ރާއްޖެއިން ތައިލެންޑަށް ކަނޑައަޅާ ސަފީރަކަށް ފުއާދު އައްޔަންކުރަން ފެންނަކަމަށް ކޮމިޓީން ނިންމައިފި
26 ނޮވެމްބަރު 2024 | އަންގާރަ 10:23އެ މައްސަލަ ދިރާސާ ކުރުމަށް މަޖިލީހުގެ ހާރިޖީ ގުޅުންތަކާއި ބެހޭ ކޮމިޓީއަށް ހޯމަ ދުވަހު ވަނީ ފޮނުވާފަ
އީސީގެ ރައީސް ފުއާދު ތައުފީގު
ރާއްޖެއިން ތައިލެންޑަށް ކަނޑައަޅާ ސަފީރަކަށް އިލެކްޝަންސް ކޮމިޝަންގެ ކުރީގެ ރައީސް ފުއާދު ތައުފީގު އައްޔަންކުރަން ފެންނަކަމަށް ކޮމިޓީން ނިންމައިފިއެވެ.
ހޯމަ ދުވަހުގެ ޖަލްސާގައި އެކަމަށްޓަކާ ރައީސް ޑރ. މުހައްމަދު މުއިއްޒު ފޮނުއްވި ސިޓީ ވަނީ އިއްވަވާދެއްވާފައެވެ. އެ ސިޓީގައި ރައީސް ވިދާޅުވެފައިވަނީ ފޮރިން ސާވިސް ގާނޫނުގެ 14 ވަނަ މާއްދާގެ މަތިން ބޭރު ގައުމުތަކަށް ރާއްޖެއިން ސަފީރުން ކަނޑައެޅުމަށް ޓަކައި ކިންގްޑަމް އޮފް ތައިލެންޑަށް ރާއްޖެއިން ކަނޑައަޅުއްވާފައި ހުންނަވާ ސަފީރަކަށް މައްޗަންގޯޅި، ތަޅާމުދިގޭ، ފުއާދު ތައުފީގް އައްޔަން ކުރާތީ އެބޭފުޅާ ސަފީރުކަމަށް އައްޔަންކުރުމަށް މަޖިލީހުގެ މަޝްވަރާ ހޯދައިދެއްވައި މަޖިލީހުގެ ނިންމުން އަންގަވައިދިނުން އެދިވަޑައިގަންނަވާ ކަމަށެވެ.އެ މައްސަލަ ދިރާސާ ކުރުމަށް މަޖިލީހުގެ ހާރިޖީ ގުޅުންތަކާއި ބެހޭ ކޮމިޓީއަށް ހޯމަ ދުވަހު ވަނީ ފޮނުވާފައެވެ.
އަންގާރަ ދުވަހު ކުރިއަށްގެންދިޔަ ކޮމިޓީ ބައްދަލުވުމުގައި ތައިލެންޑަށް ރާއްޖެއިން ކަނޑައަޅާ ސަފީރަކަށް ފުއާދު އައްޔަންކުރަން ފެންނަ ކަމަށް ފާސްކޮށްފައިވަނީ ކޮމިޓީއަށް ހާޒިރުވި 9 މެމްބަރުންގެ އަޣުލަބިއްޔަތުންނެވެ. ކޮމިޓީގައި ވާހަކަދެއްކި މެމްބަރުން ވަނީ ފުއާދަކީ ތަޖުރިބާކާރު މީހެއް ކަމަށާއި އޭނާ ވަނީ ދައުލަތަށް ވަރަށް ގިނަ ޚިދުމަތްތަކެއްކުރައްވާފައިވާ ބޭފުޅެއް ކަމަށް ފާހަގަކުރައްވާފައެވެ.
ފުއާދު އަކީ އިލެކްޝަންސް ކޮމިޝަނުގައި ގިނަ ދުވަހު ޚިދުމަތްކުރައްވާފައިވާ ބޭފުޅެކެވެ. އެގޮތުން، 2008 ވަނަ އަހަރުން ފެށިގެން 2009ގެ ސެޕްޓެމްބަރގެ ނިޔަލަށް ފުއާދު ވަނީ އީސީގެ މެންބަރުކަން ކުރައްވާފައެވެ. އޭގެ ފަހުން 2009ން 2014 އާ ހަމައަށް އީސީގަ ޚިދުމަތްކުރެއްވިއެވެ. 2019 ވަނަ އަހަރު އީސީގެ ރައީސްކަމަށް އަނެއްކާ ވެސް ފުއާދު އައްޔަންކުރިއެވެ. އޭނާގެ ދައުރު ހަމަވެފައި ވަނީ މިދިޔަ ހޮނިހިރު ދުވަހުއެވެ.
