޓްކޮށް ތުނބުޅި މަތިމަސް ބެހެއްޓުމަށް، މުވައްޒަފުންނަށް ކުރިމަތިވާ ހުރަސްތައް ނައްތާލައި، ފަތުރުވެރިކަމުގެ ސިނާއަތުގައި މަސައްކަތްކުރާ މުވައްޒަފުންނާ ގުޅޭ ގްރޫމިންގ އަދި ހެދުންއެޅުމުގެ ޢާންމު މިންގަނޑެއް ނުވަތަ އުސޫލެއް އެކުލަވާލުމަށް ސަރުކާރަށް ގޮވާލައި ހުށަހަޅާ ޤަރާރުގެ ފުރަތަމަ ކިޔުން އިއްވާފައިވެއެވެ. އަދި ސަރުކާރުގެ ފަރާތުން، ގަމު ދާއިރާގެ މެންބަރު ޔޫސުފް ނަޝީދު ހުށަހަޅުއްވާފައިވާ، (މަސްތުވާތަކެއްޗާބެހޭ ޤާނޫނު) އަށް އިޞްލާޙު ގެނައުމުގެ ބިލުގެ އިބްތިދާއީ ބަހުސްކުރިއަށް ގެންގޮސްފައިވެއެވެ.
މީގެ އިތުރުން ސަރުކާރުގެ ފަރާތުން، މާފަންނު ދެކުނު ދާއިރާގެ މެންބަރު ޢަބްދުﷲ ރިފާއު ހުށަހަޅުއްވާފައިވާ، ބަންޑާރަނައިބުގެ އޮފީހުގެ ބިލުގެ އިބްތިދާއީ ބަހުސް ވެސް ކުރިއަށް ގެންގޮސްފައިވެއެވެ.
