ސިވިލް ސަރވިސްއިން ބަންޑާރަ ނައިބުގެ އޮފީސް ވަކިކުރާ ގޮތަށް ހަމަޖައްސާ އެ އޮފީހުގެ ޚިދުމަތްތައް ވަކި ޚިދުމަތަކަށް ހެދުމަށްޓަކައި ރައްޔިތުންގެ މަޖިލީހަށް ބިލެއް ހުށަހަޅައިފިއެވެ.
އެ ބިލް ހުށަހަޅުއްވާފައި ވަނީ، ސަރުކާރުގެ ފަރާތުން މާފަންނު ދެކުނު ދާއިރާގެ މެންބަރު އަބްދުﷲ ރިފާއުއެވެ. ހޯމަ ދުވަހުގެ ޖަލްސާއަށް އެ ބިލު ތައާރަފުކޮށް ބިލުގެ ފުރަތަމަ ކިޔުން ވަނީ އިއްވާފައެވެ.
ބިލުގައި ބުނެފައިވާ ގޮތުގައި، ގާނޫނުއަސާސީގެ 133 ވަނަ މާއްދާގެ (ހ) ގެ ދަށުން ބަންޑާރަނައިބުގެ މަގާމަށް އައްޔަނުކުރާ ފަރާތެއްގެ ކިބައިގައި ހުންނަންޖެހޭ ޝަރުތުތަކުގެ އިތުރުން ބަންޑާރަނައިބުގެ ޒިންމާތަކާއި މަސްއޫލިއްޔަތުތައް ކަނޑައެޅުމަކީ މި ބިލްގެ މަޤްސަދެކެވެ. މީގެ އިތުރުން ބަންޑާރަނައިބުގެ ޒިންމާތަކާއި މަސްއޫލިއްޔަތުތައް އަދާކުރާއިރު ބަންޑާރަނައިބު ތަބާވާންޖެހޭ އުސޫލުތަކާއި ހަމަތައް ކަނޑައެޅުމަކީ ވެސް ބިލުގެ އަމާޒެއް ކަމަަށް ބުނެފައިވެއެވެ.
ބަންޑާރަ ނައިބުގެ ޒިންމާތަކާއި މަސްއޫލިއްޔަތުތައް އަދާކުރުމުގައި ބަންޑާރަނައިބުގެ އޮފީހުގެ ނަމުގައި ސިވިލް ސަރވިސްގައި ނުހިމެނޭ ސަރުކާރުގެ ވަކި އޮފީހެއް ގާއިމުކުރުމަށް ބިލުގައި ވަނީ ހިމަނާފައެވެ. އެ ބިލުގައި އެ އޮފީހުގެ މަސައްކަތްތައް ރާވާ ހިންގާނެ ގޮތާއި އެ އޮފީހުގެ މުވައްޒަފުންނާ ގުޅޭ ހުރިހާ އުސޫލީ ކަންކަން ކަނޑައެޅުމަށް ބޭނުންވާ ގާނޫނީ އޮނިގަނޑު އެކުލަވާލުމަށް ވަނީ ހިމަނާފައެވެ.
މިހާރު ބަންޑާރަނައިބުގެ އޮފީސް ހިންގަމުން ދަނީ ސިވިލް ސާވިސްގެ ދަށުންނެވެ.
އާ ބިލުގައި ބަންޑާރަނައިބުގެ މަސްއޫލިއްޔަތުތަކާއި ގާނޫނީ ބާރުތައް ތަފްސީލުކޮށްދީފައިވެއެވެ. އެ ބިލުގައި ބުނެފައި ވަނީ ބަންޑާރަނައިބުގެ މަސްއޫލިއްޔަތުތަކާއި ވާޖިބުތައް އަދާކުރުމުގައި ބަންަދާރަނައިބު ތަބާވާނީ ހަމައެކަނި ގާނޫނުއަސާސީއަށާއި ގާނޫނަށް ކަމަށެވެ. އެ ނޫން އެއްވެސް މީހެއް ނުވަތަ އިދާރާއެއްގެ ބާރެއް ނުވަތަ ނުފޫޒެއް އޭނާގެ މައްޗަށް ނުފޯރާނެ ކަމަށް ބިލުގައި ބުނެފައިވެއެވެ.
ބިލުގައި ބަންޑާރަނައިބުގެ މަގާމުގައި ހުރި މީހަކު ކޮށްގެން ނުވާނެ ކަންތައްތައް ވެސް ހިމަނާފައިވެއެވެ. އެގޮތުން މަގާމުގެ ހައިސިއްޔަތުން ނޫން ގޮތަކަށް ސަރުކާރުގެ ނުވަތަ ދައުލަތުގެ އެހެން މަގާމެއް ނުވަތަ ފައިދާއެއް ލިބޭފަދަ އެނޫންވެސް މަގާމެއް އަދާކޮަސް، އެހެން ފަރާތެއްގެ ވަޒީފާއެއް އަދާ ނުކުރެވޭނެ ކަމަަށް ބުނެފައިވެއެވެ. އަދި ވިޔަފާރިއެއް ހިންގުމުގައި އަމަލީގޮތުން ބައިވެރި ނުވެވޭނެ ކަމަަށާ، އާމްދަނީއެއް ހޯދުމަށް ފަންނީ މަސައްކަތެއްގައި ޝާމިލުވުން ނުވަތަ އާމްދަނީއެއް ލިބޭފަދަ އެހެން އެއްވެސް މަސައްކަތެއް ނުކުރެވޭނެ ކަމަަށް ވަނީ ބުނެފައެވެ.
މީގެ އިތުރުން ދައުލަތުގެ މުދަލާއި ބިން ގަނެ ކުއްޔަށް ހިފުމާއި، ދައުލަތާއި އެހެން ފަރާތަކާ ދެމެދު ކުރެވޭ މުއާމަލާތެއްގައި ބަންޑާރަ ނައިބުގެ މަސްލަހަތު ބޭއްވުމަކީ ވެސް ކުރެވޭނެ ކަމެއް ނޫނެވެ. އަހަރަކު އެއް ފަހަރު ބަންޑާރަނައިބުގެ މިލްކިއްޔާތުގައިވާ މުދަލާއި ފައިސާގެ ހިސާބުތަކާއި ވިޔަފާރީގެ މަސްލަހަތުތަކާއި އަރަންޏާއި ދަރަނި ހާމަކުރުމަަސް ފަހު އޮޑިޓާ ޖެނެރަލަށް ހުށަހަޅަންޖެހޭނެ ކަމަށް ވެސް އެ ބިލުގައި ބުނެފައިވެއެވެ.
