ދިވެހިރާއްޖޭގައި މަސްތުވާތަކެތީގެ ބޮޑެތި މައްސަލަތަކުގައި ހިމެނޭ ގިނަ މީހުން ސަލާމަތްވާ ކަމަށާއި، ޖަލުތަކުގައި ގިނައީ އެއް ގްރާމް ދެ ގްރާމުގެ މީހުން ކަމަށް ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެއެވެ.

ހޯމަ ދުވަހުގެ ރައްޔިތުން މަޖިލީހުގެ ޖަލްސާގައި މަސްތުވާތަކެއްޗާބެހޭ ގާނޫނަށް އިސްލާހު ގެނައުމުގެ ބިލަށް ތާއީދުކުރައްވައި ވާހަކަދައްކަވަމުން މެންބަރު ޒިޔާދު ވިދާޅުވީ މަސްތުވާތަކެތި އުފައްދާ މީހުން އަބަދުވެސް އުޅެމުންދަނީ ގާނޫނު ހަދާ ފަރާތްތަކާއި، ފަންފީޒީ ފަރާތްކަށް ވުރެ މާކުރީގައި ކަމަށާއި، ހާލަތު އަވަސްއަވަހަށް ބަދަލުވެގެންދާ ކަމަށެވެ. މަސްތުވާތަކެއްޗަކީ ބިލިއަން ޑޮލަރުގެ ވިޔަފާރިއެއް ކަމަށާއި، ރާއްޖެއަށް މި ތަކެތި ފަޓާސްހެން އެތެރެނުކުރެވޭނެ ކަމަށެވެ. އަދި މުޖުތަމައުތައް ހަލާކުވެގެންދާއިރު، ޕްރެވެންޝަންއަށް އިތުރު ފިޔަޅުތައް އަޅަންޖެހޭ ކަމަށް މެންބަރު ޒިޔާދު ވިދާޅުވިއެވެ.

މެންބަރު ޒިޔާދު ވިދާޅުވީ މަސްތުވާތަކެއްޗަށް ހުށަހެޅުމަށް ހުރި ފުރުސަތުތައް ދޮރުތައް ބަންދު ކުރަންޖެހޭ ކަމަށެވެ. އަދި ވިދާޅުވީ މަސްތުވާތަކެއްޗާބެހޭ ގާނޫނަށް ހުށަހަޅާފައިވާ އިސްލާހުތަކުގައި މަސްތުވާތަކެއްޗަށް ޕްރެވެންޝަންއަށް މި ގާނޫނުން އެކަށީގެންވާ ގޮތަކަށް އަދި ހިމަނާފައިނުވާ ކަމަށާއި، މިދާއިރާތަކަށް ބޮޑަށް އިސްކަންދޭންޖެހޭ ކަމަށެވެ.

މަސްތުވާތަކެތީގައި ޖެހިފައިވާ މީހުންނަށް ދެވޭ ފަރުވާގެ ނިޒާމަށް އިޝާރާތް ކުރައްވައި މެންބަރު ޒިޔާދު ވިދާޅުވީ ޖަލުތަކުގައި ފަރުވާ ދިނުމަކީ އެންމެ ރަނގަޅު ގޮތް ކަމަށް ގަބޫލުނުކުރެވޭ ކަމަށެވެ. މެންބަރު ޒިޔާދު ވިދާޅުވީ ހާލަތު ބަދަލުވެ، އަމަލުތައް ބަދަލުވަމުންދާއިރު، ފަރުވާ ދިނުމުގައި ވައްޓަފާޅިއަށް ބަލަންޖެހޭ ކަމަށެވެ. މިމައްސަލަ ހައްލުކުރުމަށް ގާނޫނު އަސާސީއަށް ގެނެވޭ އިސްލާހުތަކަކީ މިކަމުގެ 10 ޕަސެންޓު ކަމަށާއި، 90 ޕަސެންޓަކީ ތަންފީޒީ އިދާރާތަކާއި، ދިރިއުޅުމުގެ ހާލަތަށް ބަދަލު ގެނެސްގެން ކުރެވޭ މަސައްކަތް ކަމަށް މެންބަރު ޒިޔާދު ވިދާޅުވިއެވެ.

މީގެ އިތުރުން މެންބަރު ޒިޔާދު ވިދާޅުވީ މަސްތުވާތަކެތީގެ ބޮޑެތި މައްސަލަތަކުގައި ހިމެނޭ ގިނަ މީހުން ސަލާމަތްވާ ކަމަށާއި، ރާއްޖޭގައި ޖަލުތަކުގައި މިހާރު ވެސް ގިނައީ މަދު މަސްތުވާތަކެއްޗާއެކު އަތުލައިގަނެފައިވާ މީހުން ކަމަށެވެ.

މެންބަރު ޒިޔާދު ވިދާޅުވީ ޚާއްސަކޮށް ޕްރެވެންޝަންއަށް އަޅަންޖެހޭ ފިޔަވަޅުތައް ނާޅާނަމަ ޒުވާން ޖީލު މަސްތުވާތަކެތިން ސަލާމަތް ނުކުރެވޭނެ ކަމަށެވެ. ގާނޫނުތައް ހެދިދާނެ ކަމަށާއި، އަދަބުތައް އަދިވެސް އިތުރަށް ހަރުކަށިކޮށް، ވަރުގަދަކުރެވިދާނެ ކަމަށެވެ. ނަމަވެސް ތަންފީޒު ނުކުރެވެނީ ކީއްވެގެންތޯ ބަލަންޖެހޭ ކަމަށާއި، ދިރިއުޅުމުގެ ހާލަތާއި، މަސްތުވާތަކެއްޗަށް ޒުވާނުން އެބުރެންޖެހޭ ސަބަބު ދެނެގަނެ އެކަން ހައްލު ކުރުމަށް ވަށާޖެހޭ ހައްލެއް ހޯދަންޖެހޭ ކަމަށް މެންބަރު ޒިޔާދު ވިދާޅުވިއެވެ.