އެންސްޕާ ހިންގަން ނަގާފައިވާ އިމާރާތުގައި ޓީވީއެއް ހިންގާތީ ހުށަހެޅި ކުއްލި މައްސަލަ ބޭރުކޮށްލައިފި
މި ހުށަހެޅުއްވާފައި ވަނީ ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމެވެ
މީކާއިލް ނަސީމް
ނޭޝަނަލް ޕްރޮޓެކްޝަން އެޖެންސީ އެންސްޕާ ހިންގަން ނަގާފައިވާ އިމާރާތުގައި ޓީވީއެއް ހިންގާތީ ހުށަހަޅާފައިވާ ކުއްލި މައްސަލަ ބޭރުކޮށްލައިފިއެވެ.
އެ މައްސަލަ އަކީ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ އޮފީސް ހިންގުމަށްޓަކައި ކުއްޔަށް ނަގާފައިވާ އިމާރާތުގެ ދެ ފްލޯގައި މޯލްޑިވްސް މީޑިއާ ހައުސް ޕްރައިވެޓް ލިމިޓެޑްއިން "އެމްއެމްޓީވީ" ގެ ނަމުގައި މީޑިއާއެއް ހިންގާތީ އެކަމުގެ ކަންބޮޑުވުން ފާޅުކޮށް، ރައްޔިތުންގެ މަޖިލީހަށް ހުށަހެޅި މައްސަލައެކެވެެ. އެ މައްސަލަ ހުށަހެޅީ ހޯމަ ދުވަހުއެވެ.
އެ ކުއްލި މައްސަލަ ޝަރުތު ހަމަނުވާކަމަށް ނިންމުމަށް ފަހު ވަނީ ބޭރުކޮށްލާފައެވެ.
މި ހުށަހަޅުއްވާފައި ވަނީ ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމެވެ. މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ އެ މައްސަލަ ލިބިފައިވީ ނަމަވެސް އެ މައްސަލައިގެ ޝަރުތު ހަމަނުވާ ކަމަށެވެ. އެހެންކަމުން އެ ބަލައިގަނެވެން ނެތް ކަމަށް އޭނާ ވިދާޅުވިއެވެ.
އެ ކުއްލި މައްސަލާގައި އެންސްޕާގެ އޮފީސް ހިންގުމަށްޓަކައި އިމާރާތެއް ކުއްޔަށް ނެގުމަށް 25 ޖޫންގައި ނޭޝަނަލް ޓެންޑާ ބޯޑު މެދުވެރިކޮށް ކޮށްފައިވާ އިއުލާނާ ގުޅިގެން ބިޑު ހުށަހެޅި ފަރާތްތަކުގެ ތެރެއިން މޯލްޑިވްސް މީޑިއާ ހައުސް ޕްރައިވެޓް ލިމިޓެޑް ކިޔާ ކުންފުންނަކަށް އެ ބިޑު އެވޯޑުކޮށްފައިވާ ކަމަށް ވަނީ ބުނެފައެވެ. އަދި އެކަން ކޮށްފައި ވަނީ އުސޫލާއި ޚިލާފަށް ކަމަށް ވަނީ ބުނެފައެވެ.
އެގޮތުން އެ އިމާރާތުގެ ހަތަރު ފްލޯގެ ފަސް އަހަރު ދުވަހުގެ ކުއްޔަށްވާ ފައިސާގެ ގޮތުގައި 34.8 މިލިއަން ރުފިޔާ އެކީ އެއްފަހަރާ ދިނުމަށް ފަހުއެ ކުންފުނިން ހަތަރު ފްލޯ ކުއްޔަށް ހިފިކަމަށް އެ މައްސަލައިގައި ބުނެފައިވެއެވެ އޭގެ ތެރެއިން ދެ ފްލޯ އެމްއެމްޓީވީ ހިންގުމުގެ ގޮތުން އެއްވެސް ކުއްޔަކާ ނުލާ އެ ކުންފުންޏަށް ދީފައިވާކަމަށް މީސްމީޑިއާގައާއި، އެކިއެކި މަންސަތަކުގައި ތުހުމަތުކުރެވެމުންދާ ކަމަށް މީކާއިލް ހުށަހެޅުއްވި ކުއްލި މައްސަލައިގައި ވަނީ ބުނެފައެވެ.
