އައްޑޫގައި ހުރި ވެލިފުންޏެއް މިނިސްޓްރީގެ ބެލުމުގެ ދަށަށް: ''މިއީ ރައްޔިތުންނާއި ''ތޮޅެން'' މަގުފަހި ކުރަން ހިންގާ އަމަލެއް''
ހަންކެޑެ ބްރިޖް އެޅުމަށް ހެދިފައިވާ ފަސްގަޑުގައި ހުރި ވެލި ރައްޔިތުންގެ ބޭނުންތަކަށް ދޫކުރަން ވަނީ ނިންމާފައި
އައްޑޫ ސިޓީގެ މޭޔަރު އަލީ ނިޒާރު
އައްޑޫ ސިޓީގައި ހުރި ވެލިފުންޏެއް ކޮންސްޓްރަކްޝަން މިނިސްޓްރީގެ ބެލުމުގެ ދަށަށް ގެންދިއުމުން އެސިޓީގެ މޭޔަރު އަލީ ނިޒާރު ކަންބޮޑުވުންފާޅު ކޮށްފިއެވެ.
މޭޔަރު ނިޒާރު ވިދާޅުވީ އައްޑޫ ސިޓީ ހަންކެޑެ ބްރިޖް އެޅުމަށް ހެދިފައިވާ ވަގުތީ ފަސްގަޑުގައި ހުރި ވެލި، އަބުރާ ނެގުމަށްފަހު ރައްޔިތުންގެ ބޭނުންތަކަށް އެވެލި ބޭނުންކުރުމަށް ކައުންސިލްއިން މަސައްކަތް ކުރަމުން ދިޔަ ކަމަށެވެ.
ނަމަވެސް އެއްވެސް މަޝްވަރާއެއް ކުރުމެއްނެތި ކޮންސްޓްރަކްޝަން މިނިސްޓްރީގެ އެންޖިނިއަރުން ލައްވާ ސޮއިކުރުވައި އެވެލި މިނިސްޓްރީގެ ބެލުމުގެ ދަށަށް ގެންދެވިފައިވާ ކަމަށް އަންގާފައިވާ ކަމަށް މޭޔަރު ނިޒާރު ވިދާޅުވިއެވެ. އަދި ވިދާޅުވީ މިއީ ދައުލަތް ހިންގަން ހެދިފަހުރި ގާނޫނުތަކާއި ފުށުއަރާ ޖާހިލު ނިންމުމެއް ކަމަށެވެ.
ރައްޔިތުންނާއި ''ތޮޅެން'' މަގުފަހި ކުރަން ހިންގާ އަމަލެއްކަން ފާހަގަކުރައްވައި މޭޔަރު ނިޒާރު ވިދާޅުވީ މިއީ ލާމަރުކަޒީ ގާނޫނު ފުޑާލަން އިތުރު ކުރި ބޮޅެއް ކަމަށާއި، ގާނޫނާއި، ހަމައާއި އުސޫލުން ބޭރުން އަންގާ އެންގުންތަކަށް އައްޑޫ ސިޓީ ކައުންސިލްއިން އަމަލު ނުކުރާނެ ކަމަށެވެ.
މޭޔަރު ނިޒާރު ވިދާޅުވީ ކަންކަން ނިންމުމުގައި މަޝްވަރާ އިސްކޮށް ދައުލަތް ހިންގުމުގެ ޒަމާނީ ހަމަތަކަށް ފަރިތަވާންޖެހޭ ކަމަށެވެ.
މިމައްސަލައާ ގުޅިގެން މޭޔަރު ނިޒާރަަށް ރައްދު ދެއްވައި ކޮންސްޓްރަކްޝްނަ މިނިސްޓަރު، އަބްދުﷲ މުއްތަލިބު ވިދާޅުވީ، މިނިސްޓްރީގެ ހުއްދަނެތި އެވެލި ބޭނުން ނުކުރުމަށް އެދުނީ އައްޑޫ ސިޓީގެ ލިންކު ރޯޑު އަލުން ހެދުމުގައި ގިނަ އަދަދަކަށް ވެލި ބޭނުންވެދާނެ ކަމަށް ފެންނާތީ ކަމަށާއި، އައްޑޫ އަކީ ފަސޭހައިން ވެލި ނެގެން އޮތް ތަނަކަށްނުވާތީ ކަމަށެވެ.
މިނިސްޓަރު މުއްތަލިބު ވިދާޅުވީ މިވަގުތު އައްޑޫ ސިޓީގެ ލިންކު ރޯޑު އަލުން ހެދުމަށްވުރެ އައްޑޫ ސިޓީގެ ރައްޔިތުންނަށް އެވެލި ބޭނުންކުރަން ޖެހޭ އެހެން މުހިއްމު ކަމެއްވާނަމަ ކައުންސިލުން އެދުމުން އެވެލި ދޫކުރުމަށް މިނިސްޓްރީ އިން ދެކޮޅެއް ނުހަދާނެ ކަމަށެވެ.
