"މި ދިމާކުރީ ނަޒާހާތްތެރިކަމާއިއެކު ހިދުމަތުގާ ދެމިހުންނެވި ގަވަރުނަރާ"
ސަރުކާރުގެ ރިކަރަންޓު ޚަރަދު މައްޗަށް ދާއިރު، މަސައްކަތެއް ނުކުރާ މީހުންނަށް ވެސް މުސާރަދޭ ކަމަށް ބުނޭ
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަލީ ޙާޝިމް
ގަވަރުނަރު އަލީ ހާޝިމް މަގާމުން ވަކި ކުރަން ސަރުކާރުން ދިމާ ކުރީ އެމަނިކުފާނު ނަޒާހަތްތެރި ކަމާއެކު މަގާމުގެ މަސްއޫލިއްޔަތުތައް އަދާ ކުރައްވަމުން ގެންދަވަނިކޮށް ކަމަށް ގަލޮޅު ދެކުނު ދާއިރާގެ މެމްބަރު މީކާއިލް އަހްމަދު ނަސީމް ވިދާޅުވެއްޖެއެވެ.
މީކާއީލް މިހެން ވިދާޅުވީ، ހޯމަ ދުވަހު ރައްޔިތުންގެ މަޖިލީހުގެ މާލިއްޔަތު ކޮމިޓީން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަލީ ޙާޝިމް ވަކި ކުރަން ފެންނަ ކަމަށް ރައީސް ޑރ. މުހައްމަދު މުއިއްޒަށް ހުށަހަޅަން ފެންނަ ކަމަށް ފާސް ކުރުމުން އެކަމަށް ރައްދު ދެއްވަމުންނެވެ.
އަލީ ހާޝިމް މަގާމުން ވަކިކުރުމުގެ މަސައްކަތް ފަށަން ހުށަހެޅުއްވީ ސަރުކާރު ތަމްސީލް ކުރާ ދިއްގަރު ދާއިރާގެ މެމްބަރު އަދި ރައްޔިތުންގެ މަޖިލިހުގެ ނައިބު ރައީސް އަހުމަދު ނާޒިމެވެ. ޑރ. މުއިއްޒުގެ ސަރުކާރުގެ މެޖޯރިޓީ އޮންނަ މާލިއްޔަތު ކޮމިޓީން ނާޒިމްގެ ހުށަހެޅުން ފާސްވި ނަމަވެސް، އެ ހުށަހެޅުމަށް މާލިއްޔަތު ކޮމިޓީގައި ހިމެނޭ އެމްޑީޕީގެ މެންބަރު ޑރ. އަހުމަދު ޝަމްހީދު ވޯޓު ދެއްވާފައެއް ނުވެއެވެ.
އަލީ ހާޝިމް މަގާމުން ވަކި ކުރުމުގެ މަސައްކަތް ކުރިއަށް ގެންދަން ނާޒިމް ހުށަހެޅުއްވީ، އެމްއެމްއޭގެ އެންމެ އިސްވެރިޔާގެ ހައިސިއްޔަތުން މަސްއޫލިއްޔަތުތައް އެންމެ ފުރިހަމަ އަށް އަލީ ހާޝިމް އަދާނުކުރައްވާ ކަމަށް ވިދާޅުވެއެވެ.
ދައުލަތުގެ ޚަރަދު ބަރަދަށް ވަމުންދާ ގޮތުގެ މައުލޫމާތު ބާރާބަރަށް ހާމަ ކުރަމުން ގެންދާ އެމްއެމްއެމްއޭ އިން އެންމެ ފަހުން އާންމު ކުރި ރިޕޯޓުގައި ފާހަގަ ކޮށްފައިވަނީ ދައުލަތުގެ ހިންގުމުގެ ޚަރަދު ވަރަށް ބޮޑަށް މައްޗަށް ގޮސްފައިވާ ކަމަށެވެ.
މި ގޮތުން މި އަހަރުގެ މާޗް މަހު ދައުލަތުން ކުރި ޖުމްލަ ޚަރަދު، ކުރީ އަހަރުގެ މާޗް މަހު ކުރި ޚަރަދަށް ވުރެ 115.3 މިލިއަން ރުފިޔާ އިތުރު ވެފައި ވާކަން އެމްއެމްއޭ އިން ވަނީ ހާމަކޮށްފައެވެ.
އެމްއެމްއޭ އިން މި ހުސްވި ޖޫން މަހުގެ "އިކޮނޮމިކް އަޕްޑޭޓް" ގައި ބުނެފައިވަނީ އެއީ 3% ގެ އިތުރުވުމެއް ކަމަށެވެ.
މިއަހަރުގެ މާޗް މަހު ރިކަރަންޓް ޚަރަދުތަކުގެ ގޮތުގައި ޚަރަދު ކުރި މިންވަރު 559.8 މިލިއަން ރުފިޔާ އަށް އަރާފައިވާ ކަމަށް އެމްއެމްއޭ އިން ބުނެފައިވެއެވެ.
ދައުލަތުގެ ހިންގުމުގެ ޚަރަދުތައް ބޮޑުވެފައިވާ ކަން އެމްއެމްއޭ އިން ހާމަ ކުރިއިރު، ސިޔާސީ މަގާމުތަކަށް ބޭނުމެއް ނެތް ގޮތައް މީހުން ލުމާއި، މާ މުހިންމު ބޭނުމަކާ ނުލާވެސް އޮފީސްތައް އުފެއްދުން ފަދަ އިސްރާފް ބޮޑު ކަންކަން މި ސަރުކާރުން ކުރަމުންދާ ކަން މޯލްޑިވިއަން ޑިމޮކްރަޓިކް ޕާޓީ އިން ހުސްވި ހަފްތާގައި ވަނީ ފާހަގަ ކޮށްފައެވެ.
"އެބައެއްގެ އަމަލުތަކާއި ހުރެ ބައިލައްކަ އެއްހާ އިންޑިޔާ ޓުއަރިސްޓުން މި ގައުމަށް ނައިސް، ބިލިއަނުން އިގްތިސޯދަށް ގެއްލުންދިން ޑެޕިއުޓީ މިނިސްޓަރުންނަށް ބަރާބަރަށް މުސާރަ ދެމުން، ޒިންމާ އަދާނުކުރާ ކަމަށްބުނެ މި ދިމާކުރީ ނަޒާހަތްތެރި ކަމާއެކު ހިދުމަތުގައި ދެމި ހުންނެވި ގަވަރުނަރާ،" މީކާއިލް ވިދާޅުވިއެވެ.
