ޒުހޫރު ވިދާޅުވީ އެންމެ ބޭނުންވާ ދުވެލީގައި ނޫން ނަމަވެސް، މަސައްކަތްތައް ކުރިއަށް ގެންދެވޭ ކަމަށް

އެންމެ ބޭނުންވާ ދުވެލީގައި ނޫން ނަމަވެސް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ނޯމަލައިޒިން ކޮމެޓީގެ މަސައްކަތްތައް ކުރިއަށް ގެންދެވޭ ކަމަށް، އެ ކޮމެޓީގެ ޗެއާމަން އަޙުމަދު ޒުހޫރު ވިދާޅުވެއްޖެ އެވެ.

ދުނިޔޭގެ ފުޓުބޯޅަައިގެ މައި އިދާރާ (ފީފާ) އިން އެފްއޭއެމްގެ ހިންގުން ނޯމަލައިޒިން ކޮމެޓީއާ ހަވާލުކުރިތާ ތިން މަސް ދުވަސް ވެފައިވާއިރު، އެކަމާ ގުޅޭ ގޮތުން "ރާއްޖެ އެމްވީ"އާ ވާހަކަ ދައްކަވަމުން ޒުހޫރު ވިދާޅުވީ މަސައްކަތްތައް ކުރިއަށް ގެންދެވޭ ގޮތާ މެދު އެންމެ ހިތްހަމަ ނުޖެހޭ ކަމަށެވެ. ޒުހޫރު ވިދާޅުވީ އެ މަސައްކަތުގައި އޭނާ އުންމީދު ކޮށްގެން ހުރި ވަރަށް ކުރިއަށް ނުދާ ކަމަށެވެ. އެހެން ނަމަވެސް، މިހާތަނަށް އައިއިރު ވެސް ވަރަށް ގިނަ މަސައްކަތްތައް ކުރެވިފައިވާ ކަމަށާއި، ކަންކަން ޙާސިލު ކުރެވިފައިވާ ކަމަށް ވެސް ޒުހޫރު ވަނީ ވިދާޅުވެފަ އެވެ.

ނޯމަލައިޒިން ކޮމެޓީން ކުރަމުން އަންނަ މަސައްކަތްތަކަށް އިޝާރާތް ކުރަމުން ޒުހޫރު ވިދާޅުވީ ކޮންމެ ކަމެއް ވެސް ވަރަށް ޗެލެންޖިން ކަމަށެވެ. ޚާއްސަކޮށް އިދާރީ ގޮތުން ކުރަން ހުރި ކަންކަން ޒުހޫރު ވަނީ ފާހަގަ ކުރައްވައިފަ އެވެ. އެގޮތުން ނޯމަލައިޒިން ކޮމެޓީ ހަވާލުވީއިރު އިދާރީ ކަންކަން އޮތީ "ސުމެއްގައި" ކަމަށާއި، އިދާރީ ކަންކަން ރާވައި އެކަންކަން ކުރިއަށް ގެންދިޔުމަށް މަސައްކަތްތަކެއް ކުރެވެމުން އަންނަ ކަމަށް ޒުހޫރު ވިދާޅުވި އެވެ. އެކަމުގެ ތެރެއިން އެފްއޭއެމް އަށް ބޭނުންވާ މުވައްޒަފުން ވެސް "މަޑު މަޑުން" ނަގަމުން އަންނަ ކަމުގައި ޒުހޫރު ވިދާޅުވި އެވެ.

ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމުގެ ވެރިކަމުގައި ކުޅިވަރު ވަޒީރުކަން ވެސް ކުރައްވާފައިވާ ޒުހޫރު އިތުރަށް ވިދާޅުވީ، އެންމެ ބޮޑު ގޮންޖެހުމަކަށް އޮތީ ޤާނޫނީ ގޮތުން އެފްއޭއެމާ ދެކޮޅަށް ކޮށްފައިވާ ދައުވާތައް ކަމަށެވެ. އެ ދައުވާތަކަކީ އެފްއޭއެމާ ދެކޮޅަށް ހުރި ދަރަނީގެ ދައުވާތަކެއް ކަމަށާއި، އެކަންކަމަށް އެޓެންޑުވަމުން އަންނަ ކަމަށް ޒުހޫރު ވަނީ ވިދާޅުވެފަ އެވެ. އެކަމުގެ ތެރެއިން ސާބިތާ ދަރަނިތައް އަދާ ކުރުމާއި، ފައިސާ ދެވޭނެ މަގުތަކެއް ހޯދުމުގެ ކަންކަން ވެސް ކުރިއަށް ދާ ކަމުގައި ޒުހޫރު ވިދާޅުވެފައިވެ އެވެ. ދަރަނި އަދާ ކުުރުމަށް ބަލާއިރު ވެސް، އެކަންކަމާ ގުޅުން ހުރި މައުލޫމާތު ލިބެން ނެތް ކަމަށާއި، އެކަމާ ގުޅުން ހުރި ލިޔެކިޔުންތައް ވެސް ނެތް މައްސަލަ ދިމާވާ ކަމަށް ޒުހޫރު ވިދާޅުވި އެވެ.

އެފްއޭއެމްގެ މުވައްޒަފުންނަށް ނުދެވި އޮތް މުސާރަ އަށް ބަލާއިރު، މުސާރަ ނުދެވި ގިނަ މަސްތަކެއް ވެފައިވާކަން ޒުހޫރު ފާހަގަ ކުރެއްވި އެވެ. މުސާރަ ދިނުމުގެ މަސައްކަތް ވެސް ކުރިއަށް ގެންދާ ކަމަށާއި، މިހާރު ކުރިއަށް ދަނީ ފީފާ އިން ކަނޑައަޅާފައިވާ އޯޑިޓު ފާމުން ކުރިއަށް ގެންދާ ވެޓިންގެ މަސައްކަތް ކަމަށް ވެސް ޒުހޫރު ވިދާޅުވި އެވެ. ތިން މަސް ދުވަހުގެ މުސާރަ ދިނުމަށް ބޭނުންވާ ފައިސާ ފީފާ މެދުވެރިކޮށް ނޯމަލައިޒިން ކޮމެޓީން ހޯދާފައިވާނެ ކަމަށާއި، ލޯ ފާމުގެ މަސައްކަތް ނިމުމާ އެކު ތިން މަސް ދުވަހުގެ މުސާރަ އަދާ ކުރެވޭނެ ކަަމަށް ވެސް ޒުހޫރު ވިދާޅުވި އެވެ. މުސާރަ ދޭން ފެށުމާއެކު، ތިން މަސް ނުވަތަ ހަތަރު މަސް ދުވަހުގެ ތެރޭގައި ނުދެވި ހުރި މުސާރަތައް އަދާ ކުރެވޭނެ ކަމުގެ އުންމީދު އޮތް ކަމަށް ވެސް ޒުހޫރު ވިދާޅުވި އެވެ.

މީގެ އިތުރުން ޒުހޫރު ވިދާޅުވެފައި ވަނީ އެފްއޭއެމްގެ ކުރީގެ އިސްވެރިން ގިނަ ގޯސްތަކެއް ހަދާފައިވާ ކަމަށާއި، ޚާއްސަކޮށް ކުލަބުތަކަށް ފައިސާ ދިނުމުގެ ކަންކަން ކޮށްފައި ވަނީ އެކަން ކުރަން އޮންނަ ގޮތެއް ނޫން ކަމަށެވެ. ޚާއްސަކޮށް ކުލަބުތަކަކީ އެފްއޭއެމް އިން ފައިސާ ދީގެން ހިންގަން އޮންނަ ތަނެއް ނޫން ކަމަށާއި، ނަމަވެސް އެފްއޭއެމް އިން ސްޕޮންސާ ހޯދުމުގެ މަސައްކަތް ކުރެވިދާނެ ކަމަށް ވެސް ޒުހޫރު ވިދާޅުވި އެވެ.

ފީފާ އިން ރާއްޖެ ނޯމަލައިޒް ކުރަން ނިންމައި، ނޯމަލައިޒިން ކޮމެޓީ އަށް މަސައްކަތްތައް ހަވާލު ކުރީ މިއަހަރުގެ އޯގަސްޓު މަހުގެ ތެރޭގަ އެވެ. އެފްއޭއެމްގެ ނޯމަލައިޒިން ކޮމެޓީގެ މަސައްކަތްތައް މިވަގުުތު ކުރިއަށް ގެންދަމުން އަންނަނީ ގަލޮޅު ރަސްމީ ދަނޑުގައި ހުންނަ އޮފީހެއްގަ އެވެ.