ތުއްތު އަށް ކުރާ ތުހުމަތުތަކުގެ ތެރޭގައި އަނިޔާއެއް ދީފާނެ ކަމަށް ބިރު ދެއްކުމުގެ ތުހުމަތު ހިމެނޭ - ވަކީލް
1 ޑިސެމްބަރު 2024 | އާދީއްތަ 14:08ތުއްތު ފުލުހަށް ހާޒިރުކުރާތީ އާއްމުންގެ އިތުރުން ސިޔާސީ ފަރާތްތަކުން ވަނީ ކަންބޮޑުވުން ފާޅުކޮށްފަ
ޝާފިއު (ތުއްތު) ފުލުހަށް ހާޒިރުކުރުމުގެ ތެރެއިން
އިދިކޮޅު އެމްޑީޕީގެ އެކްޓިވިސްޓު ހުސެން ޝާފިއު (ތުއްތު) އަށް ކުރާ ތުހުމަތުތަކުގެ ތެރޭގައި އަނިޔާއެއް ދީފާނެ ކަމަށް ބިރު ދެއްކުމުގެ ތުހުމަތު ހިމެނޭ ކަމަށް ޝާފިއުގެ ވަކީލު އިބްރާހިމް ޝިޔާން ވިދާޅުވެއްޖެ އެވެ.
އޭނާ އެފަދައިން ވިދާޅުވީ އެމްޑީޕީގެ ސޯޝަލް މީޑިއާ އެކްޓިވިސްޓް ހުސެއިން ޝާފިއު (ތުއްތު) ފުލުހަށް ހާޒިރުކުރުމަށް ފަހު ނޫސްވެރިންނަށް މައުލޫމާތުދެއްވަމުންނެވެ.
އޭނާ ވަނީ ޝާފިއު އަށް ކުރާ ތުހުމަތުތަކުގެ ތަފްސީލްތަަކަށް އަލިއަޅުވާލައްވާފައެވެ. އެގޮތުން (ޗާލީ ތުއްތު) ހޭންޑަލްއިން ކޮށްފައިވާ ތުހުމަތާއި ގުޅިގެން އާދިއްތަ ދުވަހު ޝާފިއު ފުލުހަށް ހާޒިރުކުރިއިރު އޭނާގެ މައްޗަށް ތިން ތުހުމަތެއް ފުލުހުން ކުރާ ކަމަށް ވަކީލް ވަނީ ފާހަގަކުރައްވާފައެވެ. އޭގެ ތެރޭގައި ހިމެނެނީ އަނިޔާއެއް ދީފާނެކަމުގެ ބިރު ދެއްކުމުގެ ތުހުމަތާއި، މީހެއްގެ ހަށިގަނޑަށް ބޮޑު އަނިޔާއެއް ލިބިދާނެ ފަދަ ބިރެއް ކުރިމަތިކުރުމުގެ ތުހުމަތުގެ އިތުރުުން ހަޑި ހުތުރު އެއްޗެއްކަން އެނގި ހުރެ އަދި ހަޑިހުތުރު އެއްޗެއް ހިމެނޭ ވަސީލަތެއް ޝާއިއުކޮށް ހިއްސާ ކުރުމާއި އާންމުކޮށް ހުޅުވާލައިގެން ދައްކާ ފޯރުކޮށްދިނުމުގެ ތުހުމަތެވެ. އެހެންނަމަވެސް އެ ޓްވީޓުގެ ސަބަބުން އަނިޔާ ރައްދުވަނީ ކާކަށް ކަން އަދި ބިރުވެރިކަން ރައްދުވަނީ ކާކަށްކަން ފުލުހުންނަށް ބުނެދެވިފައި ނުވާ ކަމަށް ވަކީލް ޝާފިއު ވިދާޅުވިއެވެ. އަދި ތަކުރާރުކޮށް ސުވާލުކޮށްގެން ވެސް އެ ޓްވީޓުން ވަކި މީހަކަށް ނިސްބަތްވާ ގޮތަށް ދޭހަވާ ކަމެއް ސާފުކޮށް ބުނެ ނުދެވުނު ކަމަށް ވަނީ ފާހަގަކުރައްވާފައެވެ.
@ޗާލީ_ތުއްތު ހޭންޑްލް އިން ހަޑިހުތުރު ބަސް ބޭނުން ކޮށް ބިރުވެރިކަން އުފެދޭ ގޮތައް އެކްސް ގައި ޕޯސްޓެއްކޮށްފައިވާ މައްސަލައިގެ ތުހުމަތުގައި ސުވާލުކޮށް ބަޔާން ނެގުމަށް ޝާފިއު ފުލުހަށް ހާޒިރުކޮށްފައި ވަނީ އާދިއްތަ ދުވަހު މެންދުރު 01:30ގައެވެ. ފުލުހަށް ހާޒިރުވުމަށް ފަހު ނޫސްވެރިންނަށް މައުލޫމާތުދެމުން ޝާފިއު ވަނީ އުސޫލައި ޚިލާފުކަމެއް ކޮށްފައި ނުވާނެކަމަށް ބުނެފައެވެ. އަދި ހަޑިހުތުރުބަސްވެސް ބޭނުންކޮށްފައި ނުވާނެ ކަަމަށް ޝާފިއު ވަނީ ބުނެފައެވެ. ޝާފިއުވެސް ވަނީ ފުލުހުންނަށް އޭނާގެ ޓްވީޓުގެ ސަބަބުން އަނިޔާ ލިބޭ މީހެއް ބުނެ ނުދެވޭކަން ފާހަގަކޮށްފައެވެ.
ތުއްތު ފުލުހަށް ހާޒިރުކުރާތީ އާއްމުންގެ އިތުރުން ސިޔާސީ ފަރާތްތަކުން ވަނީ ކަންބޮޑުވުން ފާޅުކޮށްފައެވެ. އެގޮތުން ސަރުކާރަށް ފާޑުކިޔުން އަމާޒުކުރުމަކީ ކުށެއް ކަމަށް ހެދުމުގެ މާޒީ އިއާދަކުރުމަކީ ކަންބޮޑުވެވަޑައިގަންނަވާ ކަމެއް ކަމަށް ކުރީގެ ރައީސް އިބްރާޙިމް މުހައްމަދު ޞާލިހު ވަނީ ވިދާޅުވެފައެވެ.
