މި ސަރުކާރުގެ އެއް އަހަރު ތެރޭވެސް ރައްޔިތުންގެ ޖީބަށް ނޭދެވޭ އަސަރުކޮށްފި، މިއަދު ރައްޔިތުން އެ ވާހަކަ އެބަ ދައްކާ - ނާޒިލް
ރައްޔިތުންގެ މަޖިލީހަށް 56.6 ބިލިއަން ރުފިޔާގެ 2025 ވަނަ އަހަރުގެ ދައުލަތުގެ ބަޖެޓް ފިނޭންސް މިނިސްޓަރު މޫސާ ޒަމީރު ހުށަހެޅުއްވީ 2024 އޮކްޓޯބަރު 31 ގަ
ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
މި ސަރުކާރު ވެރިކަމަށް އައިފަހުން ރައްޔިތުންގެ ޖީބަށް ނޭދެވޭ އަސަރުކޮށްފައިވާ ކަމަށާއި މިއަދު ރައްޔިތުން އެ ވާހަކަ އެބަ ދައްކާ ކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު އިބްރާހިމް ނާޒިލް ވިދާޅުވެއްޖެއެވެ.
މަޖިލީހުގެ ބަޖެޓް ބަހުސްގައި ވާހަކަދައްކަވަމުން ނާޒިލް ވަނީ، ޖުމްލަ ބަޖެޓުގައި 57 ބިލިއަން ޖަހާފައިވާއިރު، އެ 57 ބިލިއަން ޚަރަދުކުރާނެ ގޮތުގެ ތަފްސީލެއް އެއްވެސް ވަރަކަށް ހިމަނާފައިނުވާ ކަމަށެވެ. ރައްޔިތުންގެ މަޖިލީހަށް 56.6 ބިލިއަން ރުފިޔާގެ 2025 ވަނަ އަހަރުގެ ދައުލަތުގެ ބަޖެޓް ފިނޭންސް މިނިސްޓަރު މޫސާ ޒަމީރު ހުށަހެޅުއްވީ 2024 އޮކްޓޯބަރު 31 ގައެވެ. އަންނަ އަހަރުގެ ބަޖެޓަކީ 56,647,600,859 (ފަންސާސް ހަ ބިލިޔަން، ހަސަތޭކަ ސާޅީސް ހަތް މިލިޔަން، ހަ ލައްކަ، އަށްސަތޭކަ ފަންސާސް ނުވަ) ރުފިޔާއެވެ. ޓެކްސްގެ ގޮތުގައި ނަގާ ފައިސާ އިތުރުކުރުން ފަދަ ނިންމުންތަކުގެ ނޭދެވޭ އަސަރު އިންތިހާ އަށް ރައްޔިތުންނަށް ކުރާ ކަމަށް ނާޒިލް ވިދާޅުވިއެވެ. ނާޒިލް ވަނީ އެކަމުގެ އަސަރު އެތައް އަހަރުތަކަކަށް ކުރާނެ ކަމަށް ފާހަގަކުރައްވާފައެވެ.
ބަޖެޓަށް ބަހުސް ކުރުމުގެ މަސައްކަތް ރައްޔިތުންގެ މަޖިލީހުން މިއަދު ނިންމާލާއިރު، އިދިކޮޅު މައި ޕާޓީ އެމްޑީޕީގެ މެންބަރުން ވެސް އަންނަނީ ބަޖެޓަށް ވަރަށް ބޮޑަށް ފާޑުކިޔުއްވަމުންނެވެ. އެގޮތުން، މެމްބަރުންގެ އެންމެ ބޮޑު އެއް ކަންބޮޑުވުމަކީ، ވަކިވަކި ދާއިރާތަކުގެ ރަށްރަށުގެ މަޝްރޫއުތަކަށް ހަރަދު ކުރާނެ ތަފްސީލް ޖަހާފައި ނެތުމެވެ. އަދި ބަޖެޓުގެ ސަބްސިޑީ ކަނޑާލުމާއި، މަޝްރޫޢުތައް ކުރިއަަށް ގެންދިއުމާއި މެދު މެމްބަރުންގެ ބޮޑެތި ކަންބޮޑުވުންތަކެއް ހުރިކަން ވެސް މަޖިލީހުގެ މެމްބަރުން ވަނީ ހާމަކުރައްވާފައެވެ. އާމްދަނީ އިތުރުކުރުމަށް ޓީޖީއެސްޓީ އަށް ވެސް ބުރައެއް އައިސްފައިވާ ކަމަށް ނާޒިލް ވިދާޅުވިއެވެ. ގްރީންޓެކްސް އިތުރު 100 އިންސައްތަ އިތުރުވާ ކަމަށާއި އެއާޕޯޓް ޓެކްސް ވެސް ބޮޑުވެފައިވާ ކަމަށް ނާޒިލް ވިދާޅުވިއެވެ. އެއީ ރާއްޖެ ފަދަ ފަތުރުވެރިކަމުން އާމްދަނީ ލިބޭ ޤައުމަކަށް ބިރުވެރި ހާލަތެއް ކަމަށް ނާޒިލް ވިދާޅުވިއެވެ.
އެހެންނަމަވެސް، މަޖިލީހުގައި މެޖޯރިޓީ އޮންނަ ސަރުކާރު ޕާޓީ، ޕިއެންސީގެ މެމްބަރުން ވިދާޅުވަމުން އަންނަނީ 2025 ވަނަ އަހަރަށް ލަފާކޮށް ހުށަހަޅާފައިވާ ބަޖެޓަކީ މިހާތަނަށް މަޖިލީހަށް ހުށަހެޅުނު އެންމެ ފުރިހަމަ ބަޖެޓުކަމުގައެވެ.
2025 ވަނަ އަހަރުގެ ބަޖެޓަކީ ގެދޮރުވެރިކަމުގެ ބަޖެޓެއް ކަމަށް ރައީސް ޑރ މުޙައްމަދު މުއިއްޒުވެސް ވަނީ ވިދާޅުވެފައެވެ. ނަމަވެސް، ބަޖެޓުގައި ގެދޮރުވެރިކަމަށް ކަނޑައަޅާފައިވަނީ އެންމެ އެންމެ 2.7 ބިލިއަން ރުފިޔާ އެވެ. މިއީ 2024 ވަނަ އަހަރުގެ ބަޖެޓުގައި ގެދޮރުވެރިކަމަށް ކަނޑައެޅި އަދަދާ އަޅާބަލާއިރު މަދުއަދަދެކެވެ. 2024 ވަނަ އަހަރުގެ ބަޖެޓުގައި ގެދޮރުވެރިކަމަށް ކަނޑައެޅީ 3.4 ބިލިއަން ރުފިޔާއެވެ.
ބަޖެޓް ހުށަހަޅުއްވަމުން ފިނޭންސް މިނިސްޓަރު ޒަމީރު ވިދާޅުވީ ހަރަދުގެ ގޮތުގައި ހިނގާނީ 49.2 ބިލިޔަން ރުފިޔާއެވެ. އޭގެތެރޭގައި ހިމެނެނީ ރިކަރަންޓް ހަރަދުގެ ގޮތުގައި 35.9 ބިލިޔަން ރުފިޔާއާއި ކެޕިޓަލް ހަރަދުގެ ގޮތުގައި 13.3 ބިލިޔަން ރުފިޔާ ކަމަށެވެ.
