ޓޫރިސްޓު ޚިދުމަތްދޭ ފަރާތްތަކުން ބޭރު ފައިސާ މާރުކުރަން ހެދި ގަވައިދަށް ލުއިތަކެއް ދީ އައު ބިލެއް ޑްރާފްޓް ކޮށްފި
ބޭރު ފައިސާ މާރު ކުރުމާ ބެހޭ ގޮތުން އެމްއެމްއޭ އިން ކުއްލި ގޮތަކަށް ހަދާ އަމަލު ކުރުމަށް ލާޒިމު ކުރި ގަވައިދުގައި ޑޮލަރު މާރު ކުރަން ޖެހޭ ފަރާތްތަކަށް އެއްވެސް އިސްތިސްނާ އެއް ދީފައި ނުވާއިރު، އަލަށް އެކުލަވާލި ބިލުގައި ބައެއް އިސްތިސްނާ ހިމެނޭކަން ފާހަގަ ކުރެވެއެވެ. އެގޮތުން ގިނަވެގެން 24 ގަޑީއިރު ހަމަ ކޮށްފައި ނުވާ ޓޫރިސްޓުންނާއި، އުމުރުން 2 އަހަރު ފުރިފައި ނުވާ ކުޑަކުދިންނާއި، ހިލޭ ނުވަތަ ކޮމްޕްލިމެންޓަރީ ކޮށް ތިބޭ ފަރާތްތައް ޓޫރިސްޓުންގެ ތެރޭގައި ނުހިމެނޭ ފަރާތްތަކުގެ ގޮތުގައި ބިލުގައި ބުނެފައިވެއެވެ.
ރާއްޖޭގެ އެންމެ ދުވަސްވީ އަދި އެންމެ މަޝްހޫރު އެއް ރިސޯޓު ކަމުގައިވާ ކުރުނބާ ގައި ފަތުރުވެރިން އަރާމު ކުރަނީ
ޓޫރިސްޓު ޚިދުމަތްދޭ ފަރާތްތަކުން ބޭރު ފައިސާ މާރުކުރަން ލާޒިމުކޮށް ކަމާ ބެހޭ ފަރާތްތަކުގެ އެއްވެސް މަޝްވަރާ އެއް ނެތި ކުއްލި ގޮތަކަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހެދި ގަވައިދަށް ލުއިތަކެއް ދީ އައު ބިލެއް ޑްރާފްޓް ކޮށް އާންމު ކޮށްފިއެވެ.
އަލަށް އެކުލަވާލި "ބޭރު ފައިސާ އާ ބެހޭ ބިލު" ގައި ޓޫރިޒަމް ދާއިރާގެ މުދާ ވިއްކާ ފަރާތްތަކާއި ޚިދުމަތް ފޯރުކޮށް ދިނުމަށް މީރާގައި ރަޖިސްޓަރީ ކޮށްފައިވާ ފަރާތްތަކުގެ އިތުރުން އަހަރަކު 20 މިލިއަން ޑޮލަރުގެ އާމްދަނީ މުދަލާއި ޚިދުމަތުން ލިބޭ އެހެން ފަރާތްތައް ވެސް ހިމަނާފައިވެއެވެ.
ބިލުގައި ބުނެފައިވަނީ، މިލާދީ މަހެއްގެ ތެރޭގައި ލިބޭ ބޭރު ފައިސާގެ އާމްދަނީ އެކުގައި އެ މަހަށް ފަހު ހިނގާ ތިން ވަނަ މަހުގެ 28 ވަނަ ދުވަހުގެ ކުރިން ދިވެހި ރާއްޖޭގައި ރަޖިސްޓަރީ ކޮށްގެން ހިންގާ ބޭންކެއްގެ ބޭރު ފައިސާ އެކައުންޓަކަށް ޖަމާ ކުރަން ޖެހޭނެ ކަމަށެވެ.
މި ފަރާތްތަކުގެ ތެރެއިން އެމްއެމްއޭ ގައި ރަޖިސްޓަރީ ކޮށްފައި ނުވާ ފަރާތްތަކުން ގާނޫނަށް އަމަލު ކުރަން ފަށާތާ 10 ދުވަހުގެ ތެރޭގައި އޮތޯރިޓީގައި ރަޖިސްޓަރީ ކުރަން ހުށަހަޅަން ޖެހެއެވެ.
ގާނޫނުގައި ބުނާ މުދާ ވިއްކާ ފަރާތެއްގެ ގޮތުގައި ނުވަތަ ޚިދުމަތް ފޯރުކޮށްދޭ ފަރާތެއްގެ ގޮތުގައި މީރާގައި ރަޖިސްޓަރީ ކުރާ ފަރާތްތަކުން، މީރާ ގައި ރެޖިސްޓްރީ ކުރާތާ 30 ދުވަހުގެ ތެރޭގައި އެމްއެމްއޭ ގައި ރަޖިސްޓަރީ ކުރަން ޖެހޭނެ ކަމަށްވެސް ބުނެފައިވެއެވެ.
ބޭންކަކަށް ބޭރު ފައިސާ ޓްރާންސްފަރ ނުވަތަ ޖަމާކުރުމަށްފަހު، އެކަމުގެ މަޢުލޫމާތާއި އޮތޯރިޓީން އަންގާ އެހެންވެސް މަޢުލޫމާތު، އޮތޯރިޓީން ކަނޑައަޅާ ގޮތަކަށް އޮތޯރިޓީއަށް އަންގަން ޖެހޭނެ ކަމަށްވެސް ބިލުގައި ވެއެވެ.
ބިލުގައި ބުނާ ގޮތުން، މަޢުލޫމާތާއި ލިޔެކިޔުންތައް އެ މުދަލެއް ނުވަތަ ޚިދުމަތެއް ވިއްކި ތާރީޚުން ފެށިގެން މަދުވެގެން 5 އަހަރު ދުވަހުގެ މުއްދަތައް ބަހައްޓަން ޖެހެއެވެ.
އަލަށް އެކުލަވާލި ބިލުގައިވެސް ޓޫރިޒަމް ދާއިރާގެ މުދާ ވިއްކާ ފަރާތްތަކާއި ޚިދުމަތްދޭ ފަރާތްތައް ދެ ކެޓަގަރީ އަކަށް ބެހިގެންވާ ކަމަށް ކަނޑައަޅާފައިވާ އިރު، "ކެޓެގަރީ އޭ" ގައި ހިމެނެނީ ރިޒޯޓުތަކާއި، އިންޓަގްރޭޓަޑް ޓޫރިސްޓް ރިޒޯޓުތަކާއި، ޕްރައިވެޓް އައިލެންޑް ތަކާއި، ރިޒޯޓް ހޮޓާ ތަކާއި، އެނޫންވެސް އެފަދަ ތަންތަނެވެ.
"ގެޓަގަރީ ބީ" ގައި ހިމެނެނީ މީހުން ދިރިއުޅޭ ރަށްރަށުގައި ހިންގާ ޓޫރިސްޓް ހޮޓާތަކާއި، ޓޫރިސްޓް ގެސްޓްހައުސް ތަކާއި، ޓޫރިސްޓް އުޅަނދު ފަހަރެވެ.
ބިލުގައި ބުނެފައިވާ ފަރާތްތަކަށް ބޭރު ފައިސާއިން ލިބޭ އާމްދަނީން ބައެއް މާރުކުރަން ޖެހޭނެ ކަމަށް ބިލުގައިވެއެވެ.
އެ ގޮތުން ކެޓެގަރީ އޭ ގައި ހިމެނޭ ފަރާތްތަކުން މީލާދީ މަހެއްގެ ތެރޭގައި އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން، އެ މަހެއްގ ތެރޭގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު، އެ މަހަށް ފަހު ހިނގާ ތިން ވަނަ މަހުގެ 28 ވަނަ ދުވަހުގެ ކުރިން، އެ އެސްޓެބްލިޝްމަންޓް ހިންގާ ފަރާތުން ބޭންކަކަށް ދިވެހި ރުފިޔާ އަށް މާރު ކުރަން ވާނެ ކަމަށް ވަނީ ބުނެފައެވެ.
ހަމަ މިމޭރުމުން ކެޓެގަރީ ބީ ޓޫރިޒަމް އެސްޓެބްލިޝްމަންޓަކަށް ކޮންމެ މަހެއްގެ ތެރޭގައި އަންނަ ކޮންމެ ޓޫރިސްޓަކަށް 25 އެމެރިކާ ޑޮލަރު މާރުކުރަން ޖެހޭނެ ކަމަށް ބުނެފައިވެއެވެ.
ރިސޯޓު ނުވަތަ ގެސްޓް ހައުސްގެ ޚިދުމަތް ނޫން އެހެން ޚިދުމަތް ދޭ ފަރާތްތަކުން މަހެއްގެ ތެރޭގައި ލިބޭ ބޭރު ފައިސާގެ އާމްދަނީގެ 25 ފަންސަވީސް އިންސައްތަ އަށްވުރެ ބޮޑު ނުވާގޮތަށް ޤާނޫނުގެ ދަށުން ހަދާ ގަވާއިދުގައި ކަނޑައަޅާފައިވާ އަދަދެއް، އެ މަހަށް ފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން ބޭންކަކަށް ދިވެހި ރުފިޔާއަށް މާރުކުރަން ޖެހެއެވެ.
ބޭރު ފައިސާ މާރު ކުރުމާ ބެހޭ ގޮތުން އެމްއެމްއޭ އިން ކުއްލި ގޮތަކަށް ހަދާ އަމަލު ކުރުމަށް ލާޒިމު ކުރި ގަވައިދުގައި ޑޮލަރު މާރު ކުރަން ޖެހޭ ފަރާތްތަކަށް އެއްވެސް އިސްތިސްނާ އެއް ދީފައި ނުވާއިރު، އަލަށް އެކުލަވާލި ބިލުގައި ބައެއް އިސްތިސްނާ ހިމެނޭކަން ފާހަގަ ކުރެވެއެވެ. އެގޮތުން ގިނަވެގެން 24 ގަޑީއިރު ހަމަ ކޮށްފައި ނުވާ ޓޫރިސްޓުންނާއި، އުމުރުން 2 އަހަރު ފުރިފައި ނުވާ ކުޑަކުދިންނާއި، ހިލޭ ނުވަތަ ކޮމްޕްލިމެންޓަރީ ކޮށް ތިބޭ ފަރާތްތައް ޓޫރިސްޓުންގެ ތެރޭގައި ނުހިމެނޭ ފަރާތްތަކުގެ ގޮތުގައި ބިލުގައި ބުނެފައިވެއެވެ.
އޭގެ އިތުރުން ޓޫރިސްޓު އުޅަނދުތަކުގެ ތެރެއިން ރާއްޖޭން ބޭރުގައި ރަޖިސްޓަރީ ކޮށްފައިވާ އުޅަނދުތައް މި ގާނޫނުގެ ދަށުން އިސްތިސްނާ ވާނެ ކަމަށް ބުނެފައިވެއެވެ.
ގާނޫނުގައި ބުނާ މިންވަރަށް ބޭރު ފައިސާ މާރު ކޮށްފިނަމަ، ބޭރު ފައިސާ އިން އަދާ ކުރަން ޖެހޭ ޓެކްސް އާއި ބޭރު ފައިސާ އިން އަދާ ކުރަން ޖެހިފައިވާ ދަރަންޏާއި، ޝަރުއީ ކޯޓެއްގެ ހުކުމެއް ނުވަތަ އާބިޓްރޭޝަންގެ މައްސަލައެއް ސަބަބުން ބޭރު ފައިސާ އިން އަދާ ކުރަން ޖެހޭ އިލްތިޒާމެއްގެ ސަބަބުން އަދި އޮތޯރިޓީން ހުއްދަ ދޭ އެހެން އިލްތިޒާމެއްގެ ސަބަބުން ގާނޫނުގައި ކަނޑައަޅާފައިވާ މިންވަރަށް ޑޮލަރު މާރު ކޮށްފިނަމަ އެ އިލްތިޒާމްތަކަށް ދައްކަން ޖެހޭ ބޭރު ފައިސާ ނުހުންނާނެ ކަން ބަޔާން ކޮށް އޮތޯރިޓީ އަށް ހުށަހެޅުމުން އެކަން ގަބޫލު ކުރެވޭ ނަމަ ގާނޫނުގައި ބުނާ އަދަދަށް ވުރެ މަދު އަދަދެއް މާރު ކުރުމުގެ ހުއްދަ ދެވިދާނެ ކަމަށް ވެސް ބިލުގައި ވެއެވެ.
ބޭންކަކަށް ކޮންމެ ހަފުތާއަކު ލިބޭ ބޭރު ފައިސާގެ ތެރެއިން އޮތޯރިޓީން ކަނޑައަޅާ ވަކި އިންސައްތައެއްގެ ފައިސާ ޖެހިގެން އަންނަ ހަފުތާގެ ބުދަ ދުވަހުގެ ކުރިން އެ ބޭންކުން އޮތޯރިޓީއަށް ވިއްކަންވާނެ ކަމަށްވެސް ބުނެފައިވެއެވެ.
