މިއާމީގެ ކޯޗަކަށް މަޝެރާނޯ

އެމެރިކާގެ އިންޓަރ މިއާމީގެ ކޯޗަކަށް، އާޖެންޓީނާގެ ހަވިއޭ މަޝެރާނޯ ހަމަޖައްސައި، އެ ކުލަބާ ރަސްމީކޮށް އޭނާ ހަވާލުވެއްޖެ އެވެ.

މިއާމީގެ ކޯޗުކަމުގެ މަގާމުގައި އެންމެ ފަހުން ހުރީ އާޖެންޓީނާގެ ޖެރާޑޯ މާޓިނޯ އެވެ. އެ މަގާމަށް އޭނާ ހަމަޖެއްސީ މިދިޔަ އަހަރުގެ ޖޫން މަހުގެ ތެރޭގަ އެވެ. މިއާމީ އާއެކު އޭނާ ސޮއި ކޮށްފައިވާ އެއްބަސްވުމުގައި ބާކީ އެއް އަހަރު އޮއްވާ، މާޓިނޯ ވަނީ އަމިއްލަ ސަބަބަކާ ހުރެ އެ ޓީމުގެ ކޯޗުކަމުން ވަކިވާން ނިންމައިފަ އެވެ.

އިންޓަރ މިއާމީން އެ ޓީމުގެ ކޯޗަކަށް މާޝެރާނޯ ހަމަޖައްސާފައި ވަނީ މީގެ ދުވަސް ކޮޅެއް ކުރިންނެވެ. މިހާރު މިއާމީން ވަނީ އެކުލަބުގެ ކޯޗުގެ ގޮތުގައި ރަސްމީކޮށް މާޝެރާނޯ ދައްކާލައިފަ އެވެ. އެ ކުލަބާ އޭނާ ހަވާލުވީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން 2027 ވަނަ އަހަރުގެ މޭޖާ ލީގު ސޮކާ (އެމެރިކާ ލީގު)ގެ ނިޔަލަށް އޭނާ އެ ކުލަބަށް އިރުޝާދު ދޭނެ އެވެ. މިއީ މާޝެރާނޯގެ ކޯޗިން ކެރިއަރުގައި އޭނާ ކުލަބަކަށް އިރުޝާދު ދޭނެ ފުރަތަމަ ފަހަރެވެ. 2022 ވަނަ އަހަރު ކޯޗިން ކެރިއަރު ފެށި މާޝެރާނޯ މީގެ ކުރިން އިރުޝާދު ދީފައި ވަނީ އާޖެންޓީނާގެ ޒުވާާން ޤައުމީ ޓީމަށެވެ.

މާޝެރާނޯ އިންޓަރ މިއާމީއާ ހަވާލުވެފައިވާއިރު، އެ ޓީމުގެ ކެޕްޓަން ލިއޮނަލް މެސީ އަކީ މާޝެރޯނާ އާއެކު އާޖެންޓީނާގެ ޤައުމީ ޓީމުގައި ކުޅެފައިވާ ދެ ކުޅުންތެރިންނެވެ. އޭނާ ވަނީ އާޖެންޓީނާ ޤައުމީ ޓީމަށް 147 މެޗު ކުޅެދީ، ތިން ލަނޑު ޖަހައިފަ އެވެ. 2003 ވަނަ އަހަރު އޭނާ އަށް ޤައުމީ ޓީމުން ޖާގަ ލިބުނުއިރު، 2018 ވަނަ އަހަރު ރަޝިޔާގައި އޮތް ފީފާ ވޯލްޑް ކަޕަށް ފަހު އޭނާ ވަނީ ޤައުމީ ޓީމަށް ކުޅުން ހުއްޓާލައިފަ އެވެ.