އެމީހުން ވަނީ ކަންބޮޑުވުންތައް ހިއްސާ ކޮށްފަ
ކްލިނިކް ތަކުގެ ވެރިންނާ ހެލްތު މިނިސްޓަރ ބައްދަލު ކުރައްވަނީ
ހެލްތު މިނިސްޓަރު އަބްދުﷲ އަމީން، ކްލިނިކްތަކުގެ އިސް ވެރިންނާ އާދީއްތަ ދުވަހު ބައްދަލުކުރައްވައިފިއެވެ.
ހެލްތު މިނިސްޓްރީގައި އޮތް މި ބައްދަލުވުމުގައި 40 ކްލިނިކެއްގެ އިސްވެރިން ބައިވެރިވެވަޑައިގެންނެވިއެވެ. އަދި އެ ބޭފުޅުންނަށް ދިމާވާ މައްސަލަތަކާ ގުޅޭގޮތުން ވަނީ ހެލްތު މިނިސްޓަރު އަމީންއާ އެކު މަޝްވަރާ ކުރައްވާފައެވެ.
ހެލްތު މިނިސްޓްރީގެ އިސް އޮފިޝަލަކު ވިދާޅުވީ، ސަރުކާރުގެ ސިޔާސަތުތައް ތަންފީޒު ކުރުމުގައި ދާއިރާގެ ތަޖުރިބާކާރުންގެ ހިޔާލު ހޯދުމަކީ ވަރަށް މުހިއްމު ކަމެއް ކަމަށެވެ. އެހެންވެ، ސިއްހީ ދާއިރާއާ ގުޅޭ ކަންކަން އާ ސަރުކާރުން ތަންފީޒު ކުރުމުގައި ތަޖުރިބާކާރުންގެ ފަންނީ ލަފަ އާއި އިރުޝާދު ހޯދާނެ ކަމަށްވެސް އޮފިޝަލް ވިދާޅުވިއެވެ.
އޭނާ ވިދާޅުވީ އެބައްދަލު ކުރެއްވުމަކީ ކްލިނިކްތަކަށް ދިމާވާ މައިގަނޑު ގޮންޖެހުންތަކާއި އެކަންތައް ހައްލުކުރަން ކުރެވޭނެ ކަންތައްތަކާ ގުޅޭގޮތުން މަޝްވަރާ ކުރެއްވުމަށްޓަކައި މިނިސްޓަރު ބޭއްވި ބައްދަލުވުމެއް ކަމަށާއި އެންމެ ބޮޑަށް ފާހަގަކުރެވިފައި ވަނީ ޑޮކްޓަރުން ހޯދުމާއި ރަޖިސްޓަރީ ކުރުމާ ގުޅޭ ޝަކުވާތައް ކަމަށެވެ.
