ދިވެހިރާއްޖޭގެ ހުރިހާ ސިޓީތަކާއި ރަށްތަކުގައި "ޓޮބޭކޯ ސިޒޭޝަން ކްލިނިކް" ޤާއިމުކުރުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމަވައިފި ކަމަށް ރައީސް އޮފީހުން ބުނެފިއެވެ.
ސިޔާސަތުތައް ކުއްލިކުއްލި އަށް ބަދަލު ކުރާ މި ސަރުކާރުން، އާންމު ކުރި ބަޔާނެއްގައި ބުނީ، ރައީސުލްޖުމްހޫރިއްޔާ މިގޮތަށް ނިންމެވީ އާދީއްތަ ދުވަހު ބޭއްވި ވަޒީރުންގެ މަޖިލީހުގެ ބައްދަލުވުމުގައި މިނިސްޓްރީ އޮފް ހެލްތުން ހުށަހެޅުއްވި ކަރުދާހަށް މަޝްވަރާ ކުރެއްވުމަށްފަހުގައި ކަމަށެވެ.
މި ކްލިނިކް ތަކުން ލިބޭނީ ކޮންކޮން ޚިދުމަތެއް ކަމެއް އަދި މިއީ ކޮން ފެންވަރަކަށް ހިންގާ ތަންތަން ކަމެއް ރައީސް އޮފީހުން ހާމަކޮށްފައެއް ނުވެއެވެ.
ރަށްރަށުގައި ހިނގަމުންދާ ހެލްތު ސެންޓަރުތަކަށާއި އަތޮޅު ހޮސްޕިޓަލުތަކަށް ބޭނުންވާ ވަސީލަތްތައް ނުލިބުމުގެ ޝަކުވާ އިތުރުވެފައިވާ މިދަނޑިވަޅުގައި ރާއްޖޭގެ ހުރިހާ ރަށެއްގައި "ޓޮބޭކޯ ސިޒޭޝަން ކްލިނިކް" ޤާއިމުކުރުމަށް ނިންމެވި ނަމަވެސް ދެމެހެއްޓެނިވި ގޮތެއްގައި އެތަންތަން ހިންގޭނެ ކަމާ މެދު ސުވާލު އުފެދެއެވެ.
މިނިސްޓްރީ އޮފް ހެލްތުން ހުށަހެޅުއްވި މި މައްސަލައާ ގުޅިގެން، ދުންފަތުގެ އިސްތިޢުމާލު ކުރުން ހުއްޓާލަން ބޭނުންވާ ފަރާތް ތަކަށް ބޭނުންވާ ބޭސް، އެސް.ޓީ.އޯ މެދުވެރިކޮށް ރާއްޖޭގެ ހުރިހާ ސިޓީތަކާއި އަތޮޅު ހޮސްޕިޓަލް ޤާއިމުކޮށްފައިވާ ރަށްތަކުން ލިބޭނެ އިންތިޒާމު ހަމަޖެއްސުމަށް ރައީސުލްޖުމްހޫރިއްޔާ ނިންމަވާފައިވާ ކަމަށް ވެސް ރައީސް އޮފީހުން ބުނެފައިވެއެވެ.
މީގެ އިތުރުން، ޞިއްޙީ ޚިދުމަތް ފޯރުކޮށްދޭ ހުރިހާ ތަނެއްގައި، ޞިއްޙީ ޚިދުމަތް ދިނުމުގެ ޤާނޫނުގެ ދަށުން ޕްރިވެންޓިވް ހެލްތު ކެއަރގެ ޚިދުމަތެއްގެ ގޮތުގައި ސިޒޭޝަންގެ ޚިދުމަތް ދިނުމަށް ރައީސުލްޖުމްހޫރިއްޔާ ހަމަޖައްސަވާފައިވެއެެވެ.
ސަރުކާރުން ވަނީ ސިނގިރޭޓާއި ބިޑި ސުއްޓާ އާއި ދުންފަތުގެ އިސްތިޢުމާލު ކުރުމަށާއި، ވޭޕް ކުރުމަށް ބޭނުންކުރާ އިލެކްޓްރޯނިކް ވަސީލަތްތަކުގެ އިމްޕޯޓް ޑިއުޓީއަށް ބޮޑެތި ބަދަލުތަކެއް ގެނެސްފައެވެ. ދުންފަތުގެ ބާވަތްތަކުން ބޮޑު ކުރި ޑިއުޓީން ސަރުކާރަށް ބޮޑު އާމްދަނީ އެއް ލިބޭނެ ކަމަށް އަންނަ އަހަރުގެ ބަޖެޓުގައި ވަނީ ހިމަނާފައެވެ.
