ނިއުކްލިއަރ ހަތިޔާރު ބޭނުން ކުރެވިދާނެ ހާލަތު ލުއި ކުރަން ރަޝިޔާގެ ރައީސް ވްލަޑިމިއަރ ޕުޓިން ހުއްދަ ދެއްވައިފިއެވެ.

އައު އުސޫލުގައި ބަޔާންކޮށްފައިވާ ގޮތުގައި ނިއުކްލިއަރ ހަތިޔާރު ނެތް ޤައުމަކުން ރަޝިޔާ އަށް ހަމަލާއެއް ދޭ ހާލަތުގައި، އެ ހަމަލާ އަކީ ނިއުކްލިއަރ ބާރެއްގެ އެހީތެރިކަމާއެކު ދިން ހަމަލާ އެއް ނަމަ، އެއީ ރަޝިޔާ އަށް ނިއުކްލިއަރ ބާރަކާ ގުޅިގެން ދިން ހަމަލާއެއްގެ ގޮތުގައި ބެލެވޭނެއެވެ.

ރަޝިޔާ ގެ "ނިއުކްލިއަރ ޑޮކްޓްރައިން" އަށް މި ބަދަލު ގެންނަން ހުށަހަޅާފައި ވަނީ ސެޕްޓެމްބަރު މަހުގައެވެ. އެހެން ނަމަވެސް މި އައު އުސޫލަށް އަމަލު ކުރަން ރަޝިޔާގެ ރައީސް ހުއްދަ ދެއްވީ، ޔޫކްރެއިންނާ އެކު ކުރަމުންދާ ހަނގުރާމައިގެ 1،000 ދުވަސް ފުރުނު ދުވަހުގައެވެ.

އަދި މީގެ އިތުރުން، މި ގޮތައް އަމަލު ކުރުމަށް ރަޝިޔާގެ ރައީސް ހުއްދަ ދެއްވި މި ދަނޑިވަޅަކީ، އެމެރިކާގައި އުފައްދާ އަދި ޔޫކްރެއިން އަށް ފޯރުކޮށް ދެމުންދާ ދުރު ރާސްތާ މިސައިލް ރަޝިޔާ އަށް ހަމަލާ ދިނުމުގައި ބޭނުން ކުރުމުގެ ހުއްދަ އެމެރިކާގެ ރައީސް ޖޯ ބައިޑްން ދެއްވުމާއެކު ފުރަތަމަ ފަހަރަށް އެ ފަދަ މިސައިލް ބޭނުން ކޮށްގެން ޔޫކްރެއިނުން ރަޝިޔާގެ ތެރެއަށް ހަމަލާދީފައިވާ ދަނޑިވަޅެއްގައި ކަން ފާހަގަ ކުރެވެއެވެ.

ރަޝިޔާގެ ނިއުކްލިއަރ ޑޮކްޓްރައިން އަށް މި ގެނައި ބަދަލާއެކު، ރަޝިއާއަށް ޔޫކްރެއިން މިސައިލް، ޑްރޯން، ނުވަތަ މަތިންދާބޯޓު މެދުވެރިކޮށް ދޭ ހަމަލާއަކީ ނިއުކްލިއަރ ރައްދެއް ދިނުމަށް ޝަރުތު ހަމަވާ ހަމަލާއެއްގެ ގޮތުގައި ބެލެވިދާނެ ކަމަށް ރިޕޯޓުތައް ބުނެއެވެ.

އެއާއެކު ރަޝިޔާ އާ ދެކޮޅަށް ހަނގުރާމައިގައި އިއްތިހާދުވެފައިވާ ގައުމުތަކުގެ ތެރެއިން އެއްވެސް ގައުމަކުން ރަޝިޔާ އަށް ދޭ ހަމަލާއެއް މޮސްކޯއިން ދެކޭނީ މުޅި އިއްތިހާދުން ދޭ ހަމަލާއެއްގެ ގޮތުގައެވެ.

ރޫސީ ޑިޕްލޮމެޓުން ބުނާ ގޮތުގައި މިހާރުގެ ހާލަތަކީ 1962 ވަނަ އަހަރުގެ ކިއުބާގެ މިސައިލް ކްރައިސިސް އާ އެއްފަދަ ހާލަތަކެވެ. އެއީ އޭރު ހިނގަމުން ދިޔަ ފިނި ހަނގުރާމައިގައި ދުނިޔޭގެ ދެ ސުޕަރ ޕަވަރުން ނިއުކްލިއަރ ހަނގުރާމައަކަށް އެންމެ ކައިރިވި ދަނޑިވަޅެވެ. އަދި ޔުކްރެއިންގެ މައްސަލާގައި ރަޝިޔާ ފަހަތަށް ޖެހޭނެ ކަމަށް ހީކުރާނަމަ، ހުޅަނގުގެ ޤައުމުތަކުން ކުރަނީ ކުށް ހީއެއް ކަމަށްވެސް ވަނީ ބުނެފައެވެ.

ޖުމްލަކޮށް ބަލާއިރު، ދުނިޔޭގެ ނިއުކްލިއަރ ހަތިޔާރުތަކުގެ 88 އިންސައްތަ ކޮންޓްރޯލް ކުރަނީ ރަޝިޔާ އާއި އެމެރިކާއިން ނެވެ.

ރަޝިޔާގެ ނިއުކްލިއަރ ހަތިޔާރު ބޭނުންކުރުމާ ގުޅޭ މައިގަނޑު ނިންމުންތައް ނިންމަވަނީ އެ ގައުމުގެ ރައީސް ޕުޓިންއެވެ.