ކުޓީނިއޯ ހޯދަން 125 މިލިއަން ޔޫރޯ ހުށަހެޅުމުން ވެސް ލިވަޕޫލް އިން ރިޖެކްޓް ކޮށްފި
18 އޯގަސްޓު 2017 | ހުކުރު 19:02ބާސާ އިން ވަނީ ކުޓީނިއޯ އަށް މީގެކުރިންވެސް ބިޑްކޮށްފައި
ލިވަޕޫލް އަށް ކުޅެމުން އަންނަ ފިލިޕޭ ކުޓީނިއޯ
ލިވަޕޫލް އަށް ކުޅެމުން އަންނަ ފިލިޕޭ ކުޓީނިއޯ ހޯދުމަށް ބާސެލޯނާ އިން 125 މިލިއަން ޔޫރޯ ހުށަހެޅުމުން ވެސް ލިވަޕޫލް އިން އެކަން ރިޖެކްޓް ކޮށްފި އެވެ.
ބްރެޒިލްގެ ފޯވާޑް ކުޓީނިއޯ ހޯދުމަށް ބާސާ އިން ވަނީ މީގެކުރިން ވެސް ދެފަހަރެއްގެ މަތިން ރަސްމީކޮށް ހުށަހަޅާފައެވެ. އެހެން ނަމަވެސް އެ ދެ ފަހަރު ވެސް ލިވަޕޫލް އިން ވަނީ އެކަން ރިޖެކްޓް ކޮށްފައެވެ.
ބާސެލޯނާގެ ޓްރާންސްފާ ބަޖެޓް ވަނީ ނޭމާ ޕީ.އެސް.ޖީއަށް ބަދަލުވުމާއެކު ވަރަށް ބޮޑުތަން އިތުރުވެފައެވެ. ނޭމާ ޕީ.އެސް.ޖީއަށް ބަދަލުވެފައި ވަނީ 200 މިލިއަން ޕައުންޑަށެވެ. މިއި ދުނިޔޭގެ ރިކޯޑެކެވެ. އަދި މި ފައިސާ ޚަރަދު ކުރެވޭނީ އަންނަ ސީޒަނަށް ޓީމު ވަރުގަދަ ކުރުމަށް ކަމަށް ބާސާގެ ރައީސް ވަނީ ދާދި ފަހުން ވިދާޅުވެފައެވެ.
ގިނަ ކްލަބްތަކުން ހޯދުމަށް ޝައުގުވެރިވާ ކުޓީނިއޯ ވަނީ 2022 ވަނަ އަހަރުގެ ނިޔަލަށް ލިވަޕޫލާއެކު އެއްބަސްވުން ހަދާފައެވެ.
ލިވަޕޫލްގައި މޮޅު ކުޅުމެއް ދައްކަމުން އަންނަ އުމުރުން 24 އަހަރުގެ ކުޓީނިއޯ ވަނީ މިދިޔަ ސީޒަނުގައި އެޓީމަށް ކުޅުނު 36 މެޗުގައި 14 ލަނޑު ކާމިޔާބު ކޮށްފައެވެ.
އިޓަލީގެ އިންޓަ މިލާނުން 2012 ވަނަ އަހަރު ލިވަޕޫލަށް ބަދަލުވި ކުޓީނިއޯ ވަނީ އެ ކްލަބަށް މިހާތަނަށް ކުޅުނު 182 މެޗުގައި 42 ލަނޑު ކާމިޔާބު ކޮށްފައެވެ.
ކުޓީނިއޯ ވަނީ ބްރެޒިލް ގައުމީ ޓީމާއެކު 20 އަހަރުން ދަށުގެ ވޯލްޑްކަޕް އަދި 17 އަހަރުން ދަށުގެ ސައުތު އެމެރިކަން ފުޓްބޯލް ޗެމްޕިއަންޝިޕް ވެސް ކާމިޔާބު ކޮށްފައެވެ. މީގެއިތުރުން އޭނާ ވަނީ ފާއިތުވެ ދިޔަ ދެ ސީޒަނުގައި ލިވަޕޫލްގެ އެންމެ މޮޅު ކުޅުންތެރިޔާގެ މަގާމު ވެސް ހޯދާފައެވެ.
