އެންސްޕާގެ ކޮރަޕްޝަންގެ ތުހުމަތުތަކުގެ ވާހަކަ ދައްކަން ފެށުމުން ރިޔާސަތުން އެކަމަށް ތަކުރާރުކޮށް އެޅީ ހުރަސް

ހޯމަ ދުވަހު މަޖިލީހުގައި އެންސްޕާގެ ކޮރަޕްޝަންގެ ވާހަކަ ދައްކަން ފެށުމުން ރިޔާސަތުން އެކަމަށް ތަކުރާރުކޮށް ވަނީ ހުރަސްއަޅާފައެވެ. މިއީ މަޖިލީހުގެ އުސޫލުތަކާއި ވެސް ޚިޔާފު އަމަލެކެވެ.

ނޭޝަނަލް ޕްރޮޓެކްޝަން އެޖެންސީ އެންސްޕާ ހިންގަން ނަގާފައިވާ އިމާރާތުގައި ޓީވީއެއް ހިންގާތީ ހުށަހަޅާފައިވާ ކުއްލި މައްސަލަ ވެސް ހޯމަ ދުވަހު ވަނީ ބޭރުކޮށްލާފައެވެ. އެ މައްސަލަ އަކީ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ އޮފީސް ހިންގުމަށްޓަކައި ކުއްޔަށް ނަގާފައިވާ އިމާރާތުގެ ދެ ފްލޯގައި މޯލްޑިވްސް މީޑިއާ ހައުސް ޕްރައިވެޓް ލިމިޓެޑްއިން "އެމްއެމްޓީވީ" ގެ ނަމުގައި މީޑިއާއެއް ހިންގާތީ އެކަމުގެ ކަންބޮޑުވުން ފާޅުކޮށް، ރައްޔިތުންގެ މަޖިލީހަށް ހުށަހެޅި މައްސަލައެކެވެެ. އެ މައްސަލަ ހުށަހެޅީ ހޯމަ ދުވަހުއެވެ. މި ހުށަހަޅުއްވާފައި ވަނީ ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމެވެ.

އެ ކުއްލި މައްސަލަ ޝަރުތު ހަމަނުވާކަމަށް ނިންމުމަށް ފަހު ވަނީ ބޭރުކޮށްލާފައެވެ. އެހެންނަމަވެސް ހޯމަ ދުވަހު ކޮޕީރައިޓްގެ ޤާނޫނަށް ވާހަކަދައްކަވަމުން މީކާއިލް ވަނީ އެންސްޕާއިން ވެފައިވަނީ ޚިޔާނާތެއް ކަަމަށް ފާހަގަކުރައްވާ އެކަމާއި ދެކޮޅަށް އަޑު އުފުއްލަވާފައެވެ. އެންސްޕާގެ ކޮރަޕްޝަންގެ ވާހަކަ މީކާއިލް ދައްކަވަން ފެއްޓެވުމުން މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވަނީ އޭނާގެ ވާހަކަ ހުއްޓުވާފައެވެ. މީކާއިލް ވަނީ ކޮޕީރައިޓް ޤާނޫނުވެސް ގުޅެނީ ޚިޔާނާތާއި ކަމަށް ވިދާޅުވެފައެވެ. އެންސްޕާ ފޭރިގެން ނުވާނެ ކަމަށް މީކާއިލް ވިދާޅުވިއެވެ. މީކާއިލްގެ ވާހަކަ އަށް ލިބެން ޖެހޭ 4 މިނިޓް ފުރިހަމަ ނުވަނީސް އޭނާގެ މައިކުން ވަނީ އަޑު ކަނޑާލާފައެވެ. އެކަން މަޖިލީހުގެ ރައީސްގެ ސަމާލުކަމަށް ގެނައުމުން އަބްދުއްރަހީމް ވިދާޅުވި މަޖިލީސް ކުރިއަށް ގެންދަނީ އުސޫލާއި އެއްގޮތަށް ކަމަށެވެ. މީކާއިލްގެ ވާހަކަ އަށް ފުރުސަތު ނުދެއްވުމުން މީކާއިލް ވަނީ އެހެން މެމްބަރުންގެ ވާހަކަ ކުރިއަށް ގެންދަނިކޮށް ވެސް ނިޒާމީ ނުކުތާ ނަންގަވައިގެން އެކަމާއި މެދު ކަންބޮޑުވުން ފާޅުކުރައްވާފައެވެ. އޭގެ ފަހުން މީކާއިލް އަށް ފުރުސަތު ދެއްވުމަށް ފަހު ވެސް ވަކި ގޮތަކަށް ވާހަކަ ކުރިއަށް ނުގެންދިއުމުން ވާހަކަ މެދުުކަނޑާލާފައި އަލުން މީކާއިލްގެ ވާހަކަ އަށް ފުރުސަތު ދިނުމަށް އަބްދުއްރަހީމް ވަނީ ދެކޮޅުހައްދަވާފައެވެ.

މިއީ މަޖިލީހުގައި ފަހަކަށް އައިސް އާއްމުވަމުން އަންނަ ކަމެކެވެ. ތިމާމެން ނުރުހޭ ވާހަކައެއް ދައްކާ ނަމަ އެ ވާހަކަ ހުއްޓުވަނީއެވެ. މީކާއިލްގެ އިތުރުން ވައިކަރަދޫ ދާއިރާގެ މެމްބަރު ހުސެއިން ޒިޔާދު ވެސް ވަނީ ސަރުކާރުގެ ކިބައިގައި އަޑު އެހުމުގެ ޤާބިލްކަން ނެތްކަމަށް ފާހަގަކުރައްވާފައެވެ. އަދި އެންސްޕާ މެދުވެރިކޮށް ހިންގާ ކަމަށް ތުހުމަތުވާ ކޮރަޕްޝަންގެ އަމަލުތަކާއި މެދު ކަންބޮޑުވުން ފާޅުކުރެއްވިއެވެ. ޒިޔާދުގެ ވާހަކައަށް ވެސް ރިޔާސަތުންނާއި، ޕީއެންސީގެ މެމްބަރުން ވަނީ ތަކުރާރުކޮށް ހުރަސްއަޅާފައެވެ.

މިއަދު މަޖިލީހުގައި އޮތް މެޖޯރިޓީ ބޭނުންކޮށްގެން ޕީއެންސީގެ ކުލަ ނެތް ކޮންމެ މައިކެއްގެ އަޑު ކަނޑުވާލާ މަޑުކޮށްލަނީއެވެ. އެކަން ވެސް ތިމާމެން ކުރީމަ އޯކޭއެވެ. ކޮރަޕްޝަނާއި ޚިޔާނާތުގެ ވާހަކަ ދެއްކީމަ ކެތް ނުކުރެވޭނަމަ އެކަން ނުކުރެއްވީމަ، އެ ތުހުމަތުތައް ސާފުކޮށްދެއްވީމަ އެ ވާހަކަތައް ނިމިދާނެއެވެ. އެކަމަށް އޮތް ގޮތަކީ މެމްބަރުންގެ ވާހަކަ އަސް ހުރަސްއެޅުމެއް ނޫނެއް ނޫންތޯއެވެ.