ގާނޫނު އަސާސީގެ ދިފާއުގައި ރައްޔިތުން މަގުމައްޗަށް ނުކުތުމަށް ސަރުކާރުން ވަނީ މަޖުބޫރުކޮށްފައި: މެންބަރު ސަމީރު
މަޖިލީހުގެ މެންބަރުންނަކީ ރައްޔިތުން ތަމްސީލުކުރާ ބައެއް
ގާނޫނު އަސާސީގެ ދިފާއުގައި ކުރި މުޒާހަރާގައި އެމްޑީޕީގެ ޕީޖީ މެންބަރުން
ދިވެހިރާއްޖޭގެ ގާނޫނު އަސާސީގެ ދިފާއުގައި ރައްޔިތުން މަގުމައްޗަށް ނުކުތުމަށް މިސަރުކާރުން މަޖުބޫރުކޮށްފައިވާ ކަމަށް ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވިދާޅުވެއްޖެއެވެ.
ގާނޫނު އަސާސީގެ ދިފާއުގައި ކުރިއަށް ގެންދިޔަ މުޒާހަރާގެ ތެރެއިން ރާއްޖެއެމްވީއަށް މެންބަރު ސަމީރު ވިދާޅުވީ ރައްޔިތުން މަޖިލީހުގެ މެންބަރުންނަކީ ރައްޔިތުން ތަމްސީލުކުރާ ބައެއް ކަމަށާއި، ރައްޔިތުންގެ ހައްގުގައި މަސައްކަތް ކުރާ މެންބަރުން ކަމަށެވެ. އަދި މެންބަރުން ހަމައެކަނި ތަމްސީލުކުރަމުންދަނީ ޕާޓީ ނޫން ކަމަށް މެންބަރު ސަމީރު ވިދާޅުވިއެވެ.
ގާނޫނު އަސާސީ ދިފާއު ކުރުމަށް މަގުމައްޗަށް ނުކުތުމަށް މިސަރުކާރުން މަޖުބޫރުކޮށްފައިވާކަން ފާހަގަކުރައްވައި މެންބަރު ސަމީރު ވިދާޅުވީ ގާނޫނު އަސާސީ ފުޑާލުމުގެ ފުރުސަތު ދީގެން ނުވާނެ ކަމަށާއި، ގާނޫނު އަސާސީގެ ހައްގުގައި މަސައްކަތް ކުރަންޖެހޭ ކަމަށެވެ. އަދި ވިދާޅުވީ ރައްޔިތުންގެ މަޖިލީހުގައި މަސައްކަތް ކުރާ ހުރިހާ މެންބަރުން މުޅި ރާއްޖޭ މަސްހަލަތު އިސްކުރަންޖެހޭ ކަމަށެވެ.
މެންބަރު ސަމީރު ވިދާޅުވީ ޕާޓީން މަޖިލީހަށް އިންތިޚާބުވާ މެންބަރުން ޕާޓީ ބަދަލުކޮށްފިނަމަ، އެކަމާމެދު ފިޔަވަޅުތަކެއް އެޅެންޖެހޭ ކަމަށާއި، ނަމަވެސް ގިނަ ބައެއްގެ ހައްގުތައް ގެއްލިގެން ނުވާނެ ކަމަށެވެ. އަދި މިއަށް ވުރެ ހަރުދަނާ އުސޫލުތަކާއި، ފިޔަވަޅުތައް އެޅޭނެ ކަމަށް ގަބޫލުކުރާ ކަމަށް މެންބަރު ސަމީރު ވިދާޅުވިއެވެ.
