ވޭޕް މަނާކުރުމާ ގުޅިގެން މިހާރުވެސް ރިސޯޓްތަކުން އެތައް ބުކިންގ އެއް ކެންސަލް ކޮށްފި: ސިޔާމް
ވޭޕް ބޭނުންކުރުމާއި، އެތެރެކުރުމާއި ވިޔަފާރިކުރުން މަނާކުރަން ރައީސް ޑރ. މުހައްމަދު މުއިއްޒު ނިންމެވިކަން އިއުލާންކުރެއްވީ އޮކްޓޯބަރ މަހުގެ 15 ވަނަ ދުވަހު
"ނޯ ސްމޯކިން އެވްލެވަންޑް" ނިޝާނެއް
ވޭޕް ބޭނުންކުރުމާއި، އެތެރެކުރުން އަދި ވިއްކުން މަނާކުރުމުން ލިބުނު ގެއްލުން ވަރަށް ބޮޑު ކަމަށާއި، ކުއްލި ކުއްލިއަކަށް އެފަދަ ބަދަލުތައް ގެނައުމުން ރާއްޖެ އައުމަށް ހަދާފައިވާ ބުކިންތައް ވަރަށް ގިނައިން ކެންސަލްވާ ކަމަށް ދ. މީދޫ ދާއިރާގެ މެންބަރު އަހުމަދު ސިޔާމް މުހައްމަދު ވިދާޅުވެެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުންނެވެ.
ވޭޕް ބޭނުންކުރުމާއި، އެތެރެކުރުމާއި ވިޔަފާރިކުރުން މަނާކުރަން ރައީސް ޑރ. މުހައްމަދު މުއިއްޒު ނިންމެވިކަން އިއުލާންކުރެއްވީ އޮކްޓޯބަރ މަހުގެ 15 ވަނަ ދުވަހުއެވެ. އަދި އެ އިސްލާހާއި އެކު ދުންފަތް ކޮންޓްރޯލުކުރުމާބެހޭ ގާނޫނަށް ފުރަތަމަ އިސްލާހު ގެނައުމުގެ ބިލު ރައީސުލްޖުމްހޫރިއްޔާ ޑރ.މުހައްމަދު މުއިއްޒު ތަސްތީގު ކުރެއްވީ ނިމިދިޔަ ނޮވެމްބަރު މަހުގެ ތެރޭގައެވެ. އެެހެންކަމުން އެ ބަދަލު ގެނައީ ވަރަށް ކުއްލިއަކަށް ކަމަށް ސިޔާމް ވިދާޅުވިއެވެ. ސަރުކާރުން ނިންމާ ކަންކަމުގެ ސަބަބުން އެތައް ބުކިންގ އެއް ދަނީ ކެންސަލް ކުރަމުން ކަަމަށް ސިޔާމް ވަނީ ވިދާޅުވެފައެވެ. އެގޮތުން ރާއްޖޭގެ ޤާނޫނުތަކާއި އުސޫލުތައް މާ ހަރުކަށީކަމަށް ޓުއަރިސްޓުން ބުނަމުންދާ ކަމަށް ސިޔާމް ވަނީ ވިދާޅުވެފައެވެ. ރާއްޖޭގެ ޤާނޫނުތަކަށް ބަދަލު އަންނަ ގޮތުން މާދަމާ އަންނާނެ ގާނޫނެއް ނޭނގޭ ކަމަށާއި އެކަމުގެ ސަބަބުން ފަތުރުވެރިން ރާއްޖެ އައުމަށް ޖެހިލުންވާތަން ފެންނަ ކަމަށް ސިޔާމް ވަނީ ވިދާޅުވެފައެވެ. އެ ފަދަ ބަދަލުތައް ގެންނަން ޖެހޭނީ ވަކި މުއްދަތެއް ދީ، ކަންކަން ހަމަޖައްސަން ވަގުތު ދީގެން ކަމަށް ސިޔާމް ވިދާޅުވިއވެެ.
ސިޔާމް ވިދާޅުވީ ރިސޯޓްތައް ހަދަނީ 12 ވަރަކަށް އަހަރު ދުވަހުގެ ފީސިބިލިޓީ އާއި އެކުގައި ބޮޑެތި ލޯނުތައް ނަގައިގެން ކަަމަށެވެ. އެހެންކަމުން މަޝްވަރާކުރުމަކާއި ނުލާ ޓެކްސް ބޮޑުކުރުމުން ވަރަށް ބޮޑު އަސަރެއް އެކަމުގެ ސަބަބުން ވިޔަފާރިވެރިންނަށް ކުރާ ކަމަށް ސިޔާމް ވަނީ ފާހަގަކުރައްވާފައެވެ. އެހެންކަމުން ޓެކްސް ނެގުމުގައި ވެސް ކަމާއި ގުޅުން ހުރި ފަރާތްތަކާއި މަޝްވަރާކުރުމަކާއި ނުލާ ކުއްލި ކުއްލިއަށް ބޮޑެތި ބަދަލުތައް ގެނައުމުން އެކަމުގެ ނޭދެވޭ އަސަރު ކުރާނެ ކަމަށް ސިޔާމް ވިދާޅުވިއެވެ. ދުނިޔެއަކީ މިހާރު ލާމެހިފައިވާ ތަނެއްކަމަށާއި ރާއްޖެއިން ނިންމާ އެފަދަ ނިންމުންތަކުގެ އަސަރު ރާއްޖެ އަށް އަންނަ ފަތުރުވެރިންގެ އަދަދަށް ސީދާގޮތުންނާއި ނުސީދާ ގޮތުން ކުރާ ކަމަށެވެ. ޓެކްސް ބޮޑުކުރުމުން ވެސް ޓެކްސްގެ ތެރެއިން ރިސޯޓްތަކުގެ އޯނަރުންނަށް 12 ވަރަކަށް މިލިއަން ޑޮލަރު ބޮޑުވެގެން ދިޔަ ކަމަށް ސިޔާމް ވަނީ ވިދާޅުވެފައެވެ. ސަރުކާރުން ޓެކްސް އަށް ކުއްލި ބަދަލެއް ގެނައުމުން އަގުތައް ހަމަޖެއްސުމުގައި ވެސް ދިމާވާ ކަމަށް ސިޔާމް ވިދާޅުވިއެވެ. އެގޮތުން އޮޕަރޭޓަރުންނާއި އެކު އަގު ނަގާފައި ހުންނަނީ ވަކި ރޭޓްތަކެއްގައި ކަމަށް ވުމާއި އެކު އެއަށް ވުރެ އަގު ބޮޑުވާނަމަ ބުކިންތައް ކުރަނީ ކެންސަލްކަމަށް ސިޔާމް ވަނީ ވިދާޅުވެފައެވެ.
