ހީނާ އެބަޖެހޭ މަގާމުން ދުރަށް ދާން: ރައީސް ޔާމީން
މީޑިއާ ހައުސް އެއީ އަދި ކުންފުންޏަކަށް ވިއަސް މިކަހަލަ ކަންކަމުގައި އަންނާނެ ޝަހުސީ ދައުވާ، މީހާގެ މައްޗަށް އަންނާނެ
ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕަރސަން ހީނާ ވަލީދު
ކަރަޕްޝަންގެ ބޮޑު ތުހުމަތެއް ކުރެވިފައިވާ "މޯލްޑިވްސް މީޑީއާ ހައުސް" ގެ މައްސަލައިގައި ސަރުކާރުގެ ތަރުޖަމާނު ހީނާ ވަލީދު މަގާމުން ދުރަށްވަޑައިގަންނަވަން ޖެހޭ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ސިލްސިލާކޮށް ޕީއެންއެފް އިން ބާއްވަމުންދާ ފްރޮންޓް އޮފީސް ޖަލްސާގައި ހޯމަ ދުވަހުގެ ރޭ ވާހަކަ ދައްކަވަމުން ރައީސް ޔާމީން ވިދާޅުވީ، ދައުލަތުގެ ފައިސާގެ އަދަދު އެ އޮތީ ފެންނަން ކަމަށާއި، އެ އޮތީ މަނީލޯންޑަރ ކޮށްފައި ކަމަށެވެ.
"މިހާ ހިސާބުން މުއިއްޒު އެބަ ވިދާޅުވެދެއްވަންޖެހޭ ރައްޔިތުން ކައިރީ، މޯލްޑިވްސް މީޑިއާ ހައުސްއަކީ ތިމަންނަގެ ތަނެއް ނޫނޭ. އެހެން ނުވާކަމަށްވަންޏާ މުޅި ރައްޔިތުން ގަބޫލު ކުރަނީ މުއިއްޒުގެ ޓީވީ ކަމަށް. ހީނާ އެބަޖެހޭ މަގާމުން ދުރަށްދާން. ހީނާ އަށް އެބަޖެހޭ މަނީ ލޯންޑަރިންގެ ދައުވާ އޭނާގެ މައްޗަށް އުފުލެން. މީޑިއާ ހައުސް އެއީ އަދި ކުންފުންޏަކަށް ވިއަސް މިކަހަލަ ކަންކަމުގައި އަންނާނެ ޝަހުސީ ދައުވާ. މީހާގެ މައްޗަށް އަންނާނީ." ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ ނަޒާހަތްތެރިކަމުން ބަލާ ކަމަށްވާނަމަ އެ ބޭފުޅުން ދުރަށްވަޑައިގަންނަވަންޖެހޭނެ ކަމަށެވެ. މިއީ ބޮޑު ސިންގާ މަނީލޯންޑަރިންގެ މައްސަލައެއް ކަމަށެވެ. ބަޔާންތައް ނެރެ ފާރުގަނޑުގައި ބޭސް އަޅާ ނައްޓާ ގޮތަށް މިކަން ކުރުމަކުން ގޯސްކޮށް ކޮށްފައި އޮތް ކަމެއް ރަނގަޅެއް ނުވާނެ ރައީސް ޔާމީން ވިދާޅުވިއެވެ.
"ގްޑްގަވަނަސްގެ ޕްރެކްޓިސްއަކީ މިކަހަލަ ނަޒާހަތްތެރިކަމެއްގެ ތުހުމަތު އައި ނަމަވެސް ޕަބްލިކް އޮފިސަރސް ދުރަށް ދާނެ. މިވާހަކަ ދައްކަން އުޅުނީމަ މަޖިލީހަކުން މިވާހަކަ ދެއްކިޔަ ނުދިން. މަޖިލީހުގައި މިކަން މަނާ މިވީ ޝަރީއަތަށް ސާބިތު ނުހިފޭ ކަންކަމުގެ ވާހަކަ މަޖިލީހުގައި ދައްކަވާތީ. ރައްޔިތުންގެ މަޖިލީހަކީ ސާބިތު ހިފޭ ވާހަކަ ދައްކާ ތަނެއްތަ؟" ރައީސް ޔާމީން ވިދާޅުވިއެވެ.
"އެމްއެމް ޓީވީ" ޗެނަލް އަކީ ރައީސް މުހައްމަދު މުއިއްޒު ޕްރޮމޯޓް ކުރުމަށް ރައީސް އޮފީހުގެ މިނިސްޓަރު އިބްރާހިމް ހަލީލް އިސްވެ ހުންނަވައި، ލޯންޗްކުރި ޓީވީ ޗެނެލް އެއް ކަމަށް މިހާތަނަށް ލިބިފައިވާ މައުލޫމާތު ތަކުން އިނގެއެވެ.
28 ނޮވެމްބަރ 2024 ވަނަ ދުވަހުގެ ރޭ ލޯންޗު ކުރި މި ޗެނެލް ހިންގާ ކުންފުނި ކަމުގައިވާ މޯލްޑިވްސް މީޑިއާ ހައުސް އާ އެންސްޕާ އާއި ދެމެދު ވަނީ 34.8 މިލިއަން ރުފިޔާގެ އެއްބަސްވުމެއް ހަދާފައެވެ.
ސޯޝަލް މީޑިއާގައި މި އެއްބަސްވުމާ ބެހޭ ލިޔެކިޔުންތައް ލީކުކޮށްލާފައި ވާއިރު، ޓެންޑާ ބޯޑް މެދުވެރިކޮށް ހަދާފައިވާ މި އެއްބަސްވުމުގެ ދަށުން އެ ގެއިން ދެ ފަންގިފިލާ ހިފާފައިވަނީ މަހަކު 580،000ރ އެންސްޕާ އިން ޚަރަދު ކުރާ ގޮތަށެވެ.
އެންސްޕާއިން ހިންގާފައިވާ ކަމަށް ތުހުމަތު ކުރެވޭ 34.8 މިލިއަން ރުފިޔާގެ ކަރަޕްޝަން ހިމެނޭ މި ޑީލުގެ ދަށުން، މީޑިއާ ހައުސްއިން ހަމަ އެ އިމާރާތުން 4 ފަންގިފިލާ ކުއްޔަށް ހިފާފައިވާ ކަމަށް ވެސް ބައެއް މަސްދަރުތަކުން ހާމާކޮށްފައިވެއެވެ.
މޯލްޑިވްސް މީޑިއާ ހައުސް އާއި އެންސްޕާ އާ ދެމެދު އިމާރާތް ކުއްޔަށް ހިފުމުގެ އެއްބަސްވުން ހެދި ކަމުގެ ވާހަކަތައް އާންމުވުމާ ގުޅިގެން 29 ނޮވެމްބަރު 2024 ގައި އެންސްޕާ އިން ނެރުނު ބަޔާނުގައި އެންސްޕާ އާ ބެހޭ ގޮތުން ނޫސްތަކުން ފަތުރަމުންދާ ވާހަކަތަކަކީ ހަގީގަތާއި ޚިލާފު ދޮގު ވާހަކަތަކެއް ކަމަށް ބުނެފައިވެއެވެ. އެ އޭޖެންސީ ހިންގުމަށް އިމާރާތެއް ހޯދުމުގެ މުއާމަލާތް ހިންގީ ފިނޭންސް މިނިސްޓްރީ އާ ގުޅިގެން ގަވައިދާ އެއްގޮތައް ކަމަށް ބުނެފައިވެއެވެ. އަދި 29 ނޮވެމްބަރ ގައި އެންސްޕާ އިން ވަނީ މި މައްސަލަ ތަހުގީގު ކުރުމަށް އެންޓި ކަރަޕްޝަން ކޮމިޝަން (އޭސީސީ) އަށް ހުށަހަޅާފައެވެ.
