ސްޓެލްކޯ ޑިސްޓިރިބުއަޝަން ފޮށިތަކުގައި ހިތްޕާފައި ހުންނަ ތަކެތި ނެއްޓުމުގެ ރަސްމިއްޔާތު ވަޒީރުންގެ ފެންވަރުގައި ބާއްވައިފި

މާލޭގެ މަގުތަކުގައި ހުންނަ ސްޓެލްކޯގެ ޑިސްޓްރިއުބިއުޝަން ފޮށިތަކުގައި ހިތްޕާފައި ހުންނަ ތަކެތި ނައްޓާ ސާފު ކުރުމުގެ މަސައްކަތް ވަޒީރުންގެ ފެންވަރުގައި ފަށައިފިއެވެ.

ވަރަށް އަދައިގެ ކަންކަމަށް ބޮޑެތި ޚަރަދުތައް ކޮށްގެން ރަސްމިއްޔާތުތައް ބާއްވާ ކަމަށް މަޝްހޫރު މުއިއްޒުގެ ސަރުކާރުން، ޑިސްޓްރިބިއުޝަން ފޮށިތަކުގައި ހަރުކޮށްފައި ހުންނަ ޕޯސްޓަރު، އިސްތިހާރު ފަދަ ތަކެތި ނެއްޓުމުގެ ހަރަކާތް ފެށުމުގެ ގޮތުން ހޮނިހިރު ދުވަހު ހަވީރު މާލޭގައި ޚާއްސަ ރަސްމިއްޔާތެއް ވަނީ ބާއްވާފައެވެ.

މި ރަސްމިއްޔާތު ޝަރަފްވެރިކޮށްދެއްވީ އެންވަޔަރަންމަންޓް މިނިސްޓަރ ތޯރިގް އިބްރާހީމް އާއި ސްޓެލްކޯގެ މެނޭޖިން ޑިރެކްޓަރ ޙުސައިން ފަހުމީ އާއި މާލޭ ސިޓީގެ މޭޔަރ އާދަމް އާޒިމް އެވެ.

ޑިސްޓްރިބިއުޝަން ފޮށިތައް ސާފުކުރަން ފެށުމުގެ ގޮތުން އޮތީ އަންގި ލައްވައިގެން ތިއްބެވި އިއްޒަތްތެރިން އިސްކަރާބެއް ބޭނުން ކޮށްގެން ފޮށިތަކުގެ ބޭރުގައި ހިތްޕާފައި ހުރި އެއްޗެހި ނެއްޓުމެވެ.

ސްޓެލްކޯގެ ސަބް ސްޓޭޝަންތަކާއި މަގުމަތީގައި ހުރި ޑިސްޓްރިބިއުޝަން ފޮށިތަކުގައި ހަރުކޮށްފައިވާ އިޝްތިހާރު ފަދަ ތަކެތި ނެއްޓުން ފެށުމުގެ ރަސްމިއްޔާތުގައި ތިމާވެށްޓާ ބެހޭ ވަޒީރު ތޯރިޤް އިބްރާހީމް ވިދާޅުވީ ސްޓެލްކޯގެ ޓިސްޓްރިބިއުޝަން ފޮށި ތަކަކީ ސާފު ކުރަން ޖެހޭ ތަންތަން ކަމަށެވެ.

އަދި ދާއިމީ ކޮށް ސާފުކުރާނެ ގޮތެއް ނެތީމަ ވަރަށް އުނދަގޫ ވާނެ ކަމަށް ވެސް މިނިސްޓަރ ތޯރިގް ވިދާޅުވިއެވެ.

ސްޓެލްކޯގެ މެނޭޖިން ޑިރެކްޓަރ ޙުސައިން ފަހުމީ ވެސް ވަނީ މި ޕްރޮގްރާމް ދެމެހެއްޓެނިވި ގޮތެއްގައި ކުރިއަށް ގެންދިއުން މުހިންމު ކަމަށް ވިދާޅުވެފައެވެ. ފަހުމީ ވިދާޅުވީ، ސްޓެލްކޯގެ މުވައްޒަފުން މިކަން ކުރިއަށް ގެންދަން އެހީތެރިކަން ދޭނެ ކަމަށެވެ.