ބަޖެޓް 2025 - މަޝްރޫއުތައް ހިންގަން ހިމަނާފައިވާ ފައިސާ ހަރަދު ކުރާނެ ގޮތުގެ ތަރުތީބެއް މުއްތަލިބަށް ވެސް ނޭނގޭ
27 ނޮވެމްބަރު 2024 | ބުދަ 07:03މަޝްރޫޢުތައް ކުރިއަށް ނުދާތީ މެމްބަރުން ކުރި ސުވާލުތަކަށް ސާފު ޖަވާބެއް ނުދެއްވޭކަން ފާހަގަކޮށްލެވޭ
ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓަރު ޑރ. އަބްދުﷲ މުއްތަލިބު
މަޝްރޫއުތައް ހިންގަން ހިމަނާފައިވާ ފައިސާ ހަރަދު ކުރާނެ ގޮތުގެ ތަރުތީބު އެނގިވަޑައިނުގަންނަވާ ކަމަށް ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެ އެވެ.
ބުދަ ދުވަހުގެ މަޖިލީހުގެ ޖަލްސާގައި މެމްބަރުން ވަނީ 2025 ވަނަ އަހަރު ސަރުކާރުން ހިންގަން ނިންމާފައިވާ މަޝްރޫއުތަކާއި މިހާރު ހުއްޓިފައި ހުރި މަޝްރޫއުތައް ފެށުމާއި މެދު މުއްތަލިބް އާއި ސުވާލުކޮށްފައެވެ. ބުދަ ދުވަހު މަޖިލީހުގައި ވާހަކަދައްކަވަމުން މުއްތަލިބް ވިދާޅުވި ގޮތުގައި މިވަގުތު ބަޖެޓުގެ ޕްރޮޖެކްޓުތައް ހިންގަން ކަނޑައަޅާފައި އޮތް ތަރުތީބު ސާފެއް ނޫނެވެ. ސަބަބަކީ "ނީޑް ބޭސިސް" ނުވަތަ ބޭނުންވާ މިންވަރަށް ބަލައިގެން އެ ކަން ކުރަންޖެހޭ ތަރުތީބަށް ބަލާފައި މަޝްރޫޢުތައް ކުރިއަށް ގެންދާތީ ކަމަށް މުއްތަލިބް ވަނީ ވިދާޅުވެފައެވެ. އެހެންނަމަވެސް މަޝްރޫޢުތަކުގެ ތަފްސީލް ވީހާވެސް އަވަހަކަށް ނިންމާ މަޖިލީހަށް ހުށަހަޅާނެ ކަަމަށް ޤަބޫލުކުރެވޭ ކަމަށް މުއްތަލިބް ވިދާޅުވިއެވެ.
އިތުރަށް ވާހަކަދައްކަވަމުން ވަޒީރު ވިދާޅުވީ، ދައުލަތުގެ އެންމެ މުހިންމު ޒިންމާއަކީ ގިނަ ބަޔަކަށް ފައިދާ ލިބޭ ގޮތަށް މަޝްރޫޢުތައް ހިންގުން ކަމަށެވެ. މި ސަރުކާރުން ރަށްރަށުގައި ޕްރޮޖެކްޓްތައް ނުވަތަ މަޝްރޫއުތައް ކުރިއަށް ގެންދާނީ ވަކި ތަރުތީބެއްގެ ތެރެއިންކަމަށް މިނިސްޓަރ ތަކުރާރުކޮށް ވިދާޅުވި ނަމަވެސް އެ ތަރުތީބަކީ ކޮބާކަން ވަޒީރަށް ސާފުކޮށެއް ނުދެއްވުނެވެ. މީގެ އިތުރުން ބައެއް ކުންފުނިތަކުން ދައުލަތުގެ ބައެއް މަޝްރޫއުތަކުން އެޑްވާންސް ފައިސާ ނަގައިގެން ވިޔަފާރި ކުރަމުންދާކަމަށް ފާހަގަކުރައްވާ އެކަމާއި މެދު މިނިސްޓަރ ވަނީ ކަންބޮޑުވުން ހިއްސާކުރައްވާފައެވެ.
މުއްތަލިބް ވަނީ އެ ވުޒާރާގެ ދަށުން ކުރިއަށް ދާ ބައެއް މަސައްކަތްތަކަށް ވެސް ބުދަ ދުވަހު އަލިއަޅުވާލައްވާފައެވެ. އެގޮތުން ބަނދަރު ހެދުމުގެ މަޝްރޫއުތަކާއި އެހެނިހެން މުހިންމު މަޝްރޫޢުތަކާއި މެދު މެމްބަރުން ކުރި ސުވާލުތަކަށް ޖަވާބުދެއްވިއެވެ. އެހެންނަމަވެސް މަޝްރޫޢުތައް ކުރިއަށް ނުދާތީ މެމްބަރުން ކުރި ސުވާލުތަކަށް ސާފު ޖަވާބެއް ނުދެއްވޭކަން ފާހަގަކޮށްލެވެއެވެ. މީގެ އިތުރުން ބައެއްް މަޝްރޫޢުތަކުގެ މަސައްކަތް މިއަހަރުގެ ބަޖެޓުން ނުކުރެވުނަސް، 2025 ވަނަ އަހަރު އެ މަސައްކަތް ކުރެވޭތޯ ބައްލަވާނެ ކަމަށް އެމަނިކުފާނު ވިދާޅުވިއެވެ.
